MARIKO 4

1Yesu yacha hu lwaasi lw'enyaanja ye Galilaaya handi yachaaka ohweekesa. Mani esidiyiha sy'abandu sihoongo muno syeecha syamwebodohania, handi yengira yehala mu lyaato, nae esidiyiha esyo syadoong'a nisihaale aasi hu lwaasi lw'enyaanja. 2Mani Yesu yabeekesa ebiindu biingi muno niyehoonyera engaado. Nae niyaba nabekesa, yababoolera ati, 3“Mutekeerese bulai! Omuundu wundi yatula yacha ohuwaanya emwo. 4Niyali awaanya, emwo yindi yakwa hu ngira, mani amayoni keecha kayiboocha. 5Emwo yindi yakwa hu bikina-kina, ataali eloba liingi, mani bwaangu-bwaangu yamera, olwohuba siyali yisiihirwe aasi muno. 6Nae omubasu nikwafwa, emwo eyo yeecha yaakonga, mani yooma olwohuba yali siyayira emisi aasi muno. 7Emwo yindi yakwa mu mawa, mani amawa kayifwinyirira, mani yahaya ohwaamaho esiindu syoosi. 8Emwo yindi yakwa mu loba layi, mani yaama ebyaamo. Yahula, yakaliya, mani yaama ebyaamo, aandi amahumi kadatu, aandi amahumi kasasaba, handi aandi emia ndala.” 9Mani Yesu yaboola ati, “Oyo oli nende amatwi kawulira, leha awulire.” 10Nae Yesu niyali atulire eyiri esidiyiha, abandu bali nibadong'ere nae alala nende ehumi-na-babiri, beecha bamuteeba ebidiira hu ngaado. 11Nae Yesu yababoolera ati, “Eng'we neng'we ababeereswa ehabi y'ohumanya esyaama sy'Obwaami bwa Nasae, nae abandu b'erwaanyi, buli siindu siri busa mu ngaado; 12mani bacha ohwewunja bulai bweene nae bahaye ohubona; handi bawulire bulai bweene, nae bahaye ohumanya amahulundu keene; olwohuba banyala ohwefunaka mani baleherwamo.” 13Mani yemawo yabateeba ati, “Eng'we mwesi simumanyire amahulundu k'olukaado luno? Nae mucha ohumanya mutye amahulundu k'engaado chiindi choosi? 14Omuwaanyi niye owaanya emboosi ya Nasae. 15Abandu bawulira emboosi ya Nasae, nae bwaangu-bwaangu Sitaani niyeecha abamalamo emboosi yiba niyingiire mu myooyo chaabwe, abo nibo abafwana nende emwo yakwa hu ngira. 16Abandu bawulira emboosi ya Nasae, mani bwaangu-bwaangu bayidiira nende esangaalo, nibo abo abafwana nende emwo yakwa hu bikina-kina. 17Bano, sibaba bali nende emisi mireei, mani besimiirisaho hu lw'esiha sidiidi, nae ohusaanda oba ohunyaasibwa nihwoola hu lw'emboosi ya Nasae, bwaangu-bwaangu baebwaaba. 18Nae abandi nibo abawaanywa mu mawa. Abo nibo abawulira emboosi ya Nasae, 19nae ohwelalihirira hw'obulamu bw'omusyaalo muno, nende ohwekoomba hw'obuyiinda bw'omusyaalo, alala nende obwekoombi bw'ebiindu biindi, biingira mu myooyo chaabwe mani byafwinyirira emboosi ya Nasae, mani yahaya ohwaamaho esiindu syoosi. 20Nae abandi bafwaana koti emwo yawaanywa hu loba layi, abo nibo abawulira emboosi ya Nasae, bayifukiirira mani baama ebyaamo, aandi amahumi kadatu, aandi amahumi kasaba, handi aandi emia ndala.” 21Mani Yesu yemeeda ohuboola ati, “Mani etaara liretwanga mu nyumba ohufuunihwa mu simweero, oba ohuteebwa mu lwalo w'esitaanda, kose hu siteeni syalyo? 22Olwohuba abulao esiindu syoosi esyakiswa, esitacha ohukisulwa syamanyihana, handi abulao esiindu syoosi esyabwihwa esitalibwihulwa syabonehana alafu. 23Oyo yeesi oli nende amatwi kawulira leha awulire.” 24Mani Yesu yababoolera ati, “Mwehaliiriseenge ebyo bimuwulira. Esikero syoberesa owaasyo, nisyo syosi siwahafune, handi nende ohwongerwaho ebihira awo obuungi. 25Olwohuba, oyo oli nabyo achia ohwongerwa; nae oyo otaali nabyo, kata ebidiidi byali nabyo bacha ohubimumalaho.” 26Handi Yesu yeecha yababoolera ati, “Obwaami bwa Nasae bufwaanana koti omuundu yahawaanya emwo mu ndalo yae. 27Mani yakobola engo, esiro nisyoola niyekonera, obwire nibuhya, niyesingirira, nae emwo eyo yimera yahula, omweene natamanyireho engeri yiyimeramo handi yahula. 28Eloba lyeene nilyo elikera emwo yaamera handi yahula ohwoola luyiyangala. 29Nae ebyaamo nibyaangala, omuundu oyo atulaniramo bwaangu yachaaka ohukesa olwohuba ekesa liba lyoolere.” 30Handi Yesu yeecha yaboola ati, “Obwaami bwa Nasae hunabukeraanie hu siindu siina, oba hunabukaadire lukaado siina? 31Bufwaana nende olumwo lw'omutuumba, olwohuba ebiha by'ohulutaaka mu loba, nilwo oluhiramo obudiidi hu syalo; 32nae nilumalire ohutaakibwa, lumera lwahula, lwehola okusaala kuhiramo emisaala chiindi choosi, mani kwataaho amasaga mahoongo muno, yi mayoni kabburuha kanyala ohwombaha ebiswi, mu siiniha syakwo.” 33Yesu, yehonyera engaado nyiingi echifwaana chityo ohubayaalira emboosi ya Nasae. Yabekesaanga atyo hubanyale ohumanya bulai. 34Haba siyalomalomaanga nabo esiindu syoosi natehonyere olukaado, nae niyabechaanga yeng'ene nende abeeki bae, yabatumbuliraanga alafu buli siindu syoosi. 35Mani hu ludaalo lweene olwo engoloobe, yeecha yababoolera ati, “Mulehe husyaabale enyaanja huchie engereha.” 36Mani beemao baleha esidiyiha sy'abandu awo, beengira elyaato li yali yehaalemo, bamala bawaao. Amaato kandi kosi kali awo. 37Nibali nibasyaabala nibawao, omuyaka kw'amaani kweene kwasyuuha, mani amafwinda keeyiha kachaaka ohuubba hu lyaato libalimo ohwoola lu lyaato lyali aambi ohwichula. 38Nae Yesu yali ali mu numa naakona hu mabasi. Beecha bamusimusa nibaboola bati, “Omweekesa, huli ohusihirira naawe haba sodeeba?” 39Mani Yesu yemao yaasingira, yahabuhira omuyaka, handi yaboolera enyaanja ati, “Yenjeera! Okwalaale!” Mani omuyaka kweecha kwaakama, enyaanja yanyita chi! 40Yesu yeecha yabateeba ati, “Lwasiina mutya? Haba simuli nende efukiirira?” 41Mani bamala beechula obuti, bachaaka ohuteebana abeene-na-beene bati, “Wuno nae muundu siina yi muyaka nende amafwinda byosi biwulira?”

will be added

X\