MATAYO 15

1Olwoola, Abafalisaayo nende Abekesa ba malako batula Yerusaalemu beecha eyiri Yesu bamuteeba bati, 2“Lwasiina abeeki bao balekeeresa esaambo cha bakuuka beefwe? Olwohuba sibesaaba amahono kaabwe nibacha ohulya.” 3Yesu yabakobolamo ati, “Nae lwasiina eng'we mulekeresa amalako ka Nasae olwohuba mudaha ohuloonda esaambo cha bakuuka beeng'we? 4Olwohuba Nasae yaboola ati, ‘Beresaanga lataao nende maao oluyaali,' handi, 'Omuundu onyeka simwaana kata ng'ina, ahoyera ohwiitwa.’ 5Nae eng'we muboola muti, ‘Omuundu yeesi naboolera simwaana kata ng'ina ati, omukabo kundahahubereese mbao kubereese Nasae, bulaanu oyo saba ahoyera ohuberesa simwaana oluyaali.’ 6Mani sakira mulehaanga ohuloonda emboosi ya Nasae, hulwohudaha ohuloonda emisiro cheeng'we. 7Eng'we Abebachirisi! Omunabbi Yisaaya yahola bilai ohubalomalomaho naboola ati, 8‘Abandu bano bambeeresa oluyaali nende eminwa chong'ene, nae emyooyo chaabwe chiri eyale naange; 9ohwiinama hubaanyinamiramo, hubulamo obuhoonyi, olwohuba amalako kabeekesa ka abandu busa.’ ” 10Olwoola, Yesu yalaanga abandu beecha yali, mani yababoolera ati, “Muwulire mani mu manye; 11esiingira mu hanwa w'omuundu, sinisyo esimunyaasa, nae esitula mu munwa kwae, nisyo esimunyaasa.” 12Mani abeeki bae beecha bamuboolera bati, “Omanyire oti byoboolere ebyo, bichunire Abafalisaayo?” 13Yesu yakobolamo ati, “Buli simera syoosi si Lata oli Mukulu atataaka, sichia ohwiiywa. 14Eng'we mubalehe busa; abo nibo abemirisi baofula. Nae omuwofu niyemirira omuwofu waasye, bombi bacha ohukwa mu buko.” 15Nae Peetero yamuboolera ati, “Tutumbulire amahulundu k'olukaado olwo.” 16Nae Yesu yaboola ati, “Eng'we mwesi musisiiri ohumanya amahulundu ka bino? 17Simubona muti buli siingira mu hanwa w'omuundu, sichia busa munda mani syamala syasukunwa esibakala? 18Nae esitula mu munwa kw'omuundu, siba situla mu mwooyo kwae, mani nisyo esinyaasa omuundu. 19Olwohuba mu mwooyo nimwo omutula ebibaaso bibi, obwiiti, obuyirani, obucheke, obwiibi, obwayirisi, nende ohunyaasa ameta ka bandi. 20Bino nibyo ebinyasa omuundu; nae ohulya notesaabire amahono, sinisyo esinyaasa omuundu.” 21Handi Yesu yatula awo mani yacha mu situundu siri aambi nende ebiko bye Tiro nende Sidoni. 22Abweene awo, omuhasi Mukanani wundi otula mu situundu esyo, yeecha eyiri Yesu yaamulirira ati, “Omwichuhulu wa Daudi, ngwiire esisa; omuhaana wange mulwaye muno, aliho omusaambwa.” 23Nae Yesu haba siyamukobolamo kata emboosi ndala. Nae abeeki bae beecha bamusaba nibaboola bati, “Museebule aweo, olwohuba ali ohutuloonda niyeririkania.” 24Nae Yesu yakobolamo ati, “Ndatumwa eyiri amakoondi kakota k'enyumba ya Yisirayiri kong'ene.” 25Nae omuhasi oyo, yeecha yaasigama mu makulu ka Yesu naboola ati, “Omwaami, hoonye.” 26Nae Yesu yakobolamo ati, “Sisihoyerwa ohubukula ebyohulya by'abaana wamala wabisukunira embwa.” 27Omuhasi oyo nae yakobolamo ati, “Omwaami esyo syadyeeri, nae kata embwa chosi chirichaanga ebidonye-donye bilakaha ohutula hu mesa y'omutuki wacho.” 28Mani Yesu yamukobolamo ati, “Muhasi we, efukiirira yao hoongo! Leha sihuholerwe koti lwodaha.” Mani esiha syeene esyo ni omuhaana wae awona. 29Yesu yatula awo yabitira hu ndulo we nyaanja ye Galilaaya. Mani yeecha yaniina hu lugulu, yehala aasi. 30Nae esidiyiha sihoongo syeecha yaali, nibamuleetera abalema, abebokoya emibiri, abawofu, abakwa esiru nende abandi batyo, mani baabata mu makulu kae, mani yabawonia, 31mani abandu bawuka muno nibabona abandu bali bakwa esiru nibalomaloma, abebokoya emibiri, nibaonere; abalema, nibakeenda; handi abawofu, nibabona; mani bafumya Nasae wa Yisirayiri. 32Yesu yalaanga abeeki bae beecha yali, mani yaboola ati, “Abandu bano bakera esisa nisindiira muno, olwohuba babeere naange endaalo chidatu enaamba, nae bawuma esyohulya syoosi-syoosi; nae siindaha ohubaseebula nibasisiiri ohulya, olwohuba oluuchu lunyala lwabadiira lwabakwiisa hu ngira nibakaluhayo.” 33Nae abeeki bamuboolera bati, “Nae mu siparara muno, hunaatuse ena emigaati chinyala ohwikusa abandu bano boosi?” 34Yesu yababoolera ati, “Muli nende emigaati chiinga?” Baboola bati, “Chitaanu-na-chibiri nende otung'eeni tudiidi tuyeranu.” 35Nae Yesu yaboolera esidiyiha ohwihala aasi, 36yaabukula emigaati chitaanu-na-chibiri echo, nende otung'eni otwo, nae niyamala ohwebasa, yabimekulamo, mani yabibeeresa abeeki, nae abeeki baabiberesa abandu. 37Mani boosi baalya beekuta; nae abeeki ba Yesu babuusa ebidonye-donye byadoong'aho, beechusa ebimweero bitaanu-na-bibiri. 38Abandu balya bali abasaacha elifu chine notaabalire abahasi nende abaana. 39Mani Yesu niyamala ohubaseebula, yeecha yengira elyaato yasyaabala yacha mu situundu silaangwa Magadani.

will be added

X\