MATAYO 10

1Yesu yalaanga abeeki bae ehumi-na-babiri mani yababeresa amaani kohwiirusa emyooyo mibi, nende ohuwonia obuchuuni bwoosi alala nende endwaae choosi. 2Ameeta k'Abatume ehumi-na-babiri niko kano: Owamberi niye, Simooni olaangwa Peetero, nende Andereya mwaanang'ina; Yakobbo omwaana wa Sebbedaayo, nende Yowaana mwaanang'ina; 3Filipo nende Batulumaayo; Tomasi nende Matayo omutoosa w'emisolo; Yakobbo omwaana wa Alufaayo, nende Tadeo; 4Simooni Omukanani, nende Yuda Yisikarioti, owamuhoba. 5Bano nibo ehumi-na-babiri ba Yesu yatuma nabahuutira ati; “Mutachichaanga mu byaalo bya Abateende, handi mutengiraanga mu biko by'Abasamaria. 6Ohumalaho muche eyiri amakoondi kakota k'enyumba ya Yisirayiri. 7Nae nimuchia, muyaale nimuboola muti: ‘Obwaami bwo Mukulu buli aambi.’ 8Muwonie abalwaye, musiingise abafu, mulabye ab'amakere, mwiruse emisaambwa. Mbao mufunire amaani buhaya, mani muberese buhaya. 9Mutakiinga esaabbu, kata efeesa, kata omugasa mu sibiro cheeng'we, 10mutakiinga esawo y'ohusuma mu lukeendo lweng'we, kata engubo chibiri kata ebiraato, kata omudiiro; olwohuba omuhalaabani ahoyera omukabo kwae. 11Nae mu buli siko oba olukoongo lumuchaamo, muteberese omuundu mulai olimo, mani mumenye nae ohwoola lumwahaweeo. 12Nimwiingira mu nyumba, muhesaanga. 13Enyuumba eyo niyihoyerwa, muleheenge ehabi cheeng'we chiyibeeho; nae niyitahoyerwa, mulehe ehabi cheeng'we chibakaluhire. 14Nae omuundu yeesi natabakaanira, kata yahaya ohutekeeresa emboosi cheeng'we, nimuba nimutula mu nyumba omwo, kata mu siko esyo, muhuhumule olufu lwo hu makulu keeng'we. 15Mbaboolera obwadyeeri endi, hu ludaalo lw'ohuheengerwa omusango, byahachire bubi esiko esyo ohuhiraho esyaalo sya Sodomu nende Gomora. 16“Mani mubone! Mbao mbatuma koti amakoondi akati-kaati mu arara; mani mube abakesikesi koti enjuha handi abaloonga koti eguugu. 17Mweliinde abandu, olwohuba bacha ohubadiira, babayire mu siina syohuheengeramo emisango, handi bacha ohubahuyira mu Sinagoogi chaabwe, 18bacha ohubahweesa babayire eyiri abatuki nende abaami baabwe hu lwaange, mani muberese obujulisi bwaange mu moni chaabwe nende echa Abateende. 19Nibabayira mu siina sibaheengeramo emisango, mutelalihiriraanga muti hunaboole hutye, kata muti hunaboole siina. Olwohuba mucha ohubereswa esyohulomaloma. 20Olwohuba emboosi chimucha ohulomaloma haba si cheeng'we, nae chicha ohutula eyiri Mwooyo wa Seeng'we ochia ohubalomalomeramo. 21Mwaanang'ina muundu mweene niye owahatuleho oluhobo lw'ohumwiita; handi simwaana muundu yesi yahatuleho oluhobo lw'ohwiita abaana bae; kata abaana bosi bahahayuhe hu beebusi baabwe, ohwahatuleho ohubeeta. 22Buli muundu yahabasyuule hu lwaange. Nae owahesimiirise ohwoola hunjakamo, niye owahaone. 23Nibabakiiya ohubahuya mu siko silala, mwiruhe muche mu siindi. Mbaboolera obwadyeeri endi, Omwaana w'Omuundu yaheeche nimutaswaania emirimo cheeng'we mu biko bya Yisirayiri byoosi. 24“Abulao omweeki ohira omweekesa wae oluyaali; handi abulao omuhalaabani ohira omuhongo wae oluyaali. 25Omweeki mulai ahoyere afwanane nende omweekesa wae, handi omuhalaabani mulai yesi ahoyere afwanane nende omuhongo wae. Nae lu balaangira Omweenengo bati Bbelesebbuli, bahaake ena ohunyeka abomudaala lyae! 26“Mani mutabatichaanga. Awumao esiindu sikiswa esitahabonehe, handi awumawo esyaama syoosi esitahatumbulwe syamanyihana. 27Bimbaboolera mu ngiso, mubituumbule mu bulafu. Handi bimuwulira mu syama mubituumbule biwuliirihanire mu bulafu. 28Handi mutatichaanga abo abeeta omubiri nae sibanyala hwiita omwooyo; ohumalaho mutye oyo onyala ohunyaasa omwooyo nende omubiri, yaabisukuna mu muliro kutasima. 29Obubbiichu bubiri sibukulwa ehela ndala yong'ene? Nae, lala hwaako sirinyala lyaakwa aasi Seeng'we nataamanyire. 30Kata efwiiri lyohumitwe cheeng'we lyosi lyamala ohubalwa. 31Sakira mutaba nende obuti, olwohuba eng'we muli abobuhonyi bungi muno ohuhira obubbiichu. 32“Buli muundu owufukiirira mu lwichuule lwa bandu ati ali omuloondi wange, syesi njia ohumufukiirira endi wange mu moni wa Lata oli Mukulu. 33Nae owundekaana mu moni wa baandu, syesi njia ohumwekaana mu moni wa Lata oli Mukulu. 34“Mutabaasa muti ndeecha ohuleeta esangaalo hu syaalo; sindeecha ohuleeta esangaalo ohutusaho ndeecha ohuleeta obulekani. 35Ndeecha ohukabuhania omwaana musyaani nende simwaana, handi omwaana muhaana nende ng'ina, muhomusyani nende masalang'ene; 36nae abasuku b'omuundu bahabe abomu nyumba yae yene. 37Oyo odaha simwaana kata ng'ina ohuhira ese, haba sahoyera ohuba omuloondi wange; handi oyo yesi odaha abaana bae ohuhira ese, sahoyera ohuba omuloondi wange; 38Nae oyo yeesi otakiinga omusalabba kwae mani yanonda, sahoyera ohuba omuloondi wange. 39Omuundu yeesi okesaho ohuwonia obulamu bwae hu lwae omweene, achia ohubufwiirwa; nae oyo owaayo obulamu bwae hu lwaange, achia ohubuduuhana. 40“Oyo obakaanira aba yanjakaanire; handi oyo yeesi owunjakaanira haba saba yanjakaanire syeng'ene, nae aba yakaanire oyo owanduma. 41Oyo yeesi owakaanira omunabbi wa Nasae hu lwohuba ali omunabbi, achia ohufuna omukabo kw'omunabbi wa Nasae, handi oyo owakaanira omuundu mwolerefu olwohuba ali omwolerefu achia ohufuna omukabo kw'omuundu mwolerefu. 42Handi, oyo obeeresa mulala hu baana baere bano amaachi manyifu k'ohung'wa, olwohuba baloondi bange, mbaboolera endi saachia hufwiirwa omukabo kwae.”

will be added

X\