MATAYO 17

1Mani lunyuma lw'endaalo chisaasaba, Yesu yabukula Peetero nende Yakobbo nende Yowaana mwaanang'ina, yacha nabo hu lugulu luleeyi, baaba eyo bong'ene. 2Mani Yesu yeecha yakaluhanisibwa efwaani yae mu moni waabwe, obweeni bwae bwamesamesana koti elyuuba, handi engubo chae chalafuya chamilamilana. 3Mani abweene awo, Musa nende Elija beecha baababonehera nibali ohulomaloma nae. 4Mani Peetero yaboolera Yesu ati, “Omwaami, silayi huli ano; nodaha, njia ohwombaha ebikaali bidatu ano, silala esyao, handi esiindi esya Musa, handi esiindi esy'Elija.” 5Niyali nasilomaloma, esireesi sing'enaang'ena syeecha syabebodoohania, handi ekono lyatula mu sireesi niriboola liti, “Wuno niye Omwaana wange mukoosi, ohira ohusangaasa; mumuwulire.” 6Nae abeeki nibawulira sino, obuti bwa badiira behubba aasi mafumaame. 7Nae Yesu yeecha yabadiiraho naboola ati, “Musiingire, mutatya.” 8Nae nibatingaala akulu, awumawo omuundu wundi yibabona, ohutusaho Yesu yeng'ene. 9Nibali nibeeha ohutula hu lugulu, Yesu yabahuutira ati, “Mutabooleraho omuundu yeesi bimubweene, ohwoola lu mwaana w'Omuundu yahasyuuhe mu bafu.” 10Nae abeeki beecha bamuteeba bati, “Lwasiina Abekesa ba malako baboola bati, Elija wohukobola mberi?” 11Yesu yakobolamo ati, “Elija wohwicha, handi ali nende ohutereesa buli siindu syoosi; 12nae mbaboolera endi, Elija yamala ohwiicha, ohutusaho abandu haba sibamumanya, mani bamala bamusaandya koti lubadaha. Mani mu ngeri nasilala niyo yi mwaana w'Omuundu achia ohusaandisibwa mu mahono kaabwe.” 13Awo, abeeki beecha bamanya bati yali ali ohulomaloma hu Yowaana Omubatiisi. 14Mani niboola eyiri esidiyiha sy'abandu, omusaacha wundi yeecha eyiri Yesu, yaasigama mu moni wae, 15mani yaboola ati, “Omwaami, kwiira omwaana wange esisa, olwohuba afwa endulume, handi achunisibwa muno; olundi yimukwiisa mu muliro, handi olundi mu maachi. 16Mani ndamuleeta eyiri abeeki bao, nae sibanyala ohumuwonia.” 17Mani Yesu yakobolamo ati, “Poo, eng'we oluse lubi luwuma efukiirira, ndahabe nang'we ohwoola liina? Ndahabesimiriise ohwoola liina? Mumundeetere ano.” 18Yesu yamala yahabuhira omusambwa, mani omusambwa kwamutulamo, mani ohutula esiha esyo, omusyaani oyo yawona. 19Nae abeeki beecha eyiri Yesu mu ngiso nibaboola bati, “Lwasiina, efwe sihunyalire ohwirusa omusambwa okwo?” 20Yesu yababoolera ati, “Olwohuba muli nende efukiirira ndiidi. Mbaboolera obwadyeeri endi, muba muli nende efukiirira yaakana koti olumwo lw'omutuumba, mwahaboolere olugulu luno muti, ‘Tula ano ochie era,’ mani lwaatulao; handi abulao esiindu syoosi esiba sichia ohubahaya.” 22Mani abeeki nibali nibebusiire mu Galilaaya, Yesu yababoolera ati, “Omwaana w'Omuundu achia ohudiiswa mu mahono ka bandu, 23mani bacha ohumwiita, nae hu ludaalo lw'ohudatu achia ohusyuuha.” Sino syabahalaka omwooyo muno. 24Nae niboola e Kaperanaumu, abasolosi b'omusolo kw'Enyuumba ya Nasae, beecha eyiri Peetero bamuteeba bati, “Mani omweekesa w'eng'we, yobbanga omusolo?” 25Peetero yakobolamo ati, “Eee.” Mani Peetero naakaluuhe engo, Yesu yataangira ohulomaloma nae, naboola ati, “Simooni, naawe obaasa otye? Abatuki be syaalo, basolosaanga emisolo ohutula hu bandu siina? Hu beene syaalo, kose hu bandu bandi?” 26Mani Peetero niyakaluhamo ati, “Hu bandu bandi.” Yesu yaamuboolera ati, “Mbao hane abeene syaalo balehuule. 27Nae obutanyoolesa abandu bano, cha mu nyaanja oteke elobo. Mani obukule eng'eni yonatangira ohudiisa, nae nonaasamya omunwa kwayo, ochia ohunyoolamo eseende; chibukule ochie otooye omusolo kwaange nende okwao.”

will be added

X\