MARIKO 8

1Mu ndaalo echo, esidiyiha sy'abandu sihoongo muno handi nisyeecha syebuusira eyiri Yesu, mani bahaywa esyohulya syoosi, Yesu yalaanga abeeki bae, yababoolera ati, 2“Esidiyiha sy'abandu sino sindiisa esisa muno, olwohuba syahaba ano naange endaalo chidatu enaamba, mani babula esyohulya syoosi; 3nae nimbaseebula bakobole engo waabwe nende enjala, bacha ohukwa hu ngira; handi abandi hu bandu bano batula eyale muno.” 4Nae abeeki bae bamukobolamo bati, “Wiina onyala ohuliisa abandu bangi bano emigaati mu syalo sy'esiparara sino?” 5Nae Yesu yabateeba ati, “Nae eng'we muli nende emigaati chiinga?” Baboola bati, “Chitaanu-na-chibiri.” 6Mani Yesu yeecha yaboola esidiyiha esyo ohwihala aasi hu loba; mani yeecha yabukula emigaati chitaanu-na-chibiri echo, mani niyamala ohuchibeeresa ehabi, yachidonya-donya, yachibeeresa abeeki bae bachikabule abandu abo; mani bosi bamala bahola batyo. 7Abeki abo bali nende otung'eni tudiidi twosi, mani Yesu niyamala ohutubeeresa ehabi, yaboola ati otung'eeni tuno twosi batukabule abandu. 8Mani beecha baalya, beekutira elalira; mani babuusa ebidonye-donye ebyadoong'aho, byechula ebimweero bitaanu-na-bibiri. 9Abandu balya bali aambi elifu chine enaamba. 10Yesu yemao yaseebula abandu abo bawaao; mani abweene awo, yeecha yengira mu lyaato alala nende abeeki bae, mani bamala bacha mu situundu esilaangwa siti, Dalumanuuta. 11Olwoola, Abafalisaayo bandi beecha eyiri Yesu mani bachaaka ohuyingana nae, nibamuhema abaholere esilolero esy'amayia ohutula Mukulu. 12Yesu yeecha yesa omwooyo lukali muno, naboola ati, “Lwasiina olwiibulo luno lukonyeresa busa esilolero? Mbaboolera obwadyeeri endi, abulao esilolero sichia ohubereswa olwiibulo luno.” 13Yesu yemao yabatulaho yawaao, yengira mu lyaato yasyaabala yacha engereha. 14Bulaanu abeeki bae bali nibebiriire ohwiicha nende emigaati; nae bali badong'ere nende omugaati mulala kwong'ene mu lyaato 15Yesu yemawo yabakerakira naboola ati, “Mumanyaanga, mweliinde amamera k'Abafalisaayo nende aka Herode.” 16Abeki beecha baboolanira abeene-na-beene bati, “Hubula omugaati kwoosi.” 17Nae olwohuba Yesu yali amalire ohusimanya, yemawo yababoolera ati, “Lwasiina muli ohwekaniayaanga muti mubula omugaati kwoosi? Eng'we mutoola ohubona hwosi kata ohumanya hwosi? Emyooyo cheeng'we chomerana? 18Mwaba nende emoni, mwahaya ohubona? Handi mwaba nende amatwi, mwahaya ohuwulira? Handi kata simunyala ohwichulisaho? 19Oludaalo lu ndadonya-donyeraho emigaati chitaanu ohuliisa abandu babita elifu chitaanu, eng'we mwabuusa ebimweero biinga ebichuule ebidonye-donye byadoong'aho?” Nabo bamukobolamo bati, “Ehumi-na-bibiri.” 20“Nae emigaati chitaanu-na-chibiri ohuliisa abandu ababita elifu chine, mwabuusa ebimweero biinga ebichuule ebidonye-donye byadoong'aho?” Nabo bamukobolamo bati, “Bitaanu-na-bibiri.” 21Nae Yesu yemawo yababoolera ati, “Kata katyo, ohumanyaho hwosi, musisiiri ohumanya?” 22Beemao boola e Bbetisaida. Niboola eyo, abandu bandi beecha baleeta eyiri Yesu omusaacha muwofu, bamwekongooya bati amudiireho busa. 23Yesu yeecha yadiira omuhono kw'omusaacha muwofu oyo, yamutusa erwaanyi w'olukoongo olwo; yaamufucha hu moni, handi yamwisaho amahono kae, mani yaamuteeba ati, “Oli ohubonaho esiindu syoosi-syoosi?” 24Omusaacha oyo yeecha yatingaala akulu mani yaamala yaboola ati, “Ndi ohubona abandu; nae bafwaana koti emisaala chikeenda.” 25Yesu yeecha handi yaata amahono kae hu moni ch'omusaacha oyo; mani omusaacha oyo yeecha yahang'aasa emoni chae, mani chawonera elalira, yaanyala ohubona buli siindu bulai bweene. 26Yesu yemao yaseebula omusaacha oyo akobole engo wae, namuboolera ati, “Otachiaho kata wengira mu lukoongo olwo.” 27Yesu yemao yaasingira yawaao nende abeeki bae, bacha mu ngoongo echiri mu Kaisarea Filipi; nae nibali hu lukeendo olwo, Yesu yeecha yateeba abeeki bae ati, “Abandu baboola bati nise naanu?” 28Nae abeeki bae bamuboolera bati, “Yowaana Omubatiisi; abandi bati, Elija; handi abandi bati, mulala hu banabbi.” 29Nae Yesu yabateeba ati, “Nae eng'we muboola muti nise naanu?” Peetero yamukobolamo ati, “Ewe niiwe Kristo.” 30Mani Yesu yabahutira ati bataboolera omuundu yeesi ebimudiiraho. 31Yesu mani yachaaka ohubeekesa ati Omwaana w'Omuundu ahoyere ohusaanda muno, handi asyulwe nende abahuluundu b'enjia, abalaamisi bahuluundu, nende abekesi b'amalako, handi yeetibwe, handi oluunyuma lw'endaalo chidatu, asyuhe. 32Yesu yalomaloma bino mubwahaahu. Nae Peetero yamubukula yamuyira endulo mani yachaaka ohumwalabira. 33Nae Yesu niyakaluhaana mani yabona abeeki bae, yaalabira Peetero, naboola ati, “Ewe Sitaani, mbweere eyi! Olwohuba haba sooli huluwaande lwa Nasae, nae oli hu lwaande lw'abandu.” 34Yesu yemao yalaanga esidiyiha sy'abandu alala nende abeeki bae beeche yali, mani yababoolera ati, “Omuundu yeesi odaha ohunoonda, leha yesyule omweene, mani akinge omusalabba kwae, yanonde. 35Olwohuba oyo yeesi odaha ohuwonia obulamu bwae omweene, achia ohubukosa; nae oyo okosa obulamu bwae hu lwaange nende hulw'Emboosi Ndai, aba achia ohubuwonia. 36Olwohuba omuundu afunamo siina, ohunyoola esyaalo syoosi, nae afwiirwe obulamu bwae? 37Olwohuba, siindu siina syeene si muundu anyala ohukulasaniamo obulamu bwae? 38Olwohuba, oyo yeesi odiirwa esoni hu lwaange nende hu lw'emboosi change, mu luse luholi lw'ebibi handi olutamanyire Nasae luno, oyo niye yi mwaana w'Omuundu yesi achia ohudiirirwa esoni, niyahabe niyeecha mu luyaali luhoongo lwa Simwaana alala nende bamalaika boolerefu.”

will be added

X\