MARIKO 3

1Yesu handi niyengira mu Sinagoogi, yakaanamo omusaacha wali nende omuhono kwafwa. 2Nae abandu bandi bachaaka ohumwehaliirisa babone nanamuwonia hu ludaalo lwa Sabbaato nibakiiya ohumudiisa omusango mbwe muholi w'ebiindu bitadahibwa. 3Nae Yesu yaboolera omusaacha w'omuhono kwafwa ati, “Yicha ano.” 4Mani Yesu yateeba abandu abo ati, “Sihoyera ohuhola esiindu silayi hu ludaalo lwa Sabbaato, kose esibi, ohuwonia obulamu, hu ludaalo lwa Sabbaato, kose ohwiita?” Nae boosi bawuleera busa. 5Nae Yesu yeecha yaanyoolera mani yabatingaala nende etima, olwohuba emyooyo chaabwe chali emyomeranu, mani yeecha yaboolera omusaacha oyo ati, “Kolola omuhono kwao okwo.” Mani omusaacha oyo yemao yaakukolola, kweecha kwawtonerao elalira. 6Nae Abafalisaayo nibabona batyo, basiingira batula erwaanyi, mani batulaniramo ohuwuliirisania nende abandu b'omukanda kwa Herode, koti lubanyala ohumusihirisa. 7Yesu alala nende abeeki bae beemao bewiira bacha hu lwaasi lw'enyaanja. Mani esidiyiha sy'abandu sihoongo ohutula e Galilaaya syabaloondaho, alala nende abandi ohutula mu Buyudaaya, 8e Yerusaalemu, Yidumea nende ohutula eyale ohubita engereha wa Yorudaani, nende ohutula aambi wa Tiro nende Sidoni. Handi esidiyiha siindi sihoongo syeecha ohweema hu fuma y'ebiindu bi Yesu yali naahola. 9Mani Yesu yaboolera abeeki bae bamutekehere elyaato esidiyiha siteecha syamufwiinyirira. 10olwohuba yali amalire ohuwonia abandu bangi, nae abandu bali nende endwaae chitaali nasilala bali nibasyeyindikania nibadaha bati bamudiireho busa. 11Mani buli lu myooyo mibi chamubonaanga, chakwichanga aasi mu makulu kae nichirira chiti, “Niiwe Omwaana wa Nasae.” 12Nae Yesu yakihutiraanga muno chitakera yamanyihana bwaangu. 13Abweene awo, Yesu yacha hu lugulu, mani yalaanga abo bayali nadaha; mani beecha yali. 14Mani yalobolamo ehumi-na-babiri, babecheenge nae, handi banyale ohutumwa nibacha ohuyaala, 15handi nende ohuba nende obunyala obw'ohwirusa emisaambwa: 16Simooni oyo yiyalanga Peetero; 17Yakobbo omusyaani wa Sebbedaayo nende Yowaana mwaanang'ina Yakobbo, oyo yiyalanga Bbowanarigesi, esyeekesa siti, abana b'ohwaduluhana ng'ekulu; 18Andereya, Filipo, Batulumaayo, Matayo, Tomasi, Yakobbo omusyaani wa Alufaayo, Tadeo, Simooni Omukanani, 19nende Yuda Yisikarioti, owamulyaamo olukwe. 20Mani Yesu yeecha yakobola engo. Nae handi esidiyiha sihoongo syeecha syebuusira yaali, mani syabakayira kata ohulya. 21Nae abanaluya bae nibawulira batyo, basiingira bacha ohumudiira, olwohuba abandu bandi bali baboola bati, “Abiyire omutwe.” 22Nae abekesa ba malako abatula e Yerusaalemu beecha baboola bati, “Nguyo aliho omusaambwa kulaangwa, Bbelesebbuli, handi yerusa emisaambwa nende obunyala bwa Bbelesebbuli omuhulundu w'emisaambwa.” 23Mani Yesu yamala yabalaanga beeche yali, mani nachaaka ohubakaadira engaado ati, “Sitaani anyala atye ohwirusa Sitaani waasye? 24Mani obutuki nibukabuhanamo bwachaaka ohulwaanakana obweene-no-bweene, obutuki obwo haba sibunyala bwayindira. 25Handi enyumba yoosi niyikabuhanamo mani yachaaka ohulwaanakana eyeene-ne-yeene, enyumba eyo haba siyinyala huyiindira. 26Nae nikali mbwe Sitaani bulaanu niye ochaakire ohwelwaania omweene, mbawo mani edaala lyae likabuhanemo, mani haba silinyala ohuyiindira, mbawo lyoolere ohusihirira. 27Nae abulao omuundu onyala yahalaka yengira mu nyumba y'omuundu w'amaani, yayaaya ebiindu byae, natataangire ohumuboya, hu yaanyala ohuyaaya enyumba yae bulai. 28“Mbaboolera obwadyeeri endi, abandu bacha ohuleherwamo ebibi byaabwe byoosi, alala nende ebyo byoosi bibalomaloma ebifwoola Nasae; 29nae oyo yeesi olomaloma ebifwoola Mwooyo Mwolerefu, haba saachia huleherwamo olwohuba aba aholere esibi sitawa” 30olwohuba abandu bali baboolere bati, “Yesu aliho omusambwa.” 31Mani ng'ina Yesu nende bamwaanang'ina bamala beecha. Nae nibali nibasyeemere erwaanyi, batumira Yesu emboosi, nibamulaanga bati yeeche yibali. 32Nae, esidiyiha sy'abandu syali sihaale nisimwebodohanie, syaboolera Yesu siti, “Mao nende ba mwaanamao bali erwaanyi, bahukoonya.” 33Nae Yesu yabakobolamo ati, “Mama nende bamwaanaama nibo abali yena?” 34Mani yatingaala hu bandu bali nibehaale nibamwebodohaanie, naboola ati, “Ba maama nende ba mwaanama mbano bali ano! 35Oyo yeesi ohola bi Nasae adaha, niye oba mwaanama, nende mboocho, nende maama.”

will be added

X\