MARIKO 15

1Mani nibwahya buti, abalaamisi bahuluundu, nende abahuluundu b'ebiha nende abandiiki ba malako, nende ab'esiina boosi beehasa oluhiiho lw'ohweteebanaho; mani beecha baboya Yesu, bamutusa awo bamuyira ohumudiisa Pilaato. 2Nae Pilaato yateeba Yesu ati, “Ewe niiwe omutuki w'Abayudaaya?” Nae Yesu yamukobolamo ati, “Mbao niiwe oboolere otyo.” 3Mani abalaamisi bahuluundu beecha bamufunaana ebiindu ebiingi muno. 4Pilaato handi yeecha yateeba Yesu ati, “Ewe obulaho esiindu syoosi esy'ohukobolamo? Bonaho obuungi bw'emisaango chibahufunaana.” 5Nae Yesu haba siyakobolamo esiindu syoosi, sino syakera Pilaato yawuka muno. 6Bulaanu hubuli sidyaalo sya Paasaka, Pilaato yali yanala ohulehuuliraanga abandu omuboye yeesi yibaba nibamusabire. 7Nae hu bataana abali mu mboye, abali bahola omusango okw'obutemo muhusasakala, mwalimo omusaacha wundi olaangwa, Bbarabba. 8Mani esidiyiha syeecha eyiri Pilaato ohumusaba abaholere koti luyali yanala ohubaholeraanga. 9Nae Pilaato yeecha yabateeba ati, “Mudaha mbalehuulire Omutuki w'Abayudaaya?” 10Olwohuba Pilaato yali amanyire ati, ehali-hali ly'abalaamisi bahuluundu nilyo elyakera bamudiisa Yesu. 11Nae abalaamisi bahuluundu, beecha badondobania esidiyiha sy'abandu sisabe Pilaato amale kabalehulira Bbarabba busa. 12Nae Pilaato handi yeecha yabateeba ati, “Nae ndaahole endye omusaacha wuno yimulaanga muti Omutuki w'Abayudaaya?” 13Nae abandu boosi bahuumulira akulu bati, “Mumuhomerere.” 14Nae Pilaato yababoolera ati, “Lwasiina, sibi siina syaholere?” Nae bemeeda busa ohuhuumula nibaboola bati, “Mumuhomerere.” 15Nae ohudaha ohubasangaasa, Pilaato yabalehulira Bbarabba; nae nibamala ohutoocha Yesu, Pilaato yeecha yabadiisa Yesu bache bamuhomerere. 16Mani abasirikaari beecha bayira Yesu mu lubiri (olulaangwa luti Praetorium); mani beecha balaanga omukanda kw'Abasirikaari kwoosi ohwebuusa alala. 17Mani beecha bamufwaasa ekaanju ly'omudoba kwa ranjaayi, basiinga engata ya amawa, bamufwaasa hu mutwe koti esitweetwe. 18Mani bachaaka ohumuheesa nibaboola bati, “Yoga, Omutuki w'Abayudaaya!” 19Mani bamuhuya hu mutwe nende ekada, bamufuchaho amate, mani basigama nibamwiinamira. 20Nae nibamala ohumuhoomolera, bamufwaalulamo ekaanju ly'omudoba kwa ranjaayi, mani bamufwaasa engubo cheene. Mani bamuyira erwaanyi ohumuhomerera. 21Mani babukaanana nende omusaacha wali nakeenda busa owali atula mu lukoongo lundi, olaangwa Simooni ow'Esireeni, simwaana Alekisaanda nende Rufusi, mani bamuyiika ohukinga omusalabba kwa Yesu. 22Mani bamuleeta bamwoosa abundu yibalaanga bati, Gologoosa (Amahulundu kasyo mbwe, Esifwo sy'ebiyaanga). 23Mani beecha bamubeeresa efwiini yibasasiremo ekaha; nae yahaya ohuying'wa. 24Mani bamala bamuhomerera, bamala bakabana engubo chae, nibachubbiraho eha, ohumanya sibuli muundu ayira. 25Mani nibamuhomerera hu musalabba esaa y'ohudatu. 26Nae esyandiiko sy'esifune simufwaambya syasoma siti, “Omutuki wa Abayudaaya.” 27Nae abweene awo wosi bahomererawo abeebi babiri alala nende Yesu, mulala hu muhono kwae muluungi, owundi hu muhono kwae mukooda. 29Nae abandu bali nibabitao, bawuka busa, bayuuya emitwe nibaboola bati, “Mbao! Ewe owahalikule enyumba ya Nasae handi wayombahira mu ndaalo chidatu, 30wewonie omweene, handi yiha aasi ohutula hu musalabba!” 31Nilwo nasilala lu Balaamisi bahuluundu alala nende Abandiiki ba malako lu bamuhoomolera nibaboola bati, “Yawonia abandi; nae omweene haba saanyala ohwewonia. 32Leha Kristo, Omutuki w'Abayisirayiri, bulaanu yeehe hu musalabba hubone huhufukiirire.” Kata abo abali bahomereerwe nae bosi bamuhoomolera. 33Nae esaa y'ohusaasaba niyoola, esirima syadiira hu syalo syoosi ohwoola esaa y'ohutaanu-na-hane. 34Nae hu saa y'ohutaanu-na-hane, Yesu yalira nende ekono ly'akulu ati, “Eli, Eli, lama sabach-thani?” amahulundu mbwe, “Nasae wange, Nasae wange, lwasiina wunjwang'ire?” 35Nae abandu bandi abali beemere awo, nibawulira batyo, baboola bati, “Bone, mbawo alaanga Elija.” 36Mani mulala yeruha yabukula esyaangu yasiiniha mu fwini yahaliha, yaasita hu kada, mani yaamubeeresa ohung'wa naboola ati, “Muliindeho, lehe hubone Elija naneeche yamwanula hu musalabba.” 37Nae Yesu yahuumula mu kono ly'akulu naalira mani yakwisa omwooyo. 38Nae engubo y'omunyumba ya Nasae yataanduha akati, ohutula akulu ohwoola aasi. 39Nae omusirikaari muhunuufu, owali yeemere namutingaalire, niyabona ati akwisire omwooyo atyo, yaboola ati, “Mubwadyeeri, wuno abeere Omwaana wa Nasae! ” 40Abahasi bandi bosi bali awo nibabonera eyale, mwabo nimwo omwali, Maria Magadaleena, nende Maria ng'ina Yakobbo muyere nende Yosesi, nende Saalome, 41abali abaloondi bae handi abamuhalabaniraanga nasisiiri e Galilaaya; handi nende abahasi bandi bangi bosi abecha nae e Yerusaalemu. 42Nae obwire nibweera, koti lwali oludaalo lw'Ohwetekeheramo, luno nilwo oludaalo lutaangirira Sabbaato, 43Yosefu owe Arimaseya, yi bandu bali nibaberesa oluyaali mu siina, handi yesi owali naliindiriire Obwaami bwa Nasae, yenyiira mani yacha eyiri Pilaato yaamusaba omubiri kwa Yesu. 44Nae Pilaato yesinduha muno ohuwulira ati, Yesu amalire ohufwa, mani yalaanga omuhulundu wa basirikaari yamuteeba nibuli obwadyeeri mbwe Yesu amalire ohufwa. 45Nae omuhulundu wa basirikaari niyaboolera Pilaato ati, Yesu amalire ohufwa, yafukiirira Yosefu ohuyira omubiri kwa Yesu. 46Mani Yosefu yakula esuuka lafu, yawanula omubiri kwa Yesu, yaakuboya mu suuka lafu elyo, mani yaakuta mu ng'ani yibali babaachire mu lwaanda; mani yaasindikisa okukina kuhoongo, yaakwikalira hu ng'ani. 47Maria Magadaleena nende Maria ng'ina Yosesi babona bulai yibasiiha Yesu.

will be added

X\