MARIKO 1

1Ohuchaaka hw'Emboosi Ndai cha Yesu Kristo, Omwaana wa Nasae. 2Koti lu Yisaaya yandiika ati: “Bone, mbao nduma wamwaanda wange ahutangirire mu moni wao ahutereesere engira. 3Ekono lyoyo ohumulira, musiparara niliboola liti: Mutereesere Omwaami engira; Mukolole emihoosi chae” 4Awo niwo yi Yowaana Omubatiisi yabonehera musiparara, nayaala ohubatiisibwa hwohwefunaka hu bandu banyale ohuleherwamo ebibi byaabwe. Yowaana yabatisaanga abandu nabekesa ati, “Mwefunake, mubatisibwe Nasae abaleheremo ebibi byeeng'we.” 5Mani abandu bangi batula mu syalo syoosi esyo mu Buyudaaya nende mu siko sye Yerusaalemu syoosi, baacha eyiri Yowaana, beyolobya ebibi byaabwe, mani yababatiisa mu mwaalo kwa Yorudaani. 6Yowaana yefwalaanga engubo cho bwooya bw'engamia, handi yeboyaanga oluhoba lw'eseero mu sibuno, nae ebyohulya byae byalichingi esike nende obuuhi bw'omusiino. 7Yowaana yayalaanga naboola ati, “Enyuma wange yiriyo owunoondaho, oyo niye owuhirira elalira oluyaali, yitahoyera ohwiinama aasi ndaaboolola eesya ch'ebiraato byae. 8Ese mbabatiisa nende amaachi; nae oyo achia ohubabatiisa nende Mwooyo Mwolerefu.” 9Olwoola, Yesu yatula e Nasareti mu syaalo sy'e Galilaaya, yacha hu mwaalo kwa Yorudaani eyiri Yowaana amubatiise. 10Nae Yesu niyatula mu maachi busa ati, yabona Ekulu nilikuuhe, mani Mwooyo yamwihaho nafwaanana koti eguugu; 11mani ekono lyatula Mukulu niliboola liti, “Niiwe Omwaana wange muheerwa muno; niiwe ohira ohusangaasa.” 12Abweene awo ni Mwooyo amwimirira yamuyira musiparara. 13Mani yaaba musiparara eyo ohumala endaalo amahumi kane, Sitaani naali ohumuhema. Yamenyanga nende esolo ndeende; nae bamalaika ba Nasae nibamuhalaabanira. 14Bulaanu, nibamalire ohudiira Yowaana, Yesu yeecha mu Galilaaya yachaaka ohuyaala Emboosi Ndai cha Nasae, 15naboola ati, “Ebiha byoolere, handi Obwaami bwa Nasae buli aambi; mwefunake, mufukiirire Emboosi Ndai.” 16Yesu niyali nakeenda hu lwaasi lw'enyaanja ye Galilaaya, yabona Simooni nende Andereya mwaanag'ina nibali ohusukuna enjero munyaanja; olwohuba bali abanaabi. 17Mani Yesu yababoolera ati, “Munoonde, njia ohubahola mube abanaabi b'abandu.” 18Mani abweene awo, baleha enjero chaabwe bamuloonda. 19Handi niyemeedaho mu moni budiidi, yabona Yakobbo nende Yowaana abana ba Sebbedaayo, nibali mu lyaato lyaabwe nibonga enjero. 20Mani abweene awo Yesu yabalaanga; baleha Sebbedaayo saabwe mu lyaato alala nende abahalaabani bapangise, baloonda Yesu. 21Yesu alala nende abeeki bae bacha mu Kaperanaumu; nae olwa Sabbaato nilwoola, yacha yengira mu Sinagoogi yachaakaniramo ohweekesa. 22Nae abandu, besinduha muno enjekesa yae, olwohuba siyali koti eya abekesa ba Malako; nae yekesa koti omuundu oli nende obunyala. 23Nae abweene awo, omusaacha waliho omwooyo mubi yengira mu Sinagoogi mani yayula naboola ati, 24“Ewe Yesu we Nasareti, onaatuhole otye? Wichire ohutusihirisa? Huhumanyire, niiwe Omwolerefu mweene wa Nasae.” 25Nae Yesu yakuhabuhira naboola ati, “Nyita chi, handi omutulemo bwaangu!” 26Nae omwooyo mubi okwo kweecha kwasusucha omusaacha oyo muno, kwayulira mu kono ly'akulu, kwamala kwamutulamo. 27Mani abandu boosi bawuka muno, bachaaka ohuteebana abeene-na-beene nibaboola bati, “Sino siina? Yino njekesa njiaha! Wuno ali nende obunyala, alagira busa emyooyo mibi, nikimuwulira.” 28Mani abweene awo, efuma ya Yesu niyisasaana mu syalo syoosi esye Galilaaya. 29Abweene awo ni Yesu atula mu Sinagoogi naachia nende Yakobbo nende Yowaana beengira mu nyumba ya Simooni nende Andereya. 30Bulaanu, masalang'ene Simooni yali akonere mu buliri nalwaala omusuuja, mani Yesu niyengira mu nyumba busa ati, bamuboolera ebidiira hu muhasi oyo. 31Yesu yeecha, yamudiira omuhono, yamusingisa. Omusuuja kwamutulaho, mani yatulaniramo ohubahalaabanira koti lusihoyeere. 32Engoloobe yene eyo, elyuuba nilyahakwa, bachaaka ohumuleetera abalwae babuli ngeri kata nende abo abaliho emisaambwa. 33Mani abandu b'esiko esyo syoosi beecha bebuusira alala mu mulyaango kw'enyumba eyo. 34Yesu yaonia abalwae babuli ngeri, handi yerusa emisaambwa emiingi. Siyakanyaanga emisaambwa echo ohulomaloma esiindu syoosi, olwohuba chali chamumanya. 35Nae nibwahya, ebukwe niyisisiiri ohuheba, Yesu yasingira yaatula mu nyumba omwo, yacha mu sifwo sitaalimo abandu, mani yaba eyo yeng'ene niyekongooya. 36Nae Simooni nende abaasye batula erwaanyi, bachaaka ohumukoonya, 37mani nibamwakaana, bamuboolera bati, “Buli muundu yeesi ali ohuhukoonya busa.” 38Nae yababoolera ati, “Mulehe huchie mu biko bitusibiraane, nyale ohuyaaliramo mwosi; olwohuba esyo nisyo esyandeeta.” 39Mani yacha mu Galilaaya mwoosi, nayaalira mu Sinagoogi chaabwe handi niyerusa mu bandu emisaambwa. 40Olwoola, omusaacha wali nalwaala obulwaae bw'amakere yeecha eyiri Yesu ohumwekongooya; yaasigama aasi yamuboolera ati, “Niweenya, onyala ohuumonia.” 41Esisa siingi muno syadiira Yesu, mani yaakolola omuhono kwae yadiira hu musaacha oyo, namuboolera ati, “Ese nyenya, wona.” 42Mani ebiha byeene ebyo, obulwaae bw'amakere bwamwamuhaho, yawona. 43Nae Yesu yamuhuutira muno, yamala yamuseebula yawaawo bwaangu, 44handi yamuboolera ati, “Bona oti sobooleraho omuundu yeesi esiindu syoosi; nae cha weyekese eyiri omulaamisi, omale owaane esiyaanwa si Musa yalagira esyeekesa siti owonere obulwaae bw'amakere, sino sibe esilolero eyiri abandu.” 45Nae omusaacha oyo yatula yachaaka busa ohusasania efuma eyo buli abundu. Sino syakayira Yesu ohwingira mu siko syoosi alafu, nae yabechaanga erwaanyi mu ngoongo; mani eyo niyo yi bandu bechaanga yali nibatula mu buli situundu.

will be added

X\