MARIKO 16

1Bulaanu oludaalo lwa Sabbaato nilwawa, Maria Magadaleena, nende Maria ng'ina Yakobbo alala nende Saalome, baleeta amafuta k'esiing'aari, nibadaha ohubaha omubiri kwa Yesu. 2Nae hu ludaalo lutaangira mu juma, echuli elyuuba hulitula liti, abahasi bano bawuuna ohuchia hu siriindwa. 3Bali nibateebana abeene-na-beene bati, “Wina onatutusireho ekina hu mulyaango kw'esiriindwa?” 4Nae niboola hu siriindwa, batingaala akulu babona okukina nikumalire ohusiindikiswa kwatula hu siriindwa--kwali okukina kuhoongo muno. 5Nae nibengira ng'ani bati, babona omusyaani muraaga owefwaalire ekaanju lya rachaari niyehaale hu muhono muluungi, mani beecha besinduha muno. 6Nae yababoolera ati, “Mutesiinduha haba; manyire endi muli ohukoonya Yesu owe Nasareeti owahomererwa hu musalabba. Asyuhiire, haba saali ano; mubone abundu yibamwalisa. 7Mani muche muboolere abeeki bae nende Peetero muti, abatangiriremo ohuchia e Galilaaya; eyo niyo yimucha ohumubonera, koti luyababoolera.” 8Mani batula erwaanyi, beeruha nibatula hu ng'ani; olwohuba obuti alala nende ohutengereha byali bibadiirire muno; mani haba sibabooleraho omuundu yeesi esiindu syoosi, olwohuba bali batiire muno. 9Nae niyasyuuha, oludaalo lutaangira mu juma, yataangira ohubonehera Maria Magadaleena, yiyali yerusamo emisaambwa chitaanu-na-chibiri. 10Mani Maria Magadaleena wuno yacha yaboolera abaloondi bae abali nibalira handi nibesisiha muno. 11Nae nibawulira bati, Yesu mulamu, handi omuhasi wuno amalire ohumubonaho, haba sibasifukiirira. 12Lunyuma, Yesu yabonehera abeeki bae babiri mu ngeri yindi nibali nibakeenda nibacha mulukoongo lundi. 13Mani bano bakaluhayo baboolera abadong'ereyo, nae bahaya ohufukiirira ebyaabwe. 14Muhumaliiriha, Yesu yabonehera abeeki bae ehumi-na-mulala nibali humeesa nibalya; yaboolobya muno olwobutafukiirira bwaabwe alala nende ohuba n'emyooyo myomeranu, olwohuba bali bahayire ohufukiirira eby'abo abali nibamubweene naamalire ohusyuuha. 15Mani yababoolera ati, “Muche mu syalo syoosi, mani muyaale Emboosi Ndai, eyiri ebiloonge byoosi. 16Oyo ofukiirira, handi yabatiisibwa, achia ohuwonisibwa; nae oyo otafukiirira, omusango kucha ohumuhira. 17Mani buno nibwo obulolero bucha ohuba nende abo abafukiiririra: muliita lyaange, bacha ohwirusa emisaambwa; bacha ohulomaloma enimi njiaha; 18bacha ohudiira enjuha mu mahono kaabwe, handi nibang'wa obutwa bw'amaani, sibuchia ohubahola bubi; bacha ohwisa amahono kaabwe hu balwaaye, mani baone.” 19Nae Omwaami Yesu, niyamala ohulomaloma nabo, yayirwa Mukulu, mani yehala hu muhono muluungi kwa Nasae. 20Nae abeeki bae, bacha mani bayaala Emboosi Ndai buli abundu, nae Omwaami yaba naaholera alala nabo, nga yomiisa emboosi chaabwe nende obulolero busiira emboosi echo. Amiina.

will be added

X\