MARIKO 13

1Mani niyali hwatula busa ati mu nyumba ya amalaamo, mulala hu beeki bae yeecha yamuboolera ati, “Omweekesa, bonaho esiroonyo sy'amakina nende esiroonyo sy'ebyombahe!” 2Nae Yesu yamuboolera ati, “Ewe mani oli ohubona ebyombahe bihunuufu bino? Sibichia hudoong'a ekina lala nirihaale hu liindi, elitahasukuunwe aasi.” 3Nae Yesu niyali niyehaale hu lugulu olulaangwa luti Olibeti niyewunjire enyumba ya amalaamo, Peetero nende Yakobbo alala nende Yowaana nende Andereya beecha bamuteeba mungiso bati, 4“Tuboolereho, lu bino bicha ohwehola, handi halolero siina ahacha ohubaao lu bino byoosi bicha ohubeerao?” 5Nae Yesu yeecha yababoolera ati, “Mweliinde omuundu yeesi atanyala ohubahyaamya. 6Abandu abangi bacha ohwichaanga mu liita lyaange, nibaboola bati, ‘Ese neese oyo mweene!’ mani bacha ohukosa abandu bangi. 7Handi nimuwuliraanga efuma ya maye alala nende embaha yidiira hu maye eyitaali eyadyeeri, mutasanguluhaanga; olwohuba bino bihoyeere ohukwaao, nae enjakamo yiba niyisisiiri ohwoola. 8Olwohuba ebyaalo bicha ohusiingisa eye hu byaalo biindi, handi obwaami bwosi hu bwaami bundi; ohutungereha hw'esyaalo hucha ohubaao mu bifwo bitaali nasilala, enjala yosi yicha ohukwaao; nae bino byoosi bicha ohuba busa enjaako y'obuchuuni bw'engasi chohwibula. 9“Nae mweliinde abeene; olwohuba bacha ohubayira mweeme mu biina; handi bahabahuyire mu mayumba ka amalaamo k'Abayudaaya; handi mwaheeme mu moni wa ba Gafana nende echa abatuki hu lwaange, ohuberesa obuloli mu moni waabwe. 10Nae Emboosi Ndai yiri n'ohuyaalwa mu syalo syoosi. 11Nae nibabaletaanga ohuyaaswa handi nibabadisaanga mu mahono kaabwe, muteyendehereraanga nimweteeba muti hunaboole siina; nae muboole busa bimuba muli nabyo ebiha ebyo, olwohuba haba sineeng'we abacha ohulomalomaanga, ohutusaho Mwooyo Mwolerefu oli mweng'we niye achia ohulomalomaanga. 12Handi mwaanang'ina muundu mweene niye ochia ohumuwaayo bamwiite; 13handi abandu boosi bacha ohuhusyuula hu lw'eliita lyaange. Nae oyo owesimiirisa ohwoola hu njakamo niye ochia ohuwonisibwa. 14“Nae nobonaanga esiindu sibi muno nisyolere yisitahoyeere ohuba, (leha omusomi amanye amahulundu), mani mulehe abo abali mu Buyudaaya beeruhire mu ngulu; 15oyo oli hu sirama sy'enyumba ateeha aasi, kata atengiraho mu nyumba yae, yatusamo esiindu syoosi; 16handi oyo oli mu ndalo atakaluhaanga mungo ohubukula ebyefwalo byae. 17Nae chibakaanire abo abali asito nende abo abahabe nibanuunia mu ndaalo echo! 18Mwekongooye ebyo bitabao mu ndaalo ch'efula. 19Olwohuba mu ndaalo echo, mucha ohubaamo ebinyaaso bitabechaangao hooho ohutula muhuchaaka hw'esyaalo si Nasae yaloonga ohwoola buti, handi haba sibyahabeeo handi endaalo choosi. 20Nae Nasae aba nataduduyaho endaalo, awumawo omuundu yeesi owahaonere; nae hu lw'abo ba Nasae yadoola, yaduduya endaalo echo. 21Nae, omuundu yeesi nahuboolera ati, ‘Bone, nga Kristo nguno ano!’ kose ati, ‘Bone, ngula ali ala!’ Otasifukiiriraanga. 22Olwohuba ba Kristo bobubacha nende ba nabbi bobubacha bacha ohwiicha beekese abyohuboneraho nende ebiwukisa, ohukosa abadoole ba Nasae nisiba nisinyaliha. 23Nae mweliinde; olwohuba mbaboleere ebiindu bino byoosi nibisisiiri ohwoola. 24“Nae mu ndaalo echo, ebinyaaso ebyo nibiweere, eryuuba licha ohwirima, handi omwoosi kwosi haba sikuchia ohwaaduha, 25handi eng'ining'ini chicha ohukwa nichitula akulu, handi amaani ko Mukulu kacha ohudengaanisibwa. 26Mani bacha ohubona Omwaana w'Omuundu niyeechera mu maleesi nende amaani alala nende oluyaali. 27Mani achia ohutuma ba Malaika, mani bache bahung'aanie alala abadoole bae ohutula hu mbeka chine ch'esyaalo, ohutula hu njakamo y'esyaalo, ohwoola hu njakamo y'ekulu. 28“Leha mubonere hu mutuli: nimubona nikutusa amasaafu madoto kuti, nimumanya muti, endaalo ch'esiminyu chiri aambi ohwoola. 29Mani sakira, nimubona ebiindu bino nibyeholeha, mumanye muti ali aambi, ali busa husiruwa bweene. 30Mbaboolera obwadyeeri endi, oluse luno haba siluchia huwaao, ebiindu bino nibiteholeha. 31Ekulu nende esyaalo bicha ohuwaao, nae mboosi change haba sichicha huwaao. 32“Nae oludaalo lweene olwo, kata ebiha byeene, awumao omuundu yeesi omanyire, kata ba Malaika bo Mukulu, kata Omwaana, nae ohutusaho Bbaabba yeng'ene. 33Mweliinde, mube ameeso; olwohuba haba simumanyire lu biha byahoolere. 34Siri koti omuundu ochia hu lukeendo lw'eyale, naaba natula mu ngo, aberesa abahalaabani bae obunyala, buli otula nende omulimo kwae, mani yaboolera omuliindi w'ohusiruwa abe ameeso. 35Sakira mweliinde--olwohuba haba simumanyire lu mweneengo achia ohwichira, kose engoloobe, kose mu siro akati-kaati, kose mu mabweeri-bweeri, kose mu chuli-chuli. 36Ataali awo, anyala ohwiicha mabbwooga, mani yabakaana nibasiikona. 37Mani bimbaboolera eng'we, mbiboolera abandu boosi endi: Mube, ameeso.”

will be added

X\