MATAYO 12

1Olwoola Yesu yeecha yabitira mu ndalo y'eng'ano hu ludaalo lwa Sabbaato; enjala yali yiluma abaloondi bae, mani bachaaka ohwaakula emitwe ch'engaano, baachiwuula mani baalya. 2Nae Abafalisaayo nibabona batyo, baboolera Yesu bati, “Bone, abeeki bao bali ohuhola esitafukiirirwa ohuholwa hu ludaalo lwa Sabbaato.” 3Yesu yababoolera ati, “ Musisiiri ohusomaho bi Daudi yahola enjala niyimuluma nende bayali nabo: 4koti lu beengira mu nyumba ya Nasae baalya hu migaati cho hu alutaari echali chitafukiirirwa ohuliibwa nende omuundu yeesi ohutusaho abalaamisi ba Nasae bong'ene? 5Nae oba eng'we musisiiri ohusomaho hu malako ka Musa kaboola koti lu buli lwa Sabbaato, omulaamisi womu nyumba ya Nasae koti lwafunakaanga elako lya Sabbaato, nae aaba koti otafunaakeho elako? 6Mbaboolera endi, abweene ano aliwo esihuluundu esihiraho enyumba ya Nasae. 7Eng'we muba mwamanya amahulundu k'emboosi chino, ‘Ese nyenya esisa, ataali ebiyaanwa by'esolo chisaambwa,’ haba simwahahengeere omusango abo ababa nibataaholereho esibi syoosi. 8Olwohuba omwaana w'Omuundu niye Omwaami wa Sabbaato yosi.” 9Yesu niyatula awo, yacha yengira mu Sinagoogi, yabukaanamo omusaacha w'omuhono kwaafwa. 10Abandu bandi beecha bamuteeba bati; “Sifukiirirwa ohuwonia omuundu hu ludaalo lwa Sabbaato?” Bamuleetera omusaacha oyo hu beemeo banyale ohumufunaho emboosi y'ohumufunaana. 11Nae Yesu yababoolera ati, “Naanu hweeng'we mweesi, yi koondi lyae niliba nilikwiire mu liina, otanyala ohulihweesa yaalitusamo hu ludaalo lwa Sabbaato? 12Nae siba sitye, hu muundu wuno ohirira elalira eyale ekoondi omugaso! Mani sakira omuundu naaba naahola esiindu silayi hu ludaalo lwa Sabbaato, haba saba afunaka amalako.” 13Abweene awo, Yesu yeecha yaboolera omuundu wo muhono kwaafwa ati, “Kolola omuhono kwao.” Mani omuundu oyo lu yakololosa omuhono kwae, kwawonerao kwaba koti okwaasye. 14Abafalisaayo nabo bachaaka ohukoonya engira y'ohumwiita. 15Mani Yesu niyafumbula esyo, yeecha yaatula awo. Mani esidiiyiha sya bandu syamala syamulondaho, yeecha yawonia abalwaye boosi abaliwo, 16mani yamala yabahuutira ati, batabooleraho abandu bandi ebimudiraho. 17Yaboola atyo, hu mboosi chi nabbi Yisaaya yaboola choolerera chiti: 18“Eng'we boneho, omuhalaabani wange yimwene ndedoolera; Omukoosi wange, handi yi mwooyo kwaange kusangaalira muno; Ndahamuteeho Mwooyo Mwolerefu wange hw'ache alaangirire obwolerefu, mu syaalo syoosi. 19Oyo haba saachia ohuyingana, alala nende ohuhabuuhana; kata abulao owahawulire ekono lyae hu ngira. 20Oyo haba saacha ohufunaka kata ekada lyahooha, oba kata yaasimia olutaambi lulooleerere, yahedinyirise ohwoola lu bwadyeeri bwahechule mu syaalo, 21handi ni mu liita lyae nimwo mu Abateende balisuubira.” 22Olwoola abandu bandi baleetera Yesu omuundu omuwofu handi otanyala ohulomaloma olwohuba yaliho omusaambwa. Yesu yeecha yawonia omuundu oyo, yachaaka ohulomaloma alala nende ohubona. 23Abandu bawuka muno baboola bati, “Wuno haba saanyala ohuba naali niye omwichuhulu wa Daudi?” 24Nae Abafalisaayo nibawulira sino, bakobolamo bati, “Omuundu oyo yerusa emisaambwa olwohuba ali nende amaani ka Bbelesebbuli, omwaami w'emisaambwa choosi.” 25Yesu nae koti luyali namanyire ebibaaso byaabwe, yababoolera ati, “Obwaami bwoosi nibwekabuhaniamo obweene bwachaaka ohulwaanakana, haba sibuyiindira. 26Sakira sitaani nachaaka ohwirusa sitaani waasye mu bwaami bw'emisaambwa cheene echo, esyo siba syekesa siti sitaani mweene amalire ohwekabuhaniamo, mani hu lw'esyo, obwaami bwae buba bunayindire butye? 27Mani nikali mbwe ese njirusa emisaambwa hulwa amaani ka Bbelesebbuli, nae abaloondi beeng'we bakiirusa hu lw'amaani ka naanu? Sakira abandu beeng'we beene nibo abacha ohubaheengera omusango kubahire! 28Nae nikali mbwe njirusa emisaambwa hu lwa maani ka Mwooyo Mwolerefu, mani eng'we muhoyeere mumanye muti, Obwaami bwa Nasae bwamala ohuboolamo. 29Abulao omuundu onyala ohuhalaka enyumba y'omuundu w'amaani maangi, yoola yengira yaamunyakaho ebiindu byae byoosi ohutusaho natangira yamuboya, hu yaanyala ohumunyakaho ebiindu byomu nyumba yae. 30Omuundu otaholera alala naange, aba ali ohunwaania, handi mu bwadyeeri bweene, omuundu otahoonyana naange ohubuusa alala, aba ali ohusalaania busa. 31Sakira mbaboolera endi, abandu babi bacha ohuleherwamo alala nende enomanoma yaabwe yifwoola Nasae, nae omuundu yeesi olomaloma bubi hu Mwooyo Mwolerefu, saachia huleherwamo bulaanu buti handi kata nende mu ndaalo chiicha choosi. 32Omuundu yeesi olomaloma bubi hu mwaana w'Omuundu, achia ohuleherwamo, nae omuundu olomaloma bubi hu Mwooyo Mwolerefu, saachia huleherwamo, bulaanu kata nende mu biha biicha. 33“Omusaala mulai kwaamaho ebyaamo bilai; Nae omusaala mubi kwosi kwaamaho ebyaamo bibi. Olwohuba, obulayi bw'omusaala bumanyihira hu byaamo byaakwo. 34Abaana b'enjuha eng'we, munyala mutye ohulomaloma emboosi ndayi, nimuli nende emyooyo mibi kityo? Olwohuba, omuundu alomaloma ebiba nibitula mu mwooyo kwae. 35Omuundu mulai atusa hu biindu bilai biba nibyechula mu mwooyo kwae; handi omuundu mubi yesi yaatusa hu biindu bibi, ebiba nibyechula mu mwooyo kwae. 36Ese mbaboolera endi, hu ludaalo lw'ohuheengeraho emisango, buli muundu yeesi achia ohwelomalomaho hu lwa buli mboosi mbi yoosi yiyalomaloma. 37Olwohuba emboosi chao nicho echirihutusaho omusango kose chahuboyaho omusango.” 38Olwoola, Abekesa ba malako bandi, alala nende Abafalisaayo, beecha balomalomera akulu nibaboola bati; “Omweekesa, efwe hudaha ohole esyaamayia huboneho.” 39Yesu niyawulira atyo, yabakobolamo ati; “Abandu b'oluse lubi koti eng'we, nibo abasaba esilolero syamayia mberi hubamale bafukiirire. Mani abulao esilolero sibachia ohubabeeresa, ohumalaho esya nabbi Yona syong'ene. 40Koti lu Yona yamala endaalo chidatu nende ebiro bidatu mu nda y'eng'eni, nilwo lwosi lu mwaana w'Omuundu achia ohumala endaalo chidatu nende ebiro bidatu nasisiiri emakoombe. 41Oludaalo lw'ohuheengeraho omusango, abandu ba Ninefe baheeme mu siina nang'we mani babahengere omusango ohubahira, olwohuba nibawulira enjekesa ya Yona, beecha beefunaka ebibi byaabwe, nae ano mbano aliwo omuundu ohirira elalira Yona oluyaali! 42Oludaalo lw'ohuheengeraho omusango, omutuki muhasi wa Sheba, yesi yaheeme mu siina nende eng'we, yabahengera omusango ohubahira, olwohuba omweene oyo yakenda ohutula mu syaalo sy'eyale muno ohuchia ohuwuliraho hu makesi ka Solomooni, nae ano aliwo omuundu ohirira elalira Solomooni oluyaali! 43“Omusambwa mubi nikutula mu muundu, kukendaana musiparara nikukoonya abundu w'ohuwuluuhira, mani kwahaya ohunyoola. 44Bulaanu nikuba nikuhairwe ohunyoola, kwiicha kweboolera kuti, ‘Ese hangaluhe busa mu nyumba yange yinduliremo yira.’ Mani nikukaluhayo, kunyoola enyumba eyo yiri ebihaya, handi niyitereeserwe niyiboneha bulai. 45Mani, kwiicha haandi kwaatulao, kwacha kwaleeta emisambwa chaasye chiindi, chitaanu-na-chibiri, echikuhiraho obubi, cheecha cheengira mu nyumba eyo chamenyamo. Mani mu humaliiriha, omuundu oyo, aba mu bulamu bubi muno ohuhiraho bu yalimo hale. Nasilala nilwo lu byahehole hu bandu b'oluse lubi luno.” 46Yesu niyali nasilomalomaanga nende abandu abo, nae boneho ng'ina nende ba mwaanang'ina beecha boola yali. Ni boola awo, beema erwaanyi, baatuma emboosi eyiri Yesu nibadaha ohulomalomaho nae. 47 48Yesu niyawulira atyo, yakobolamo ati, “Maama niye naanu? Nae ba mwaanama nibo banaanu?” 49Yesu nakolola omuhono kwae nasyomesa hu beeki bae naboola ati, “Bone, maama nende ba mwaanama mbano.” 50Olwohuba omuundu yeesi ohola bi Bbaabba wo Mukulu byadaha, oyo niye mwaanama, mboocho yange nende maama.

will be added

X\