MATAYO 18

1Abweene awo, abeeki beecha eyiri Yesu bamuteeba bati, “Wiina ohira abaasye boosi oluyaali mu Bwaami bwo Mukulu?” 2Mani Yesu yeecha yalaanga omwaana muyere yamwemesa akati-kaati waabwe, 3yaboola ati, “Mbaboolera obwadyeeri endi, haba simuchia ohwingira mu Bwaami bwo Mukulu ohutusaho nimwekaluhaanie mwaba koti abaana bayere. 4Omuundu muloonga koti omwaana wuno, niye ohira abaasye oluyaali mu Bwaami bwo Mukulu. 5Handi oyo yeesi owakaanira omwaana muyere koti wuno mu liita lyaange, aba yanjakaanire. 6“Nae omuundu yeesi oleetera mulala hu bayere bafukiiriramo bano yahola esibi, ahoyera ohuboywa mu kosi okukina kuhoongo, yaasukunwa ebusiba w'enyaanja yebira. 7Esyaalo syahabone endaalo muno, olwohuba mulimo ebihemo bikera abandu bahola ebibi! Ebihemo koti ebyo, bicha obubao endaalo choosi, nae chakaanire oyo oleeta ebihemo ebyo! 8“Nae omuhono kwao nikukera wahola esibi, kata ohukulu hwao nihukera wahola esibi, temaho osukune; silayi wingire mu Bulamu notaali nende omuhono kata ohukulu, ohuhira ohudong'a nende amahono koombi oba amakulu koombi, nae osukunwa mu muliro kutasima. 9Nae emoni yao niyikera waahola esibi, yichomolemo oyisukune; silayi wingire mu Bulamu bwo Mukulu nende emoni ndala, ohuhira ohuba nende emoni choombi, nae osukunwa mu muliro kutasima. 10“Mubone muti haba simulekeresa kata mulala hu bayere bano; mbaboolera endi Mukulu, bamalaika baabwe bali buli siha mu moni wa Lata oli Mukulu. 11 12Nae mubaasa mutye? Omuundu naaba nende amakoondi emia ndala, nae ekoondi lala hwaako likota, saaleha aao amakoondi amahumi kataanu-na-kane nende kataanu-na-kane, hundulo wo lugulu, nae yacha yakoonya lala elyo eliba ni likotere? 13Mbaboolera obwadyeeri endi, nalinyoola, aba achia ohulisangaalira muno, ohuhira kala amahumi kataanu-na-kane nende kataanu-na-kane akatakotaho. 14Nilwo nasilala lu Lata oli Mukulu yesi lwatadaha kata mulala hu bayere bano akote. 15“Mani mwaanamaao nahuholera bubi, cha yali omuboolere esibi syae, nae hola otyo nimuli mwembi mweng'ene. Nawulira ebyao, awo oba omalire ohumwekobasaho. 16Nae naahaya ohuhuwulira, bukula omuundu mulala oba babiri muche nabo yaali, olwohuba emboosi yisiirwa niyiriho abaloli babiri oba badatu. 17Nae naahaya ohuwulira abo bosi, yekesa abafukiriri basyeeng'we; nae handi naahaya ohuwulira kata echa abafukiriri basyeeng'we bosi, mani mumubukule koti omutende oba omutoosa w'omusolo. 18“Mbaboolera obwadyeeri endi, buli simuchia ohuboya hu syaalo, sichia ohuboywa Mukulu, handi buli simunaboolola hu syaalo, sichia ohuboololwa Mukulu. 19Handi mbaboolera endi, babiri hw'eng'we hu syaalo, nimufukiirisania hu siindu syoosi simusaba, Lata oli Mukulu achia ohubaholera esyeene esyo. 20Olwohuba, yi bandu babiri kata badatu yibaba nibahung'aanire mu liita lyaange, awo mba ndiwo akati waabwe.” 21Nae Peetero yeecha eyiri Yesu yamuteeba ati, “Omwaami, mwaanama niyaholera esibi, muleheramo amahabi kanga? Amahabi kataanu-na-kabiri?” 22Yesu yakobolamo ati, “Haba bbe! Si mahabi kataanu-na-kabiri, nae amahabi amahumi kataanu-na-kabiri basamo chitaanu-na-chibiri, 23“Sakira Obwaami bwo Mukulu, bufwaanana nende omutuki wenya ohuteeba abahalaabani bae ebidiira hu mwaandu kwae, kubali nakwo. 24Niyali yahachaaka ohubala, bamuleetera mulala hu bali nende ekobi lyae lya etalanta elifu ehumi; 25nae omuundu oyo, siyali nende engeri yoosi eyohutungamo ekobi elyo, mani omwenengo wae yatusa omunwa ati, akuswemo alala nende omuhasi wae, nende abaana bae, alala nende obuyiinda bwae bwoosi, atunge ekobi elyo. 26Mani omuhalaabani oyo, yakwa hu mahumbo kae, namwekongooya ati, ‘Omwaami, ndesimiiriseho, njia ohutunga ekobi elyo lyoosi.’ 27Omweenengo oyo, yamukwiira esisa, yaamuleheramo ekobi elyo lyoosi, yaamuleha yawaao. 28Nae mani omuhalaabani oyo, niyali akobolayo, yabukanana nende mulala hu bahalaabani basye owaba nende ekobi lyae lya edinaari emia ndala chong'ene; ya mwebbakiraho, yamukwa mu mamiro yaamumika naboola ati, ‘Nduunge ekobi lyaange.’ 29Mani omuhalaabani waasye, yakwa aasi, ya mwekongooya ati, ‘Ndesimiiriseho, njia ohuhutuunga.’ 30Nae yahaya ohumutekeeresa, yacha ya musukuna mu mboyero, ohwoola luyahatuunge ekobi elyo. 31Nae, abahalaabani basye nibabona batyo, omwooyo kwabachuna muno, bacha baboolera omwenengo waabwe buli siindu syali syeholehe. 32Omweenengo oyo yeecha yalaanga omuhalaabani oyo yaamuboolera ati, ‘Ewe omuhalabani mubi! Ese ndahuleheramo ekobi lyakiire awo lyoosi liwaba nalyo olwohuba wandekongooya; 33nae ewe, haba siwahakwiriire omuhalabani waasyo esisa, koti lundahukwiira?’ 34Mani etima lyadiira omwenengo oyo muno, yeecha yaasukuna omuhosi oyo mu mahono kabejiela ohwoola luyahatuunge ekobi lyae lyoosi. 35Olwo nilwo lu Lata oli Mukulu lwacha ohuholera buli muundu hweeng'we, nimutaleheramo abasy'eng'we nende omwooyo kweeng'we kwoosi.”

will be added

X\