MARIKO 9

1Yesu yemawo yababoolera ati, “Mubwadyeeri mbaboolera endi, aliwo abandu bandi hu beemere ano, abacha ohubona obwaami bwa Nasae nibwiichire nende obunyala, nibatoola ohufwa.” 2Mani oluunyuma lw'endaalo chisaasaba, Yesu yeecha yabukula Peetero nende Yakobbo nende Yowaana, yaabayira hu lugulu luleeyi bong'ene; mani yakaluhanisibwa mu moni chaabwe, 3mani ebyefwalo byae byang'enang'ena, nende obwa dibbo bumilamilana muno, ohuhira esilabya syoosi esiri hu syalo huno syahanyala ohulabya. 4Mani abweene awo waboneherao Elija alala nende Musa; nibali ohulomaloma nende Yesu. 5Mani Peetero yaboolera Yesu ati, “Omwaami, silayi muno efwe ohuba ano; leha efwe hwombahe ebikaali bidatu, silala esyao, silala esya Musa, handi silala esya Elija.” 6Olwohuba Peetero yali awungire, ahayiswe nende esy'ohuboola, olwohuba bali batiire muno. 7Mani esireesi syeecha syaabafuuniha, mani ekono lyeecha lyatulira musireesi niliboola liti, “Wuno niye Omwaana wange muheerwa; mumuwulire.” 8Mani abweene awo nibachaaka ohwewunja bulai, haba sibabonaho omuundu wundi yeesi naali nabo ohutusaho Yesu yeng'ene. 9Mani nibali mbwe hubehirira aasi w'olugulu, Yesu yeecha yabahutira obutabooleraho omuundu yeesi ebyo bibali nibabweene, ohwoola lu mwaana w'Omuundu niliba naamalire ohusyuuha ohutula mu bafu. 10Mani beecha babiiha esiindu esyo mu mwooyo chaabwe, nibetebaanga abeene ohumanya emboosi echo mbwe ohusyuuha ohutula mu bafu bicheekesa. 11Nae bamuteeba bati, “Lwasiina, abekesa b'amalako baboola bati Elija niye ohoyeere ohutangira ohwiicha?” 12Nae Yesu yababoolera ati, “Elija niye otaangira ohwiicha atekehe ebiindu byoosi bibe koti lubihoyeere ohuba; nae ebyandiikibwa bidiira hu mwaana w'Omuundu byeekesa siina, biti mbwe ahoyere ohusaanda muno handi ayiribwe koti omusyuule? 13Nae ese mbaboolera endi Elija yamala ohwiicha, mani bamala ohumuhola syoosi sibadaha, koti busa lubyamulomalomaho mubyandiiko byolerefu.” 14Mani nibeecha boola eyiri abeeki, babona esidiyiha sihoongo muno nisibebodohaanie, mani abekesa b'amalako nibali ohuyingana nabo. 15Mani abweene awo abeeki nibabona Yesu, besinduha muno, mani beeruha nibacha yali, bamala bamuheesa. 16Nae Yesu yabateeba ati, “Siina syeene simuli ohuyinganaanga nabo?” 17Nae mulala hu bandu bali mu sidiyiiha yamukobolamo ati, “Omweekesa, ndeetere omwaana wange yooli, olwohuba aliho omusaambwa mubbungafu; 18mani buli lukumuninaanga, kumubbanga aasi; mani abira efiro muhanwa niyeesia ameeno mani amala abbangalala. Mani sabire abeeki bao ohukwiirusa nae sibanyalire.” 19Nae Yesu yabakobolamo ati, “Ee, eng'we oluse lutamanyire Nasae, njia ohuba nang'we ohwoola liina? Njia ohubesimiirisa ohwoola liina? Mumundeetere ano.” 20Mani beecha baleeta omusyaani oyo eyiri Yesu; nae omusaambwa okwo nikwabona Yesu, abweene awo kwaniina omusyaani oyo, mani kwamusuchaa-sucha, mani yaakwa aasi, yekalangasa, nabira efiro muhanwa. 21Mani Yesu yateeba simwaana mwaana oyo ati, “Yahaba ati ohumala mbaka siina?” Nae yaboola ati, “Ohutula mu budoto bwae. 22Mani buli siha kumusukunaanga mu muliro nende mu maachi, kuti kumusihirise; nae nonyala wahola esiindu syoosi, tukwiire esisa mani otuhoonye.” 23Nae Yesu yamuboolera ati, “Mbwe nonyala! Ebiindu byoosi binyaliha eyiri oyo ofukiirira.” 24Abweene awo, simwaana mwaana oyo yayula naboola ati, “Ese fukiirira; ewe ndehere hu lw'obutaba nende efukiirira hwange ohwo!” 25Nae Yesu niyabona ati esidiyiha syali sichaakire ohwiruha nisyebuusa alala, yahabuhira omusaambwa okwo naboola ati, “Ewe omusaambwa mudiimbe handi okwakwa esiru, hulagira endi, tula mu mwaana oyo, handi otamukaluhaangamo ehabi liindi.” 26Mani nikwamala ohwayula nende ohumususuucha bubi muno, kwamutulamo, mani omusyaani oyo yaba koti omulaambo kwaafwa hale; mani abandu bahira obuungi baboola bati, “Amalire ohufwa.” 27Nae Yesu yeecha yaamusingisa namudiirire omuhono, mani yaasingira yeema. 28Mani Yesu niyali naamalire ohwingira mu nyumba, abeeki bae beecha bamuteeba nibali bong'ene bati, “Lwasiina efwe sihunyalire ohwirusa omusambwa okwo?” 29Nae Yesu yababoolera ati, “Omusambwa kufwaana koti kuno, sikunyala ohwiruswa nende esiindu syoosi ohutusaho ohusaba hwong'ene.” 30Yesu nende abeeki bae beecha batula awo, bahalakania mu Galilaaya. Yesu siyakanyaho omuundu yeesi amanyeho atyo; 31olwohuba yali niyeekesaanga abeeki bae nababoolera ati, “Omwaana w'Omuundu achia ohudiiswa mu mahono k'abandu bandi, bache bamwiite; mani naamalire ohwiitwa, oluunyuma lw'endaalo chidatu, achia ohusyuuha.” 32Nae abeeki bae sibanyala ohumanya enomanoma eyo, mani baatya ohumuteeba. 33Mani boosi beecha boola e Kaperanaumu; mani Yesu niyali amalire ohwingira mu nyumba, yabateeba ati, “Mubeere nimuteebanaanga siina hu ngira?” 34Nae abeeki boosi bawuleera busa chi; olwohuba nibali bali hu ngira bali nibateebanaanga abeene-na-beene oyo owali nabahiramo oluyaali. 35Yesu yamala yehala aasi mani yalaanga ehumi-na-babiri abo; mani yababoolera ati, “Omuundu yeesi naaba achia ohuba omwimirisi, ahoyere ohuba owenyuma ohira mu boosi, handi ohuba omuhalaabani wa boosi.” 36Mani Yesu yeecha yabukula omwaana muyere, yamwemesa akati waabwe; mani yamwakata mu mahono kae, yababoolera ati, 37“Oyo yeesi owakaanira omwaana ofwaana koti wuno mu liita lyaange aba yanjakaanire; nae handi oyo owunjakaanira, aba siyakaanire ese, nae aba yakaanire oyo owanduma.” 38Nae Yowaana yaboolera Yesu ati, “Omweekesa, hubweene omuundu wundi niyerusa emisaambwa mu liita lyao, mani hwamukayira olwohuba saali mulala hweefwe.” 39Nae Yesu yaboola ati, “Mutamukayira; olwohuba awumao onyala ohuhola omulimo kwamaani mu liita lyaange, handi abweene awo yanomanomaho bubi. 40Olwohuba oyo atatuyirimba, aba ali alala naafwe. 41Mbaboolera obwadyeeri endi, buli obabeeresa amaachi k'ohung'wa olwohuba muli abandu ba Kristo, haba saachia hufwiirwa omukabo kwae. 42“Oyo okera mulala hu baere bano abafukiriramo yaakwa mu sibi, syahahirire yaboywa okukina kuhoongo mu kosi mani yaasukunwa mu nyaanja. 43Nae omuhono kwao nikukera wakwa mu sibi, kutemeho; olwohuba ohwingira mu bulamu butawa nooli omulema, bihira ohuchia mu muliro kutasima nende amahono koombi, mu muliro kutasima. 44 45Nae ohukulu hwao nihukera wakwa mu sibi huteemeho, olwohuba ohwingira mu bulamu butawa nooli omulema bihira ohuchia mu muliro kutasima nooli nende amakulu koombi. 46 47Nae emoni yao niyikera wakwa mu sibi, yichomolemo; olwohuba ohwingira mu bwaami bwa Nasae nooli nende emoni ndala bihira ohuchia mu muliro kutasima nende emoni choombi, 48yi nyeende chayo chitafwa, handi yi muliro kwayo kutasima. 49Olwohuba buli muundu achia oluungibwa n'omuliro. 50Omuunyu mulai nikwo; nae omuunyu nikuwaamo echamu lyaakwo, kunyala kutye ohukaluswamo echamu elyo? Mubecheengemo echamu, handi abeene-na-beene mubecheenge emireembe.”

will be added

X\