MARIKO 7

1Nae bulaanu, Abafalisaayo beecha bebuusira ali Yesu, alala nende abekesa ba malako bandi abali nibatulire e Yerusaalemu, 2beecha babona bati, abeeki ba Yesu bandi balichaanga nibatesabire amahono, esyeekesa siti, haba sibesabaanga amahono koti lusihoyeere. 3(Olwohuba Abafalisaayo, nende Abayudaaya boosi, sibalya nibatesaabire amahono kaabwe nibalondakirira nende omuduunga kwali kwa bakuuka yaabwe; 4nae handi nibakaluha ango nibatula mu siito, sibalya ohwoola lu balabya emibiri chaabwe; handi aliwo emiduunga chiindi emiingi muno chibahoyerwanga ohwoseresa koti, okw'ohwoosa ebikoombe nende esyoongo alala nende ebiindu byehonyerwa byoosi ebyaholwa musibya sy'omugasa. ) 5Handi Abafalisaayo alala nende abandiiki ba malako beemao bateeba Yesu nibaboola bati, “Lwasiina abeeki bao haba sibalondakana nende emiduunga cha bakuuka yeefwe, nae balya busa nende amahono kefutire?” 6Nae Yesu yababoolera ati, “Bwadyeeri omunabbi Yisaaya yadeeka yalomaloma hw'eng'we abebachirisi koti lusyandiikwa siti, ‘Abandu bano banjisamo oluyaali nende emboosi chong'ene, nae emyooyo chaabwe chiri eyale naange; 7ohunyinamira hwaabwe hubulamo amahulundu.’ ‘beekesa koti amalako ebiindu bi bandu bataao busa.’ 8Eng'we muleha Elako lya Nasae, nimwomiirira hu miduunga cha bandu busa.” 9Handi Yesu yeecha yababoolera ati, “Eng'we muli nende amakesi muno akohufuna engira ndayi y'ohuta ebuleka Elako lya Nasae, hu mweemeo munyale ohwoseresa emiduunga cheeng'we! 10Olwohuba Musa yaboola ati, ‘Yisaanga oluyaali mu latao nende mao’; handi ati, ‘Oyo yeesi olomaloma bubi hu simwaana kata ng'ina, mubwadyeri bweene ahoyera ohufwa’; 11nang'we muboola muti omuundu naboolera simwaana kata ng'ina ati, ‘Esyo simbeere njia ohuhubeeresa bulaanu siri Korubbani,’ esyo nisyo esiyaanwa sibereeswe Nasae 12awo bulaanu simuba mumukanya ohuholeraho simwaana kata ng'ina, esiindu syoosi, 13awo niyo yimunyasira elalira emboosi ya Nasae nimwehoonyera emiduunga cheeng'we echo chimuchiiririra nimweekesa abana beeng'we. Handi muhola ebiindu biingi biindi koti ebyo bityo.” 14Yesu handi yalaanga abandu beecha yali, mani yababoolera ati, “Eng'we mweesi mutekeerese bulai bimboola bino, handi mumanye muti: 15abulao esiindu syoosi esiingira mu muundu nisitula erwaanyi esinyala syamunyaasa; ohutusaho ebyo ebitula mu muundu nibyo ebimunyaasa.” 16 17Nae abandu nibaba nibamalire ohuwaao, Yesu yeecha yengira mu nyumba, mani abeeki bae bamuteeba amahulundu k'olukaado olwo. 18Nae yababoolera ati, “Hane mbao mwesi musisiiri ohumanya. Haba simubona muti buli siindu syoosi esiingira mu muundu ohutula erwaanyi sisinyala humunyaasa, 19olwohuba ni siingira, haba sisichia mu mwooyo, nae sichia munda yae mani syabitamo busa?” 20Mani yaboola ati, “Esiindu situla mu muundu nisyo esimunyaasa. 21Olwohuba, ebiindu bitula mu muundu, biba bitula mu mwooyo kwae, omwo nimwo omutula ebibaaso bibi, obuyirani, obwiibi, obutemo, obucheke, 22obwekoombi bubi, obusuku, obubacha, obuseresi bubi, ehiinda, obumoonyi, esuunga, esibboli. 23Ebibi bino byoosi, bitula mu muundu, mani nibyo ebimunyaasa.” 24Mani niyamala atyo, yasingira yawao naachia mu syalo sya Tiro nende Sidoni. Mani yeecha yengira mu nyumba, natakanya omuundu yeesi asimanye; kata katyo, siyanyala ohwekisa. 25Nae abweene awo, ni omuhasi wundi yi mwaana wae muhaana yaliho omusambwa, yeecha yawulira ati Yesu aliwo, mani yeecha yaakwa aasi mu makulu kae. 26Nae bulaanu omuhasi oyo yali Omuyonaani, omwibulanwa wa Foenisia ohutula Siiria. Mani yaasaba Yesu yeeruse omusambwa okwo hu mwaana wae oyo. 27Mani Yesu yaboolera omuhasi oyo ati, “Leha mberi bataangire ohuliisa abaana, olwohuba sisilai ohubukula ebyohulya by'abaana wabisukunira embwa.” 28Nae omuhasi oyo yamukobolamo ati, “Eee, Omuhulundu; kata katyo, embwa chiri aasi w'emeesa chosi chirichaangaho kata hu budonye-donye bw'ebyohulya bi baana balya balehaho.” 29Nae Yesu yamuboolera ati, “Ohweema hu nomaloma yino, onyala wewerawo; omusaambwa kumalire ohutula hu mwaana wao oyo.” 30Mani omuhasi oyo yawaawo yakobola engo, yanyoola omwaana wae oyo niyeyaliise hu sitaanda, omusambwa nikumalire ohumutulamo. 31Yesu niyakobola ohutula mu syalo sya Tiro, yabitira hu ngira ya Sidoni, ey'omusyaalo sy'ebiko ehumi (Dekapooli), naachia hu nyaanja ye Galilaaya. 32Mani handi beecha bamuleetera omusaacha wundi owali omudiimbe handi nga haba saanyala hulomaloma; mani basaba Yesu amwiseho omuhono kwae. 33Nae Yesu yeecha yaamuyira endulo yi bandu bataali, yaata enjala chae mu matwi k'omusaacha oyo, handi yafuucha amate, yaamala yaamudiira hu lulimi; 34niyamala atyo yatingaala Mukulu, yeesa omwooyo mani yamuboolera ati, “Efufata,” esyeekesa mbwe, “Yikuha.” 35Mani amatwi kae keemao keekuha, olulimi lwae lwaboololoha, mani yaanyala ohulomaloma bulai bweene. 36Yesu yemao yabahutira batabooleraho omuundu yeesi; nae koti luyachiiririra ohubahuutira, nilwo lwosi lu bandu bachiririra ohusilomaloma nende obwomiifu bwoosi. 37Mani abandu beecha besinduha ohubitiirira, nibaboola bati, “Wuno mbano aholere ebiindu byoosi bulai bweene; akera kata abadiimbe bosi bawulira handi abakwa esiru bosi balomaloma.”

will be added

X\