MARIKO 5

1Yesu alala nende abeeki bae beecha boola engereha w'enyaanja ye Galilaaya mu syalo sye Geraasa. 2Mani Yesu niyatula busa ati mu lyaato, yaakanana nende omusaacha oliho omwooyo mubi, otula mung'uungu chibasihaangamo abandu. 3Omusaacha wuno yamenyaanga mu ng'ani chomung'ungu, handi yabulao omuundu yeesi owanyalaanga ohumuboya kata nende eminyororo; 4olwohuba yali naboywaangaho nende epiingo alala nende eminyororo nae eminyororo yachidonya-donyaangamo busa, nae epiingo nacho yachihalaka-halakangamo busa; handi abulao omuundu yeesi owali nende amaani k'ohumuyiingira. 5Esiro nende esideete, yali nang'abanaanga busa mu ng'ani chomung'ungu, nende hu ngulu niyehumusa-huumusa, handi niyenyubululira amakina. 6Mani niyabonera Yesu eyale, yeruha bwaangu yeecha yali yaamwiinamira; 7handi naalira nende ekono hoongo naboola ati, “Yesu Omwaana wa Nasae ow'Akulu Muno, onaahole otye? Hulirire mu liita lya Nasae endi, otasaandia haba!” 8Omusaacha wuno yaboola atyo olwohuba Yesu yali amuboolere ati, “Mwooyo mubi ewe, tula mu musaacha oyo!” 9Nae Yesu yamuteeba ati, “Eliita lyao nilyo naanu?” Nae oyo yakobolamu ati, “Eliita lyaange nilyo Legion; olwohuba huli bangi.” 10Mani omusaacha oyo yachiiririra ohwekweeda Yesu nende esinani ataberusa ohutula mu syalo esyo. 11Bulaanu aambi awo waliwo omukanda muhoongo kw'embiichi nikuli ohwayaanga hu ndulo w'esigulu; 12mani emyooyo mibi echo chekweeda Yesu nichiboola chiti, “Tutume huchie ena mbiichi echo, otufukiirire huchiingiremo.” 13Yesu yemawo yafukiirira emyooyo mibi echo, chatula mu musaacha oyo, mani chacha cheengira mu mbiichi. Omukaanda kw'embiichi okwo kwoosi, kwali kwoola aambi w'elifu chibiri enaamba, mani choosi chatimuha embiro chehirira hundulo w'esilugulu, chaweera mu nyaanja chasihama choosi. 14Abaayi b'embiichi beecha bosi beeruha basalaana, bacha mu siko sihoongo alala nende mu ngoongo chikabuhane basasaania emboosi echo. Mani abandu beeyiha ohuchia ohubona esyali nisiholehaane. 15Nae niboola eyiri Yesu, babona omusaacha wali niyechulaho emyooyo mibi niyehaale awo. Yali niyefwaalire engubo bulai handi elalu nilimuweereho, mani abandu abo boosi baatya muno. 16Mani abandu bali nibabweene ebikwireo, beecha bachaaka ohukaniayira abandi ebyali bikwiire hu musaacha waliho emyooyo mibi oyo, nende ebyakwa hu mbiichi. 17Abweene awo abandu beecha bekweeda Yesu atule mu syalo syaabwe. 18Nae Yesu niyali niyengira mu lyaato, omusaacha waliho emyooyo mibi yekweda Yesu ati amufukiirire ache nae. 19Nae Yesu yaahaya, yamuboolera ati, “Kaluha engo eyiri abandu bao, obaboolere ebiindu by'amaani bi Nasae ahuholeere, handi koti lw'ahukwiriire esisa.” 20Mani omusaacha oyo yeecha yaatula awo yacha yachaaka ohuyaala mu biko ehumi (Muluyonaani bati, Dekapooli) ebiindu byoosi bi Yesu yali amuholeere, mani abandu boosi bawuka muno. 21Yesu yemawo handi yasyaabala mu lyaato yacha engereha w'enyaanja. Nae niyoola eyo, handi esidiyiha sihoongo sy'abandu syeecha syamwebodohania. 22Abweene awo, mulala hu bemirisi bomu Sinagoogi, olaangwa ati Yayiro yeecha eyiri Yesu. Niyoola yabona Yesu, yamukwa mu makulu, 23yamwekweeda nende esibeera, naboola ati, “Omwaana wange muhaana muyere mulwaye muno, ali aambi nende ohufwa. Mani yicha omuteeho amahono kao, anyale ohuwona, abe omulamu.” 24Mani Yesu yeecha yacha nende Yayiro. Handi esidiyiha sy'abandu sihoongo syeecha syamulondaho mani syamwebungihaho. 25Musidiiyiha omwo mwalimo omuhasi wali nalwaala esihulukuto nisimumalireho emyaaka ehumi-na-chibiri. 26Yali asandire muno mu mahono kaabalesi bangi, nanyaasire buli mwaandu kuyali nakwo, nae haba saona daawe, ohutusaho obulwae bwemeeda busa. 27Omuhasi wuno yali yawulira efuma ya Yesu, mani yeyindikania mu sidiyiiha yoola enyuma wa Yesu, mani yadiira hu ngubo yae. 28Yahola atyo olwohuba omweene yali yeboolere mu mwooyo kwae ati, “Nindiiraho busa kata hu ngubo chae, mba njia ohuwona.” 29Mani niyamudiiraho busa ati, ni esihulukuto syakamirao; mani omuhasi yamala yewulira mu mubiri kwae ati bwadyeeri, obulwae bwae obwo bumalire ohuwona. 30Nae Yesu niyamanya ati, aliwo amaani akamutuliremo, abweene awo yakaluhaana emukoongo mu sidiyiiha yateeba ati, “Naanu odiirire hu ngubo yange?” 31Nae abeeki bae bamuboolera bati, “Oli ohubona koti esidiyiha siri ohuhuyindikania, handi oteeba oti, ‘Wiina owundiirireho?’ ” 32Nae Yesu yemeeda ohwewunja abone omuundu omudiirireho. 33Nae omuhasi oyo, koti luyali amanyire esyali simweholeheho, yeecha natiire handi nateengereha mani yaakwa aasi mu makulu ka Yesu, mani yamuboolera obwadyeeri bwoosi. 34Mani Yesu yeecha yamuboolera ati, “Muhana-ng'ene, efukiirira yao yihuwonisye; mani wao nende ehabi handi obulwaae bwao obwo buwonere elalira.” 35Nae Yesu niyali nasilomalomaanga, abandu bandi ohutula ewa Yayiro boola bamuboolera bati, “Omuhaana wao amalire ohufwa. Lwasiina osaandia Omweekesa handi?” 36Nae Yesu yahaya ohubideebaho bibali baboolere, Yesu yemao yaboolera omwimirisi wa Sinagoogi ati, “Otatya, fukiirira busa.” 37Mani Yesu siyafukiirira omuundu yeesi ohumuloondaho ohutusaho, Peetero nende Yakobbo nende Yowaana mwaanang'ina Yakobbo. 38Nae niboola mu daala ly'omwimirisi wa Sinagoogi, Yesu yabona abandu nibadoobanire, handi abalisi niboobba wuwi alala nende ohuchereenjesera akulu muno. 39Mani Yesu niyamala ohwingira mu nyumba, yaboolera abandu ati, “Lwasiina mudobaana alala nende ohulira? Omwaana wuno haba saafwiire, nae ali ohukona busa.” 40Nae abandu abo bamucheha busa. Nae yeecha yabatusa boosi erwaanyi, mani yabukula simwaana mwaana nende ng'ina alala nende bayali ali nabo, mani beengira bacha yi mwaana yali. 41Yesu niyoola, yadiira omuhono kw'omwaana oyo, yamusingisa naboola ati, “Talitha cumi” amahulundu mbwe, “mwaana muhaana ewe, huboolera endi, siingira weeme.” 42Nae abweene awo ni omuhaana oyo asingira yeema, achaaka ohukeenda (olwohuba yali yosa emyaaka ehumi-na-chibiri), mani abweene awo, abandu bawuka muno hulw'ebyo byoosi ebyali byeholehe. 43Nae Yesu yabahutira muno ati omuundu yeesi atamanyaho sino, mani yababoolera ohuberesaho omuhaana oyo esy'ohulya.

will be added

X\