MARIKO 6

1Yesu yemao yaatula awo yacha mu syaalo syewaabwe syeene mani abeeki bae bamuloondaho. 2Nae oludaalo lwa Sabbaato nilwoola, yacha mu Sinagoogi yachaaka ohweekesa. Mani abandu bangi bali omwo nibawulira biyeekesa, besinduha muno baboola bati, “Nae omusaacha wuno yatusa ena bino byoosi? Makesi siina kano kabamubeeresa? Anyala atye ohuhola ebiwukisa bino! 3Wuno haba siniye omubaachi busa, omwaana wa Maria, handi mwaanang'ina Yakobbo nende Yosefu, nende Yuda nende Simooni, handi bambochong'ene sibamenya busa naafwe?” Mani beemao bamwekaana. 4Nae Yesu yababoolera ati, “Omunabbi yeesi saahaywa ohubeereswa oluyaali ohutusaho mu siko sy'ewaabwe syeene, handi mu bandu bae beene, handi mu b'enyumba yae yene.” 5Mani Yesu siyanyala huholerayo ebyaamayia byoosi, ohutusaho yesa amahono hu balwaaye badiidi busa mani yabawonia. 6Mani Yesu yeecha yesinduha muno hulw'efukiirira ndiidi yibali nayo. Mani Yesu yabita niyeekesa mu ngoongo. 7Mani yalaanga abeeki ehumi-na-babiri beeche yali, mani yaamala yabatuma bache babiri-babiri, mani yababeeresa obunyala bw'ohwirusa emyooyo mibi. 8Yabahuutira batakiingaho esiindu syoosi mu lukeendo lwaabwe ohutusaho endabuhi; batakiinga omugaati kwoosi, kata omufuuko, kata eseende yoosi mu sibiro chaabwe; 9nae befwaale ebiraato by'akaala, nae batefwaala amakanju kabiri. 10Mani Yesu yababoolera ati, “Nimwiingiraanga mu nyumba yoosi, mubecheenge omwo ohwoola lu mwahaweereo. 11Nae nimwolaanga abundu yibatababukaanira mani bahaya ohubawulira, nimuba nimutula mu syaalo esyo, muteng'ulaanga olufu luli hu makulu keeng'we lube esilolero sibakabuhania nabo.” 12Mani abeeki abo bacha bayaala bati abandu bahoyeere ohwefunaka. 13Mani beecha berusa hu bandu emisaambwa miingi muno, mani baabaha abalwaye bangi amafuta, mani baabawonia. 14Omutuki Herode, yeecha yasiwulira; olwohuba eliita lya Yesu lyali lifuma muno. Abandu bandi baboola bati, “Wuno niye Yowaana Omubatiisi owasyuhiiswe ohutula mu bafu; mani sakira obunyala buno bwoosi buli ohumuholeramo.” 15Nae abandu bandi nabo baboola bati, “Wuno niye Elija.” Handi abandi baboola bati, “Wuno niye omunabbi, oli busa koti mulala hu banabbi bahale.” 16Nae Herode niyawulira sino yaboola ati, “Yowaana, yindahengaho omutwe, niye wuno ohusyuhiiswe.” 17Olwohuba Herode yali yatuma handi niyadiira Yowaana, mani nibamuboyera mu mboyero olwohuba Herodia, owali omuhasi wa Filipo mwaanang'ina, yi Herode yali yadeehya. 18Olwohuba Yowaana yali yaboolera Herode ati, “Haba sisihoyerwa ewe ohuyira omuhasi wa mwaanamaao.” 19Mani Herodia yali yadiirira Yowaana ehiinda, nakiiyanga ohumwiita. Nae yali saanyala ohusihola, 20olwohuba Herode yali yatya muno Yowaana namanyire bulai bweene ati, Yowaana yali omusaacha omulungifu mweene handi omwolerefu, mani yaamulinda bulai bweene. Mani niyawulira Yowaana nayaala, yateenga muno; kata niyasangaalira bi Yowaana yayalaanga. 21Nae ehabi yeecha yadiira Herodia, hu ludaalo lw'esichuliso sy'ohwibulwa hwa Herode. Herode yali aholere esidyalo sihoongo muno, niyehaase abaami bahuluundu nende abahuluundu baabasirikaari, alala nende abandu bahunuufu mu Galilaaya. 22Nae omuhaana wa Herodia niyeecha yahina, yasangaasa muno Herode alala nende abakeni bae; mani omutuki oyo yemao yaboolera omuhaana oyo ati, “Saba esiindu syoosi siwekoomba, mani njia ohuhusibeeresa.” 23Mani yeecha yechuba naboolera omuhaana oyo ati, “Buli siindu syoosi syochia ohusaba, njia ohuhubeeresa, kata sibe esituundu sy'obwaami bwaange.” 24Mani omuhaana oyo yeecha yaatula erwaanyi, yaacha yaboolera ng'ina ati, “Sabe siindu siina?” Nae ng'ina yamuboolera ati, “Saba omutwe kwa Yowaana Omubatiisi.” 25Mani abweene awo, omuhaana oyo yeruha bwaangu yakaluha eyiri omutuki oyo mani yamuboolera ati, “Ndaha wumberese bulaanu buno omutwe kwa Yowaana Omubatiisi hu lusaani.” 26Mani omutuki oyo yeecha yelalihirira muno; nae niyabaasa hu sichubo syae alala nende hu bakeni bae, siyadaha ohuhalaka biyali aboolere omuhaana oyo. 27Mani abweene awo, omutuki oyo yeecha yaatuma mulala hu basirikari baliindi, yamuhuutira ohuleeta omutwe kwa Yowaana. Mani omusirikari oyo yaacha yaatemaho omutwe kwa Yowaana naali mu mboyero, 28mani yaleeta omutwe okwo hu lusaani, mani yaakudiisa omuhaana oyo; omuhaana oyo nae yacha yaakudiisa ng'ina. 29Mani abeeki ba Yowaana nibawulira sino, beecha baabukula omubiri kwae, mani bakusiiha mu ng'ani. 30Olwoola, Abatume beemao bakobola eyiri Yesu, mani bamukaniayira ebiindu byoosi bi bali nibaholere handi nibekeese. 31Nae Yesu yababoolera ati, “Mutuleyo muche yi bandu bataali mube eyo mweng'ene, mani muwuluuheho budiidi.” Olwohuba abandu bangi bali bemeeda ohwiicha handi abandi nibawaao, nibihaire Abatume ohufuna kata obweyaango bw'ohulya. 32Mani beecha beengira mu lyaato, baasyabala bacha mu sifwo sibulamo abandu, baba eyo bong'ene. 33Bulaanu, abandu bangi beecha bababona, baabamanyirisa, mani beruhaho nibatula mu biko byoosi, mani beecha baabatangira ohwoolayo. 34Mani Yesu niyoola busa ati hu sikobero, yabona esidiyiha sihoongo nisimalire ohwebuusa, mani yeecha yabakwira esisa, olwohuba bali bali koti amakoondi kabulaho omwaayi; mani yachaaka ohubeekesa ebiindu biingi muno. 35Mani obwire nibweera, abeeki bae beecha yali baboola bati, “Esifwo sino sibulamo abandu, handi mbawo obwire buli ohwiira; 36Seebula abandu bano beenyohe, bache mu ngoongo nende mu byaalo by'aambi ano, banyale ohwekulira esy'ohulya.” 37Yesu nae yabakobolamo ati, “Eng'we mubaberese esy'ohulya.” Nae abeeki bae nabo bamuboolera bati, “Efwe huchie hukule emigaati ch'edinaari emia chibiri hubabeeresa balye?” 38Nae Yesu yababoolera ati, “Nang'we muliho nende emigaati chiinga? Muche mubaliire.” Mani nibamala ohubaliira, beecha bamuboolera bati, “Chiri emigaati chitaanu nende eng'eni chibiri.” 39Mani Yesu yemawo yaboolera abandu boosi ohwihala aasi hu bunyaasi bw'omuboka mu mikaanda. 40Mani abandu beecha beehala aasi, mu mikaanda ch'abandu emia ndala-ndala, handi abandi mu mikaanda cha amahumi kataanu-kataanu. 41Mani Yesu yabukula emigaati chitaanu echo nende eng'eni chibiri echo, yatingaala akulu Mukulu, yabibeeresa ehabi, yamekula-mekula emigaati echio, yamala yachidiisa abeeki bache bachiberese abandu; handi yamala yaakabira abandu boosi eng'eni chibiri echo. 42Mani abandu abo boosi balya beekuta. 43Beemao babuusa alala ebimweero ehumi-na-bibiri ebichuule ebidonye-donye byadoong'aho eby'emigaati nende eby'eng'eni. 44Mani abalya ebyohulya ebyo bali abasaacha elifu chitaanu enaamba. 45Abweene awo Yesu yaboola abeeki bae beengire mu lyaato bamutangirire ohusyaabala bakwe engereha w'enyaanja, mu Bbetisaida, omweene naasisebulaanga esidiyiha sy'abandu esyo. 46Mani Yesu niyamala ohubetusaho boosi, yemao yacha yaniina hu lugulu ohwekongooya Nasae. 47Nae obwire nibweera, elyaato ly'abeeki bae lyali limalire ohwoloberera ebusiba w'enyaanja, nae omweene nadong'ere yeng'ene engereha hu lukoongo. 48Yesu yemawo yabona ati abeeki bae abo bali bali ohunyahana muno ohufuka elyaato ohusuda, olwohuba omuyaka kwali nikuwucha nikutulira yibali nibachoomere. Nae nichali aambi w'esaa chine chesiro, Yesu yabonehana nakeenda hu maachi, niyeecha yibali. Yali adaha abitireho busa aambi nabo, 49nae nibabona naali ohukeenda hu maachi babaasa bati syali esihyeeno, mani bobba wuwi; 50olwohuba boosi bali bamubweene, mani nibakwiiremo oluteengo. Nae abweene awo, Yesu yalomaloma nabo naboola ati, “Mugume omwooyo, olwohubani neese mweene; mutatya.” 51Yesu yemao yengira mu lyaato mubali mani omuyaka kwaakama. Mani abeeki beecha bawuka muno, 52olwohuba sibali nibamanyire esy'amaya sy'emigaati chira, olwohuba emyooyo chaabwe chali chahahanyala. 53Mani nibali nibamalire ohusyaabala engereha, beecha boola hu lukoongo lwe Genesareeti, mani baboya elyaato lyaabwe awo. 54Nae nibatula busa bati mu lyaato, abandu bamanyirisa Yesu bwaangu, 55mani beeruha basasaanira mu ngoongo chisibiraane awo choosi, bachaaka ohuletaanga abalwaye hubutalihe bwaabwe, buli abundu woosi yibabechaanga bawuliire bati awo niyo yi Yesu yali. 56Mani buli abundu woosi yi Yesu yechaanga, kata mu ngoongo, ebiko bihuluundu, oba esyaalo, handi abandu baalisaanga abalwaye mu bifwo by'ebiito, mani nibamusabaanga bati badiirengeho busa kata hu kemo lye ngubo yae; nasitalomwa buli oyo yeesi owayidiirangaho, yawonerangao.

will be added

X\