MARIKO 2

1Oluunyuma lw'endaalo endiidi, Yesu yakobola e Kaperanaumu mani efuma yae yawulirihana yiti akaluhe ewaabwe. 2Abandu bangi bebuusa beechula ohwolera elalira hu mulyaango, wabulao esifwo sidoong'ere syoosi. Nae Yesu yali abayaalira Emboosi Ndai ya Nasae. 3Awo niwo yi basaacha bane boolera nibakiingire hu butalihe omusaacha wadataala, nibamuleetera. 4Nae nibabona bati sibanyala hwoola eyiri Yesu olw'esidiyiha sihoongo, baniina hu sirama sy'enyumba, basiikulamo esidomo, mani baabisiramo omulwaae oyo, yoola ali Yesu. 5Nae Yesu niyabona efukiirira yaabwe, yaboolera omulwaae oyo ati, “mwaana wange, ebibi byao bihuleherwemo.” 6Nae abekesa ba malako bandi abali nibehaale awo nibawulira batyo, bachaaka ohweteeba abeene-na-beene mu myooyo chaabwe bati, 7“Lwasiina omusaacha wuno alomaloma ati? Huno hufwola Nasae! Nasae yeng'ene niye onyala ohuleheramo ebibi!” 8Nae abweene awo, Yesu niyamanya mu mwooyo kwae ati abo bali ohweteebana abeene-na-beene, yeecha yababoolera ati, “Lwasiina muli ohweteeba mu myooyo cheeng'we mutyo? 9Siina syeene esihira obwangu, ohuboolera omudataafu oti, ‘Ebibi byao bihuleherwemo,’ kose, ohuboola oti, ‘Siingira, obukule obutalihe bwao, okeende’? 10Nae ohubeekesa ati, Omwaana w'Omuundu ali nende obunyala hu syalo obwohuleheramo ebibi,” yaboolera omudataafu oyo ati, 11“Huboolera endi, siingira, obukule obutalihe bwao, ochie engo!” 12Mani yasingira, yabukula bwaangu obutalihe bwae, yalaala yawaawo abandu boosi nibamubona. Mani boosi-boosi bawuka muno, bafumya Nasae nibaboola bati, “Sihubonaangaho esiindu sifwaana siti!” 13Yesu yatula awo handi yacha hu lwaasi lw'enyaanja. Niyali eyo, esidiyiha sy'abandu syoosi handi syeecha syamwebuusaho mani yachaaka ohubeekesa. 14Handi niyali nakeenda, yeecha yabona omutoosa w'omusolo, olaangwa Leefi, omusyaani wa Alufaayo, niyehaale mu nyumba yisoloserwamo omusolo, mani yamuboolera ati, “Noonde.” Mani yasingira yaamuloonda. 15Nae Yesu niyali naalya mu nyumba ya Leefi, abatoosa b'omusolo bangi nende abaholi b'ebibi beecha beehala balya nae alala nende abeeki bae; olwohuba abatoosa b'omusolo alala nende abaholi b'ebibi abali nibamuloondere bali abangi muno. 16Nae abekesa ba malako aba, Abafalisaayo, nibabona bati Yesu ali ohulya nende abaholi b'ebibi alala nende abatoosa b'omusolo, beecha baboolera abeeki bae bati, “Lwasiina oyo alya nende abatoosa b'omusolo alala nende abaholi b'ebibi?” 17Nae Yesu niyawulira esyo, yababoolera ati, “Abalamu haba sinibo abeenya omulesi, ohutusaho abalwae; Ese haba sindeecha ohulaanga abolerefu, nae ndeecha ohulaanga abaholi b'ebibi.” 18Olwoola, abeeki ba Yowaana alala nende Abafalisaayo nibali nibasiiba, abandu bandi beecha eyiri Yesu bamuteeba bati, “Lwasiina abeeki ba Yowaana nende abeeki b'Abafalisaayo basiiba, nae abeeki bao haba sibasiiba?” 19Nae Yesu yababoolera ati, “Mani sinyaliha abakeni bo hubugole ohuhaya ohulya, omweene bugole nasisiiri nabo? Ngandi haba! Omweene bugole nasisiiri nabo, haba sibanyala husiiba. 20Nae ebiha byahoole, omugole abatusibweho, awo nilwo lubahasiibe. 21Abulao omuundu yeesi onaba esiraka siyaaha hu ngubo ngofu; olwohuba naahola atyo, esiraka siyaaha siba sichia ohwehuuna sitaandule engubo ngofu eyo, mani obutanduhe buhongoye buhireho obwaliwo. 22Handi abulao omuundu yeesi ochuha efwiini njiaha musikiingiro sy'eseero sikofu; olwohuba naahola atyo, efwiini yiba yicha ohwaata eseero eryo; mani efwiini yinyasihe alala nende eseero lyeene; nae efwiini njiaha yihoyera eseero yaaha.” 23Yesu niyali nakeenda naabitira mu mikuunda ch'emere hu ludaalo lwa Sabbaato lundi, abeeki bae bachaaka ohuwakula emitwe ch'emere. 24Nae Abafalisaayo beecha bamuboolera bati, “Bonaho, lwasiina abo bali ohuhola esiindu sitafukiirirwa ohuholwa hu ludaalo lwa Sabbaato?” 25Nae Yesu yababoolera ati, “Eng'we musisiiri ohusomaho si Daudi yahola, nahayiswe handi enjala niyimuluma, alala nende abo bayali nabo: 26koti luyacha yengira mu nyumba ya Nasae, Abbiatari naali omulaamisi muhuluundu, mani yaalya emigaati chali chibereswe Nasae, echitafukiirirwa ohuliibwa nende omuundu yeesi ohutusaho abalaamisi bong'ene, handi yabukula yakabaaho abo bayali nabo?” 27Mani yeecha yababoolera ati, “Sabbaato yateebwao hulw'omuundu, nae omuundu haba saaliwo hulwa Sabbaato; 28Mani sakira, Omwaana w'Omuundu ali Omwaami wa Sabbaato yosi.”

will be added

X\