MATAYO 13

1Hu ludaalo olwo, Yesu niyatula mu nyumba yacha hu sikobero sy'enyaanja, yehala aasi. 2Mani esidiyiha sy'abandu sihoongo syeecha syamwebodohania, mani yengira mu lyaato yehalamo; nae esidiyiha esyo syoosi syadoong'a hu lwaasi lw'enyaanja. 3Mani Yesu yachaaka ohubaboolera ebiindu biingi niyehoonyera engaado ati; “Olwoola, omulimi yacha ohuwaanya emwo yae. 4Mani niyali awaanya, emwo yindi yakwa hu ngira, nae amayoni keecha kayiboocha. 5Emwo yindi yakwa hu bikina-kina ataali eloba liingi, mani yanguya ohumera, nae koti luyitaba niyayira emisi aasi muno, 6omubasu nikwatula, kwayimamula; nae handi koti yitaali nende emisi mireyi, yaalala. 7Emwo yindi yakwa mu mawa, nae amawa keecha kafumita ebyali bimerere. 8Emwo yindi yakwa mu loba layi, mani yaama ebyaamo: eyiindi ebyaamo emia ndala, eyiindi amahumi kasasaba, eyiindi amahumi kadatu. 9Oyo oli nende amatwi, leha awulire!” 10Abweene awo, abeeki ba Yesu beecha yali bamuteeba bati, “ Siina esikera nolomaloma nende abandu mu ngaado?” 11Nae Yesu yabakobolamo ati: “Eng'we neng'we ababeresebwa ehabi y'ohumanya ebyaama bidiira hu Bwaami bwo Mukulu, nae abo haba sibaberesebwa. 12Olwohuba buli muundu oli nende esiindu, achia ohwongerwaho ebiindi, mani abe nende ebiingi bihiraho; nae owumaho nasyo achia ohutusibwaho kata nende byali nabyo. 13Sino nisyo esikera ndalomaloma nabo mu ngaado, olwohuba batingaala nae haba sibabona, batekeeresa nae haba sibawulira, kata sibamanya nohumanya. 14Sakira emboosi y'omunabbi Yisaaya yolerera abweene niyibalomalomaho yiti: ‘Mubwadyeeri bweene mwahawulire nae simwahamanye amahulundu keene, handi mwahewuunje, nae mwahaya ohubona. 15Olwohuba omwooyo kw'abandu bano muwangalafu, handi amatwi kaabwe sikawulira, handi bamala ohuliimbia emoni chaabwe, olwohuba bahabeere babona nende emoni chaabwe, bawulira nende amatwi kaabwe, handi bamanya amahulundu k'emboosi nende emyooyo chaabwe, mani bakaluha yindi ohubaonia.’ 16Nae emoni cheeng'we chiri nende ehabi olwohuba chibona, handi amatwi keeng'we kosi k'ehabi olwohuba kawulira. 17Mbaboolera obwadyeeri endi, abanabbi bangi nende abandu boolerefu bangi bekoomba ohubona bimubona, nae haba sibabibona, ohuwulira bimuwulira, nae haba sibabiwulira. 18“Bulaanu muwulire amahulundu k'olukaado lw'omuwaanyi. 19Omuundu yeesi nawulira emboosi yidiira hu Bwaami bwo Mukulu mani yahaya ohumanya amahulundu kayo, Sitaani yeecha yaanyuula esyali syataakwa mu mwooyo kwae; eyo niyo emwo yakwa hu ngira. 20Nae emwo yakwa hu bikina-kina, oyo niye omuundu owulira emboosi ya Nasae mani yayifukiirira bwaangu nende esangaalo; 21nae koti emboosi luyiteengira muno mu mwooyo kwae, yesimiirisaho budiidi, nae esidinyu syoosi kata esando yoosi niyicha hu lw'emboosi ya Nasae, abitulaho yabileha bwaangu busa. 22Nae emwo yakwa mu mawa, oyo niye owulira emboosi ya Nasae, nae hu lw'ohwelalihira hw'obulamu bw'esyaalo nende obwekoombi bw'emyaandu, bifwinyirira emboosi eyo yahaya ohwaamaho ebyaamo. 23Nae emwo yakwa mu loba layi, oyo niye owulira emboosi ya Nasae, handi yaamanya amahulundu kaayo, mani yamala yaama ebyaamo, mani yaduhana echiindi emia ndala, echiindi amahumi kasasaba, echiindi amahumi kadatu.” 24Yesu handi yeecha yabakaadira olukaado lundi ati; “Obwaami bwo Mukulu bunyala ohufwaananisibwa nende omuundu wundi wa waanya mu ndalo yae emwo ndayi y'eng'aano. 25Nae abandu nibali nibeyaliise, omusuku wae yeecha yawaanya ebae mu ngaano eyo, mani naamala niyeweerao. 26Nae ebirime ebyo nibyahula byoola ohumuliha, ebae lyosi lyeecha lyaboneha. 27Mani abahosi bae beecha bamuboolera bati; ‘Omwaami, siwataaka emwo ndayi yong'ene mu ndalo yao? Nae ebae nalyo litulire yena?’ 28Nae yabakobolamo ati; ‘Omusuku niye oholere sino.’ Nae abahosi bamuboolera bati; ‘Mani odaha huchie hwiyemo ebae elyo?’ 29Nae yabakaluhamo ati; ‘Haba bbe; olwohuba nimunaba nimwiiyamo ebae, eng'aano yosi yicha ohwiyihiraho. 30Mulehe byombi bihulire alala ohwoola ekesa; mani mu biha by'ekesa njia ohuboolera abakesa endi: mutaangire mubuuse alala ebae, mani muliboye mu mikaanda lisaambwe, nae mubuuse eng'aano muyiteere mu syaaki syaange.’ ” 31Yesu handi yeecha yabakaadira olukaado lundi ati, “Obwaami bwo Mukulu bukeraanisibwa hu lumwo lw'omutuumba, lu muundu yabukula yataaka mu ndalo yae; 32luno nilwo oluhiramo obudidi mu bumwo bwoosi, nae nilumala lwahula, lukaliya lwahira emisaala choosi obuhoongo, lwehola omusaala, ku mayoni keecha koombaha mu masaga kakwo ebiyu.” 33Yesu yabakaadira olukaado lundi ati, “Obwaami bwo Mukulu bufwaanana nende amamera omuhasi kayabukula mani yakandira alala nende ebikero bidatu by'obusye, mani yabuleha awo ohwoola lu bwoosi bufwiimba.” 34Yesu yaboolera abandu ebiindu bino byoosi mu ngaado. Siyababooleraho esiindu syoosi natehonyeere engaado. 35Byaba bityo hu mboosi yi munabbi yalomaloma yolerere yiti; “Njia ohwehoonyera engaado ninomanoma nabo; Njia ohubatuumbulira ebyali nibyeekisa ohutula esyaalo nisiloongwa.” 36Olwoola, Yesu yasingira yatula eyiri esidiyiha sy'abandu, mani yengira mu nyumba. Abaloondi bae beecha yali, bamuboolera bati; “Tweekese amahulundu k'olukaado lw'ebae lyomu ndalo.” 37Yesu yakobolamo ati; “Omuundu waanya emwo ndayi, niye Omwaana w'Omuundu; 38endalo niyo esyaalo sino; nae emwo ndayi, niyo abaana bomu Bwaami bwa Nasae; ebae nilyo abaana ba Sitaani; 39nae omusuku owaanya ebaye, niye Sitaani mweene; ekesa, nilyo oludaalo lw'enjakamo, nae abakesa, nibo bamalaika. 40Mani koti lu bae balibuusa, mani balisaamba mu muliro, nilwo lubicha ohuba hu ludaalo lw'enjakamo. 41Omwaana w'Omuundu yahatume bamalaika bae, mani bahabuuse abo abakera abandu nibahola ebibi, alala nende abaholi be bibi boosi, babatuse mu Bwaami bwae, 42mani babasukune mu muliro kutasima; eyo yibahalirire nibesia ameeno. 43Nae abolerefu bacha ohumesa-mesana koti elyuuba mu Bwaami bwa Saabwe. Oyo oli nende amatwi, leha awulire. 44“Obwaami bwo Mukulu buli koti omwaandu kwakiswa mu mukuunda, omuundu nakweduuyaho, amala yaakubwihaho, yaakukisa mberi; omuundu oyo, mu sangaalo liingi, achia yaakusa ebiindu byaali nabyo byoosi, mani yamala yaakula omukunda okwo. 45“Handi, Obwaami bwo Mukulu bufwaanana nende omuchurusi wundi okoonya amapaali malai muno, 46mani naamala yanyoola ekina ly'ebbeyi hongo muno, akobolayo mani yaacha yaakusa ebiindu byae byoosi byaali nabyo, mani yamala yaacha yaakula ekina elyo. 47“Handi Obwaami bwo Mukulu bufwaana nende olweero lu bafuuba mu nyaanja, mani lwaacha lwadiisa eng'eni cha buli ngeri; 48nilwichula, abanaabi baluhwesa ba lwosa husikobero, beecha beehala aasi, mani bachaaka ohukabulamo eng'eeni; endayi baachita mu bisero, nae embi, baachisukuna. 49Nilwo lu byahabe hu ludaalo lw'enjakamo. Bamalaika baheeche mani bakabulemo abandu babi, babatuse mu balayi, 50mani babasukune mu muliro kutasima; eyo niyo yibahalirire nibeesia ameeno. 51“Yesu yateeba abandu ati, ‘Mani mumanyire amahulundu k'ebiindu bino byoosi?’ Bamukobolamo bati, ‘Eee.’ 52“Mani yababoolera ati, ‘Sakira omweekesa w'Amalako yeesi, owamala ohwekeswa ebidiira hu Bwaami bwo Mukulu afwanana nende omwenengo odaya mu syaaki syae emere njiaha nende ehale.’ ” 53Mani Yesu niyamala ohulomaloma engaado chino, yatula awo, 54yakaluha mu siko sye waabwe syeene yachaaka ohubeekesera mu Sinagoogi chaabwe, nae abo boosi abawulira enjekesa yae bawuka muno, beteeba bati, “Nae wuno yafuna ena amakesi kano nende amaani k'ohuhola eby'amayia bino? 55Wuno siniye omwaana w'omubaachi? Ng'ina siniye olaangwa Maria? Handi ba mwaanang'ina sinibo Yakobbo, Yosefu, Simooni nende Yuda? 56Nae ba mboochong'ene boosi sibali ano ninaafwe? Nae wuno bino byoosi yabitusa yena?” 57Mani beecha bamuhayira elalira. Nae Yesu yababoolera ati, “Omunabbi yeesi, afuna oluyaali abundu woosi, ohutusaho mu siko syaabwe syeene nende mungo waabwe bweene.” 58Mani Yesu siyaholayo eby'amayia biingi, olwohuba bali nibauma efukiirira.

will be added

X\