MARIKO 10

1Yesu yeecha yaatula awo, yacha mu syalo sya Buyudaaya mani yaambuha omwaalo kwa Yorudaani, handi esidiyiha syeecha syamwebodohaniaho; nae koti luyali yanala ohuhola, yachaaka ohubeekesa handi. 2Nae Abafalisaayo beecha yali, bamuteeba nibamuhema bati, “Sifukiirirwa omusaacha ohwirusa omuhasi wae?” 3Yesu yabakobolamo ati, “Musa yabalagira siina syeene?” 4Nabo baboola bati, “Musa yafukiirira omusaacha ohwandiika ebbarwa y'ohwirusa omuhasi, mani yamwemaliraho elalira.” 5Nae Yesu yababoolera ati, “Musa yabaandiikira atyo ohweema hu buwangalafu bw'emyooyo cheeng'we. 6Nae ohutula hu huloongwa hw'esyaalo, ‘Nasae yahola bombi, omusaacha nende omuhasi.’ 7‘Mani hulw'esifune sino, omusaacha achia ohulehaanga simwaana nende ng'ina mani amale yaambanisibwe nende omuhasi wae, 8mani bombi beehole omubiri mulala. Bulaanu sibaba basisiiri babiri, nae bali omubiri mulala.’ 9Sakira, esyo si Nasae yamala ohuwambaania alala, omuundu yeesi atasikabuhanianga.” 10Nae nibali mu nyumba, abeeki bae handi bamuteeba ebidiira hu siindu sino. 11Nae Yesu yababoolera ati, “Oyo yeesi owirusa omuhasi wae, mani yamala yadeehya owundi, aba aholere obucheke; 12handi omuhasi yesi naaloba wamwe, yamala yadeehera omusaacha wundi, aba ahola obucheke.” 13Abandu bandi bali nibaletaanga abana eyiri Yesu abadiireho nende amahono kae, nae abeeki bae baabakayira n'obwaalaba. 14Nae Yesu niyabona atyo, yanyoolera, mani yababoolera ati, “Mulehe abaana beeche yindi, mutabakayira; olwohuba abali koti bano nibo abeene Bwaami bwa Nasae. 15Mbaboolera obwadyeeri bweene endi, oyo yeesi otakaanira Obwaami bwa Nasae koti omwaana muyere, haba saachia hubwingiramo daawe.” 16Mani Yesu yeecha yabaakata yamala yababeresa ehabi, nabesaho amahono. 17Mani Yesu niyali hwatula ohuchaaka olukeendo lwae ati, omusaacha wundi yeecha yali niyeruha mani yaasigama mu moni wae yaamuteeba ati, “Omweekesa mulai ewe, siina syeene sihoyeere ohuhola hunyemeo nduuhane obulamu butaakama?” 18Nae Yesu yamuboolera ati, “Lwasiina wunaanga omulai? Abulao omulai, ohutusaho Nasae yeng'ene. 19Ngandi omanyire amalako kano: ‘Otetaanga, Otayiranaanga, Otebaanga, Otabachiraanga owaasyo, Otakaadirisaanga, Yisaanga oluyaali mu lataao nende mao.’ ” 20Nae omusaacha oyo yamukobolamo ati, “Omweekesa, ako koosi, ndakooseresa ohutula mu buyere bwaange.” 21Mani Yesu niyamwewunja, yamusiima, mani yamuboolera ati, “Obulwaho esiindu silala siti; cha okuse byooli nabyo, omale obikabire abamanani, mani ochia ohunyoola obuyiinda Mukulu; mani wiche, wunonde.” 22Nae omusaacha oyo niyawulira atyo, yawaamo amaani, mani yawao niyelalihiriire muno; olwohuba yali ali nende ebyobuyiinda biingi muno. 23Mani Yesu yeecha yatingaala abeeki bae, mani yamala yababoolera ati, “Nga bicha ohudinyira muno abali nende obuyiinda bungi ohwingira mu Bwaami bwa Nasae!” 24Mani abeeki bae beecha bawuka muno emboosi eyo. Nae Yesu yeecha yababoolera handi ati, “Baana bange, nga sidinyu muno ohwingira mu Bwaami bwa Nasae.” 25Syanguyira muno engamia ohubita mu liina ly'esindaani, ohuhira omuundu muyiinda ohwingira mu Bwaami bwa Nasae. 26Handi beecha bemeeda ohwesiinduha muno, mani baboolera Yesu bati, “Mani naanu onyala ohuwonesebwa?” 27Yesu yabatingaala, mani yaboola ati, “Eyiri abandu sisinyaliha, nae sibiri bityo eyiri Nasae; olwohuba ebiindu byoosi binyaliha eyiri Nasae.” 28Nae Peetero yeecha yamuboolera ati, “Eng'we, ngandi efwe hwaleha ebiindu byoosi mani hwahuloonda.” 29Yesu yaboola ati, “Mbaboolera obwadyeeri bweene endi, abulao omuundu yeesi owaleha enyumba kata bamwaanang'ina kata bambochong'ene kata ng'ina kata simwaana kata abana kata amaloba, hulwaange nende hulw'Emboosi Ndai, 30otachia ohubukaana amayumba nende bamwaanang'ina nende bambochong'ene nende bang'ina nende abana nende amaloba amahabi emia mu bulamu buno, alala nende ohusaandisibwa, nae mu bulamu bwiicha, achia ohunyoola obulamu butaakama. 31Nae abangi abatangiramo bulaanu, bacha ohuheneerehayo, nae abahenerehayo bacha ohutangiramo.” 32Mani Yesu nende abeeki bae bali nibali hu ngira nibakeenda nibacha e Yerusaalemu, nae Yesu yali naabataangisiiremo; mani beecha besinduha muno, nende abo abali nibabaloondaho beecha batya muno. Handi Yesu yeecha yakabula abeeki bae ehumi-na-babiri yabasudya endulo, mani yachaaka ohubaboolera ebyo ebyali nibicha ohumweholaho ati, 33“Boneho, mbawo hucha e Yerusaalemu; mani Omwaana w'Omuundu achia ohudiiswa abalaamisi bahuluundu alala nende abandiiki ba malako, mani bacha ohumuheengera omusango okw'ohufwa, handi bamudiise Abateende; 34mani bachaaka ohumuhoomolera, nende ohumufuchaho amate, nende ohunaala ehoba, nende ohumwiita; nae oluunyuma lw'endaalo chidatu, achia ohusyuuha.” 35Mani awo, Yakobbo nende Yowaana, abasyaani ba Sebbedaayo, beecha mu moni wa Yesu, mani bamuboolera bati, “Omweekesa, efwe hudaha ofukiirire ohutuholera esyo syoosi sihuchia ohuhusaba.” 36Mani Yesu yabateeba ati, “Siina syeene simudaha ese mbaholere?” 37Nabo bamuboolera bati, “Tufukiirire hwihale, mulala humuhono kwao muluungi, nae owundi hu mukooda, mu bwaami bwao.” 38Nae Yesu yababoolera ati, “Eng'we haba simumanyire simuli ohusaba. Munyala ohung'wa esikoombe siinjia ohung'wa, oba ohubatiisibwa?” 39Nabo bamuboolera bati, “Eee hunyala.” Nae Yesu yababoolera ati, “Esikoombe siinjia ohung'wa mucha ohusing'wa; handi nende ohubatiisibwa hunja ohubatiisibwa, mwesi mucha ohubatiisibwa nahwo; 40nae ohwihala hu muhono kwaange muluungi, kata hu mukooda, haba sibunyala bwaange ohubakaba, nae hwaabo bahwamala ohutekeherwa.” 41Nae ehumi badong'ereo nibawulira batyo, banyolerera muno Yakobbo nende Yowaana. 42Yesu yemawo yalaanga boosi beecha bebuusira yali, mani yababoolera ati, “Eng'we mumanyire muti abandu bahoyeere ohutuka Abateende baabehaho nende obunyala bungi muno, handi abemeresi baabwe bahunuufu babatukira amaani maangi. 43Nae haba sisichia ohuba sityo mweng'we daawe; nae oyo ochia ohuba omuhunuufu mweng'we, ahoyeere ohuba omuhalaabani weng'we, 44nae handi oyo ochia ohuba omwemeresi mweng'we ahoyeere ohuba omuhalaabani wa boosi. 45Olwohuba Omwaana w'Omuundu yesi haba siyeecha ohuhalaabanirwa, nae yeecha ohuhalaabanira abandu, handi nende ohuwaayo omulamu bwae bube obwohununula abandu abangi.” 46Beemao beecha boola mu Yeriko; mani handi koti lu Yesu yali hwatula busa ati mu Yeriko alala nende abeeki bae nende esidiyiha sihoongo sy'abandu, bakaana Bbarutimaayo owali omuwofu musabirisi, omwaana wa Timaayo, niyehaale hundulo w'engira. 47Nae niyawulira ati hane Yesu owe Nasareti niye owali niyeecha, yachaaka ohulirira akulu naboola ati, “Yesu, Omwichuhulu wa Daudi, ngwiire esisa!” 48Nae abandu bandi beecha bamwaalabira nibamuboolera bati awuleere; nae Bbarutimaayo yemeeda busa ohulirira akulu muno ati, “Ewe Omwichuhulu wa Daudi, ngwiire esisa!” 49Yesu yeecha yeema mani yaboola ati, “Mumulaange.” Mani nibalaanga omusaacha muwofu oyo nibamuboolera bati, “Sangaala; siingira, ali ohuhulaanga.” 50Mani niyawulira atyo, yaanyula era engubo yae, yaluuluha yeema, yeecha eyiri Yesu. 51Nae Yesu yemao yaamuteeba ati, “Siina syeene syodaha huholere?” Nae omusaacha muwofu oyo yaboolera Yesu ati, “Omwaami, leha nyale ohubona.” 52Mani Yesu yeecha yamuboolera ati, “Ewe wediirire olukeendo lwao wewerewo; efukiirira yao yihuwonisye.” Mani awo-naawo, omusaacha oyo yachaakirawo ohubona mani yatulaniramo ohuloonda Yesu.

will be added

X\