MATAYO 14

1Mu siha esyo Herode omutuki, yeecha yawulira efuma ya Yesu; 2mani yaboolera abahalaabani bae ati; “Wuno niye Yowaana Omubatiisi osyuhiire ohutula mu bafu, sakira amaani kano kali ohumuholeramo.” 3Olwohuba, Herode niye owali yadiira Yowaana, yamusukuna mu mboyero. Yahola atyo ohweema hu mboosi cha Herodia omuhasi wa Filipo mwaanang'ina; 4olwohuba Yowaana yali yaamuboolera ati, “Haba sisifukiirirwa ewe ohubukula omuhasi oyo.” 5Kata Herode yadaha ohwiita Yowaana, nae yatya abandu, olwohuba bali nibamanyire bati Yowaana yali omunabbi. 6Nae hu ludaalo lw'ohwichulisiraho amebulwa ka Herode nilwoola, omwaana wa Herodia muhaana, yahina bulai muno mu moni wa abakeni, mani sino syasangaasa Herode muno, 7mani yasuubisa omuhaana oyo niyechuba ohumuberesa esiindu syoosi syaba nasabire. 8Nae omuhaana oyo yeecha yaholera hu makesi ka ng'ina yaamubeeresa yaboola ati, “Mberese omutwe kwa Yowaana Omubatiisi hu lusaani bulaanu buti.” 9Nae sino syeecha syamala omutuki amaani, nae ohwema hu hwechuba hwae hu bakeni bae bali bawuliire, yatya mani yeecha yatusa omunwa ati, baberese omuhaana oyo syaadahire; 10mani yaatuma bache mu mboyero baheenge hu Yowaana omutwe, 11mani baleeta omutwe kwa Yowaana hu lusaani, mani bakubeeresa omuhaana oyo, nae yakuleetera ng'ina. 12Nae abeeki ba Yowaana beecha baabukula omubiri kwae, baacha baakusiiha, mani baacha baaboolera Yesu. 13Bulaanu Yesu niyawulira sino, yatula awo, yaasyaabala mu lyaato yacha yeng'ene mu sifwo sibulamo abandu. Nae abandu nibawulira batyo, bamuloondaho namakulu ohutula mu biko byaabwe. 14Niyatula mu lyaato, yabona esidiyiha sy'abandu esihongo muno, mani syamudiisa esisa, yawonia abalwaye baabwe. 15Nae obwire nibweera, abeeki bae beecha yali bamuboolera bati, “Obwiire mbuno bwiirire, handi huli mu syaalo sibulamo abandu; seebula abandu bache mu ngoongo beekulire ebyohulya.” 16Nae Yesu yaboola ati, “Abandu bano haba sibahoyeere ohutula ano; eng'we mubaberese esy'ohulya.” 17Nabo ba muboolera bati, “Efwe huli busa nende emigaati chitaanu chong'ene alala nende eng'eni chibiri.” 18Nae Yesu yaboola ati, “Mubindeetere ano.” 19Mani Yesu yamala yaalagira abandu ohwihala aasi hu bunyaasi; mani nabukula emigaati chitaanu nende eng'eni chibiri, yatingaala akulu Mukulu, yebasa Nasae, mani yadonyola emigaati echo yachibeeresa abeeki, nae abeeki beecha baachibeeresa abandu. 20Mani abandu boosi balya beekuta. Mani abeeki ba Yesu babuusa ebidonye-donye byadoong'aho beechusa ebimweero ehumi-na-bibiri. 21Nae abalya bali abasaacha aambi elifu chitaanu, notaabalire abahasi nende abaana. 22Abweene awo, Yesu yaboolera abeeki bae ohwingira mu lyaato basyabale ba mutaangirire ohwaambuha bachie engereha w'enyaanja, omweene yadoong'a naseebula esidiyiha sy'abandu 23Nae niyamala ohubaseebula, yaniina yeng'ene hu lugulu ohwekongooya. Mani obwire nibwerima, yali adoong'ere yeng'ene, 24nae esiha esyo elyaato lyali lyolobereere ebusiba, amafwinda ka amaani nga kalihubba; olwohuba omuyaka kwali kuwucha nikubatulira mu moni. 25Aambi w'esaa ehumi mu maherebeende, Yesu yeecha yibali nakendera hu maachi. 26Nae abeeki bae nibamubona nakendera hu maachi, batya muno, baboola bati, “Sino ngandi sihyeno nisyo!” Mani batya bobba wuwi. 27Nae abweene awo, Yesu yalomaloma nabo naboola ati, “Mugume emyooyo, nise; mutatya daawe.” 28Nae Peetero yamukobolamo ati, “Omwaami, nooli niiwe, mboole njiche yooli syesi ningendera hu maachi.” 29Yesu yaamuboolera ati, “Ngandi keenda busa niwiicha.” Mani Peetero yatula mu lyaato, yachaaka ohukeenda hu maachi naachia eyiri Yesu; 30nae Peetero niyabona omuyaka nikuwucha, yatya, yachaaka ohusihama, mani yahuumula ati, “Omwaami, monie!” 31Abweene awo, Yesu yakolola omuhono, mani yamudiira, namuboolera ati, “Ewe, omusaacha w'efukiirira ndiidi, hu siina okana-kaane?” 32Nae olwamala ohwingira mu lyaato bati, ni omuyaka kwaakama. 33Mani abo abali mu lyaato, beenamira Yesu nibaboola bati, “Mu bwadyeeri bweene, oli Omwaana wa Nasae.” 34Nae nibamala ohwaambuha enyaanja boola engereha bakobera e Genesareeti. 35Nae abandu b'eyo, nibamanya bati niye Yesu, bacha baboolera abandu bomu situundu esyo syoosi, baleete eyiri Yesu abalwaye baabwe boosi, 36mani bamusaba bati afukirire abalwaye badiireho busa hu kemo lye ngubo yae; mani abo boosi abalidiiraho, baaonera elalira.

will be added

X\