MATAYO 11

1Nae Yesu niyamala ohuhuutira abaloondi bae ehumi-na-babiri, yatula awo yacha ohweekesa nende ohuyaala Emboosi Ndai mu biko byaabwe. 2Nae Yowaana niyawuliirira mu mboye ebiindu bi Kristo yali naahola, yeecha yaatuma abaloondi bae ohuchia eyiri Yesu 3bamuteebe bati, “Niiwe oyo yibaboola bati waheeche, kose hukoonye owundi?” 4Nae Yesu yabakobolamo ati, “ Muche muboolere Yowaana bi muwulira, nende bi mubona; 5abawofu, babona; handi abalema, bakeenda; abageenge, baamulwaho; abadiimbe, bawulira; handi abafu, balamuha; handi abamanani bosi bayaalirwa Emboosi Ndai. 6Mani oyo ali nende ehabi otandekana-kana.” 7Mani abaloondi ba Yowaana nibasiingira ohuwaao, Yesu yachaaka ohulomaloma nende abandu ebidiira hu Yowaana naboola ati: “Eng'we mwacha musiparara ohubona siina syeene? Ekada li muyaka kuwucha nilidengaana? 8Nae lwasiina mwacha erwaanyi? Ohubona omuundu owefwaalire engubo chitoonya? Bone abo abefwala echitoonya chityo, baba mu madooho k'abatuki. 9Nae bulaanu eng'we mwacha ohubona siina? Ohubona omunabbi? Eee, mbaboolera endi, nae oyo niye ohiraho omunabbi. 10Olwohuba, oyo niye yibandiikaho bati: ‘Boneho, mbawo nduma wamwaanda wange mu moni wao, ochia ohuhutereesera engira mu moni wao.’ 11Mbaboolera obwadyeeri endi, mu bandu beebulwa boosi, saabechaangao ohira Yowaana Omubatiisi; Kata katyo, oyo ohiramo obudiidi mu Bwaami bwo Mukulu, amuhira oluyaali. 12Ohutula mu ndaalo cha Yowaana Omubatiisi, ohwoola bulaanu, Obwaami bwo Mukulu bubeere bulwaanisibwa, handi abandu b'obwaalaba bakesereho muno ohubwiingiramo nende esirifu. 13Olwohuba, abanabbi boosi, nende amalako ka Musa koosi, kalomaloma hu Bwaami bwo Mukulu ohwolera elalira hu Yowaana Omubatiisi; 14nae nimuba abetekefu ohusifukiirira, oyo niye Elija owali w'ohwiicha. 15Oyo oli nende amatwi kawulira, leha awulire. 16Nae abandu b'endaalo chino ndabakeranie nende siina? Bali koti abaana bayere abehaale mu siito nibalaanga abasyaabwe bati, 17‘Hwabobbera elere lisangasa, nae mwahaya ohuhina; handi hwabeembera olweembo lw'amasika, nae mwahaya ohulira.’ 18Olwohuba Yowaana yeecha natalia haandi natang'wa, nae baboola bati, ‘Wuno aliho omusaambwa.’ 19Nae Omwaana w'Omuundu niyeecha naalya handi nang'wa, nae baboola bati, ‘Boneho, ow'okuliira handi omumeesi wuno, omwiicha w'abatoosa b'emisolo nende abaholi b'ebibi!’ Nae amakesi ka Nasae, obwadyeeri bwaako bubonehera mu biholwa bikatulamo.” 20Yesu yeecha yachaaka ohwoolobya ebyaalo biyali naaholeremo eby'amayia biingi; olwohuba byali ni byahaya ohwefunaka mu bibi byaabyo, naboola ati, 21“Chihwakaanire, ewe Korasiini! Kata ewe Bbetisaida wesi chihwakaanire! Olwohuba eby'amayia ebyo biba byeholera mu Tiro nende Sidoni, abandu babyo baba beefunaka hale, nibefwaala amagunia, alala nende ohwebaha ekohe. 22Nae mbaboolera endi hu ludaalo lwohuheengeraho emisango nilwahoole, Tiro nende Sidoni byahaleherwemo ohuhira eng'we! 23Nae ewe Kaperanaumu, waheniinie ohwoola hu kulu? Ochia ohwiiswa aasi ohwoola emakoombe. Olwohuba eby'amayia ebyo biba byeholera mu Sodomu, siba ni sisisiiriwo ohwoola buti. 24Nae mbaboolera endi, hu ludaalo lwohuheengeraho emisango, esinyaaso sya Sodomu syahabeeho esidiidi ohuhira esyao.” 25Esiha esyo, Yesu yalomaloma naboola ati, “Ewe Bbaabba, Omwaami w'Ekulu nende esyaalo, hwebasa muno olwohuba wakisa ebiindu bino abakesi nende abasomi, nae wabibwihulira abaloonga. 26Eee, Bbaabba, sino nisyo esy'oluyaali luhongo siwadaha siholehane. 27Bbaabba yamala ohumberesa ebiindu byoosi handi abulao omuundu omanyire Omwaana ohutusaho Simwaana, handi abulao omuundu omanyire Simwaana ohutusaho Omwaana alala nende oyo yi mwaana ahengao ohumubwihulira. 28Mwiiche yindi, eng'we mweesi abahalaabana handi mwasidoyerwa, nae ese njia ohubawuluusa. 29Mwedwihe ekoombo lyaange, handi munjekereho, olwohuba ese ndi omudiira-kaala handi omuloonga mu mwooyo; mani mwahanyoole yimuwuluusira emyooyo cheeng'we. 30Olwohuba ekoombo lyaange, lyaangu, handi omukaangi kwaange, simusito.”

will be added

X\