MATAYO 16

1Mani Abafalisaayo nende Abasadukaayo beecha eyiri Yesu, nae ohumuhema, bamusaba abekese esilolero ohutula Mukulu. 2Nae Yesu yabakobolamo ati, “Elyuuba nilicha ohukwa, muboola muti, ‘esyaalo sichia ohuba esiyenjeefu, olwohuba amaleesi kaba kahaanye’. 3Handi mu mabweeri-bweeri, muboola muti, ‘Oludaalo lunaba olw'omuyaka, olwohuba amaleesi kaba kahaanye handi kaamaliyisa.’ Mu manyire ohukeraania engeri yi syaalo sichia ohubaamo ni mutingaala busa hu maleesi, nae simunyala ohukeraania obulolero bw'ebiha bino. 4Nasitalomwa, oluse lubi handi olucheke nilwo olukonyeresa ahalolero, nae siyiriwo ahalolero haachia ohubabereswa, ohutusaho ahalolero ha Yona.” Mani Yesu yabaleha yaasingira yawaao. 5Nae Abeki ba Yesu nibaambuha enyaanja boola engereha, bali beebiriire ohukinga omugaati kwoosi. 6Yesu yababoolera ati, “Mweeme buheke, handi mweliinde amamera k'Abafalisaayo nende Abasadukaayo.” 7Bachaaka ohweteebanaho nibaboola bati, “Aboola atyo olwohuba sihukiingire omugaati kwoosi.” 8Nae Yesu yamanya mu mwooyo kwae bi bali babaasa, yabateeba ati, “Eng'we ab'efukiirira ndiidi, lwasiina mweteebanaho obutaba nende omugaati? 9Eng'we mwesi, musisiiri ohumanya? Simwichulisa emigaati chitaanu echekusa abandu elifu chitaanu? Nae ebimweero biinga bimwabuusa? 10Oba, emigaati chitaanu-na-chibiri echekusa abandu elifu chine? Nae ebimweero biinga bimwabuusa? 11Mubeere mutye mwahaya ohumanya muti, simbeere nomaloma ebidiira hu mugaati? Mweliinde amamera k'Abafalisaayo nende ak'Abasadukaayo.” 12Awo, abeeki beecha bamanya bati, Yesu siyali naababoolera ohweliinda amamera k'emigaati, nae yali alomaloma hu njekesa y'Abafalisaayo nende ey'Abasadukaayo. 13Bulaanu, Yesu niyeecha mu situundu silaangwa Kaisarea sya Filipi yateeba abeeki bae ati, “Abandu baboola bati, Omwaana w'Omuundu niye wiina?” 14Nae baboola bati, “Abandi baboola bati, Yowaana Omubatiisi, abandi bati, Elija, handi abandi bati, Yeremiya, oba mulala hu banabbi.” 15Nae yabateeba ati, “Nae eng'we muboola muti ese nise wiina?” 16Simooni Peetero yakobolamo ati, “Niiwe Kristo, Omwaana wa Nasae mulamu.” 17Nae Yesu yamukobolamo ati, “Simooni mwaana wa Yona, oli nende ehabi! Olwohuba obwadyeeri buno, sobunyoolere ohutula hu muundu busa, nae Lata oli Mukulu niye ohubwihuliireo. 18Mani huboolera endi, niiwe Peetero, handi hu lwaanda luno, nihwo hunja ohwombaha omukanda kwa abandu bafukiiriramo, mani kata ohufwa sihuchia ohukuyiingira. 19Njia ohuhubeeresa obufunguwo bw'Obwaami bwo Mukulu, mani buli siindu sy'ofuundiha hu syaalo, sichia ohufuundihwa Mukulu, handi buli sy'otumbulula hu syaalo, sichia ohutuumbululwa Mukulu.” 20Mani Yesu yamala yahuutira abeeki bae obutabooleraho omuundu yeesi bati niye Kristo. 21Ohutula esiha esyo, Yesu yachaaka ohweekesa abeeki bae ati, ahoyere ohuchia e Yerusaalemu, mani Abemeresi ba bandu, nende Abalaamisi bahuluundu, nende Abekesa ba malako, bamusaandye muno handi bamwiite, nae hu ludaalo lw'ohudatu asyuhe. 22Nae Peetero yamusudya endulo yachaaka ohumuyiingania naboola ati, “Omwaami! Nasae atakanya esyo syahweholehaho.” 23Yesu yakaluhaana yaboolera Peetero ati, “Mbweere-eyi, Sitaani! Leha ohundehiinga mu moni, olwohuba embaasa yao eyo, si ya Nasae, nae y'abandu busa.” 24Mani Yesu yaboolera abeeki bae ati, “Omuundu yeesi odaha ohunoonda, omweene yetuseyo akiinge omusalabba kwae, mani yanonde. 25Olwohuba omuundu yesi odaha ohuwonia obulamu bwae, achia ohubukosa; nae oyo okosa obulamu bwae hu lwaange achia ohubunyoola. 26Ngaanga siina yi muundu anyoola, naalya esyaalo syoosi nae akosa obulamu bwae bweene? Oba, siina syeene si muundu anyala ohwofwong'aniamo obulamu bwae? 27Olwohuba, Omwaana w'Omuundu achia ohwiicha nende bamalaika bae mu luyaali lwa Simwaana, mani achia ohukaba buli muundu omukabo, ohweema hu biholwa byae. 28Nae mbaboolera obwadyeeri endi, baliwo abandi beemere ano, abatacha hufwa nibasisiiri ohubona Omwaana w'Omuundu niyeecha mu Bwaami bwae.”

will be added

X\