MARIKO 14

1Bulaanu chali chidong'ere endaalo chibiri ohwoola hu Paasaka nende esidyalo sy'emigaati kitaalimo amamera. Mani abalaamisi bahuluundu alala nende abandiiki ba malako bachaaka ohukoonya engira y'ohumudiira mungiso bamale bamwiite; 2olwohuba bali baboolere bati, “Sisilai ohumudiirira hu sidyaalo, olwohuba abandu banyala ohukwaamo esisi.” 3Nae niyali ali e Bbetani mu nyumba ya Simooni owali yalwaalaho obulwaae bw'amakere, niyehaale naali ohulya, omuhasi wundi yeecha nende echupa ya mafuta k'esiing'aari siingi, ak'obukusi bwa akulu muno, mani yekula echupa ya amafuta eyo, yamala yakachuha hu mutwe kwa Yesu. 4Nae baliwo abandu bandi ababoolana abeene-na-beene bati, “Lwasiina anyaasa amafuta ako atyo? 5Olwohuba amafuta kano kanyala ohukuswamo edinaari chihira emia chidatu mani eseende echo baachibeeresa abamanani.” Mani beecha baasoolania omuhasi oyo muno. 6Nae Yesu yababoolera ati, “Mulehe omuhasi oyo abe; Siina syeene simumufwaambya? Yaholeere esiindu silayi muno. 7Olwohuba buli siha syoosi muli nende abamanani, mani munyala ohubaholera ebilai buli siha simudahiramo; nae simuchia ohuba naange esiha syoosi. 8Omuhasi oyo yaholeere syabeere anyala; abahiire elalira omubiri kwaange amafuta ohukutekehera ohusiihwa. 9Nae mbaboolera obwadyeeri endi, buli abundu woosi yi Mboosi Ndai yahayaalirwe mu syalo syoosi, esiindu siyaholeere sino, bacha ohusilomalomaho nibamwichulisa.” 10Mani abweene awo, mulala hu beeki ehumi nende babiri olaangwa ati, Yuda Yiskarioti, yacha eyiri abalaamisi bahuluundu, nakoonya engeri y'ohuliiramo Yesu olukwe. 11Nae nibawulira batyo, beecha basangaala muno mani balaka ohumuba eseende. Mani yachaaka ohukoonya engeri y'ohumulyaamo olukwe. 12Oludaalo lutaangira olw'esidyalo sy'emigaati kitaalimo amamera, oludaalo lubeteraangaho ekoondi ly'esidyaalo sya Paasaka, abeeki bae beecha bamuboolera bati, “Odaha huchie huhutekehere ena yonaliira esidyaalo sya Paasaka?” 13Mani yeecha yaatuma abeeki bae babiri nababoolera ati, “Muche mu siko, mani mucha ohubukaanana nende omusaacha okiingire esyoongo ya maachi; mani mumuloonde, 14mani muboolere omweene nyumba yiyengiramo muti, ‘Omweekesa aboola ati, esiseenge siwundekeheere ohuliiramo esidyalo sya Paasaka alala nende abeeki bange, siri yena?’ 15Mani achia ohubeekesa esiseenge syaakulu sihoongo esitekeheebwe bulai; omwo nimwo mumuba mututekehere.” 16Mani abeeki abo batulaniramo bacha mu siko, mani banyoola buli siindu koti lu yali nababoolera; mani bachaaka ohutekeha esidyaalo sya Paasaka. 17Mani obwire nibweera, Yesu yeecha nende abeeki bae ehumi nende babiri. 18Nae nibali hu meesa nibalya, Yesu yababoola ati, “Mbaboolera obwadyeeri endi, mulala hw'eng'we, oyo oli ohulya naange, achia ohudyaamo olukwe.” 19Mani bachaaka ohwelalihirira, bachaaka ohumuteeba sya mulala-mulala bati, “Niye ese, kose?” 20Nae yababoolera ati, “Niye mulala hu ehumi nende babiri, oyo oli ohutoonga naange mu sikae silala. 21Olwohuba Omwaana w'Omuundu awao koti lu syandiikwa, nae chakaanire oyo olya mu mwaana w'Omuundu olukwe! Syahahirire omuundu oyo obuteebulwa.” 22Nae nibali nibalya, Yesu yabukula omugaati, yakusabira ehabi, mani yaakudonyolamo, mani yababeeresa, naboola ati, “Mubukule; kuno nikwo omubiri kwaange.” 23Handi yabukula esikoombe, nae niyamala ohwebasa, yasiberesa abeeki bae, mani boosi baasing'waaho. 24Mani yababoolera ati, “Kano niko amabaanga kange ake elakano, akediswa hulw'abandu bangi. 25Mbaboolera obwadyeeri endi, sinja ohung'waaho handi hu syaamo sy'emisabbiibu ohwoola hu ludaalo lundahasing'weereho buyaaha mu Bwaami bwa Nasae.” 26Nae nibamala ohweemba olweembo, batula bacha hu lugulu lwa Olibeti. 27Mani Yesu yababoolera ati, “Mweesi mucha ohundulaho; olwohuba syandiikwa siti, ‘Ndahahuye omwaayi, mani amakoondi kahasalaane.’ 28Nae nindahamale ohusyuuha, ndahabataangirire ohuchia e Galilaaya.” 29Nae Peetero yamuboolera ati, “Kata boosi bahulehe, ese haba sinja ohuhuleha.” 30Nae Yesu yamuboolera ati, “Huboolera obwadyeeri endi, mu siro sy'olwaleero syeene sino, edaaywa niyisisiiri ohuholyoohera habiri, onaba omalire ohundekaana amahabi kadatu.” 31Nae Peetero yakobolamo nende esimyeni ati, “Kata nende nihuli ohufwa, ndafwa naawe, haba sinja ohuhwekaana.” Mani boosi baboola nasilala batyo. 32Mani beecha bacha abundu alaangwa ati, Getesemaane; Yesu yaboolera abeeki bae ati, “Mwihale ano, ese hole nindekongooya.” 33Mani yeecha yabukula Peetero nende Yakobbo, nende Yowaana yacha nabo, mani engisa nyiingi yamudiira yachaaka ohwelalihirira muno. 34Yesu yeecha handi yababoolera ati, “Ndi nende esibeera esiingi muno, esinyala kata ohunjita-bwiita; mudong'e ano mani mube ameeso.” 35Mani niyamala atyo, yasudaho mu moni budiidi, yakwa aasi yekongooya naboola ati, siba nisinyaliha, esiha sy'ohusaanda sino syahambitireho. 36Mani yamala yaboola ati, “Abba, Lata, Ewe niiwe omunyala w'ebiindu byoosi; nduseho esikoombe sino; nae sitaba koti lu ese ndaha, nae hasibe koti lu ewe mweene odaha.” 37Mani yeecha handi yabakaana nibakona, mani yaboolera Peetero ati, “Simooni, wesi oli ohukona? Sonyalaho ohuba ameeso kata esaa ndala? 38Mube ameeso mani mwekongooye muhaye ohukwa muhuhemwa; omwooyo kweene kudaha, nae omubiri nikwo omukata.” 39Handi Yesu yeecha yaatula awo yacha ohwekongooya, naalomaloma emboosi nasilala echo. 40Yesu handi yeecha yakobola yabanyoola nibakona, olwohuba emoni chaabwe chali chichuule muno endoolo; mani bakotwa esyohumukobolamo. 41Yesu handi yeecha yakobola ehabi lyohudatu, mani yababoolera ati, “Musikona busa nimuwuluha? Esyo simalire; esiha syahoola; Omwaana w'Omuundu alibwemo olukwe, adiiswe mu mahono kaabaholi be bibi. 42Musiingire, mani huweo; bone, ochia ohudyaamo olukwe nguno yolere.” 43Mani abweene awo, Yesu niyali asilomaloma, mulala hu beeki ehumi nende babiri olaangwa ati Yuda, yeecha nende esidiyiha sy'abandu nibali nende engaanga nende ebiruga, nibatula eyiri abalaamisi bahuluundu nende abandiiki ba malako alala nende abahuluundu ba ebiha. 44Nae omuhobi oyo yali amalire ohubabeeresa esilolero, naboola ati, “Oyo yinja ohukwa mu sirifu niye oyo busa; mani mu mudiire, mumwomiise bilai mani mumuyire.” 45Mani omuhobi oyo niyeecha, yachooma tiiri eyiri Yesu, yaboola ati, “Omwaami!” Mani yaamukwa mu sirifu yaamuheesa. 46Mani beecha bamukwaaho bamudiira. 47Nae mulala hu bandu bali beemere aambi awo yasobolayo olugaanga lwae, mani yatemaho ohutwi hu muhalaabani w'omulaamisi muhuluundu. 48Nae Yesu yeecha yababoolera ati, “Mwiichire nende engaanga alala nende ebiruga ohundiira koti abechera omunyaka? 49Buli ludaalo ndabereenge naang'we ninjekesa mu nyumba ya Nasae, nae mwahaya ohudiira. Nae lehe ebyandiikibwa byolerefu byolerere.” 50Mani boosi bamuleha, beeruha. 51Mani omusyaani muraaga yaloonda hu Yesu natefwaalire esiindu syoosi hu mubiri ohutusaho niyeboyere efuungo yong'ene; mani beecha bamukwaaho, 52nae yeecha yabechimulaho, yabalehera efuungo eyo, yeruha nawawo syekenye. 53Mani beecha bayira Yesu eyiri omulaamisi muhuluundu mweene; mani abalaamisi bandi bahuluundu nende abahuluundu b'ebiha alala nende abandiiki ba malako beecha boosi bebuusa. 54Nae Peetero owali alondeere eyale hu Yesu, ohwolera elalira mu lwanyi lw'omulaamisi muhuluundu mweene; yali yehaale nende abaliindi, niyoota omuliro. 55Bulaanu abalaamisi bahuluundu alala nende ab'esiina boosi bateeberesa esifune syeene sinyala syakera beeta Yesu; nae bahaya kata ohusinyoola. 56Olwohuba abandu bangi beecha batusa obufune bwobubacha hu Yesu, nae ebifune byaabwe ebyo byahaya ohufwaanana. 57Handi abandu bandi basiingira batusa obufune bw'obubacha nibaboola bati, 58“Hwawulira wuno naboola ati, ‘Njia ohugemula enyumba ya Nasae yino eyombahwa nende amahono, nae mu ndaalo chidatu, njia ohwombaha eyiindi, eyitombahwa nende amahono.’ ” 59Kata katyo, abulao obufune bwaabwe obwanyala ohufwaanana. 60Mani omulaamisi muhuluundu mweene yasingira yeema akati-kaati waabwe, yateeba Yesu ati, “Obulaho esiindu syoosi syonyala wakaluhamo? Sifune siina syeene si bano bali ohuhufunaana?” 61Nae Yesu yawuleera busa yahaya ohukaluhamo esiindu syoosi. Handi omulaamisi muhuluundu mweene yeecha yateeba Yesu ati, “Niiwe Kristo, Omwaana wa Nasae w'Ehabi?” 62Nae Yesu yaboola ati, “Nise; handi wahabone Omwaana w'Omuundu niyehaale hu muhono muluungi okwa Nasae wobunyala bwoosi, handi niyeechera hu maleesi komu Kulu.” 63Nae omulaamisi muhuluundu mweene yeecha yataandula engubo chae, naboola ati, “Lwasiina handi husikoonyeresa obufune bundi? 64Mbao mwewuliirire enomanoma yae eyifwoola Nasae eyo. Nang'we muheengao mutye?” Mani boosi beecha bamuheengera omusango bati ahoyeere ohufwa. 65Mani abandi bachaaka ohumufuchaho amate, bamuboya mu moni, mani bamupaama, nibaboola bati, “Mani tuumbulaho!” Mani Abasirikaari bamudiira bachaaka ohumuhuya ebifuusi. 66Nae Peetero niyali nasisiiri mulwaanyi aasi, mulala hu bahalaabani bahaana b'omulaamisi muhuluundu mweene yeecha; 67mani yabona Peetero niyoota omuliro, yamwehaliirisa, mani yamuboolera ati, “Ewe wesi obeere nende Yesu Omunasareeti.” 68Nae Peetero yekaana, naboola ati, “Ese siwumao siimanyire kata ngoterwe syoliho.” Mani yasingira yaatula erwaanyi yeema husiruwa. 69Handi omuhalaabani muhaana yeecha yamubona mani yaboolera abandu bali nibeemere awo ati, “Omusaacha wuno niye mulala hu bandu abo.” 70Peetero handi yekaana. Nae ebiha bidiidi nibyabitao, abandu bali nibeemere awo, handi bosi baboolera Peetero bati, “Mubwadyeeri bweene, ewe oli mulala hu bandu abo busa; olwohuba oli Omugalilaaya.” 71Mani Peetero yachaaka ohwebwaaba alala nende ohwechuba ati, “Ese siimanyire omusaacha wuno yimuli ohulomalomaho.” 72Abweene awo, ni edaaywa yiholyooha ehabi lyohubiri. Mani Peetero niyechulisa koti Yesu yali amuboolere ati, “Edaaywa niyitaholyoohera habiri, onaba wundekaanire hadatu.” Mani yatunduha yaalira muno.

will be added

X\