LUKA 9

1Yesu yalaanga ehumi-na-babiri abo bebuusa alala, mani yababeeresa amaani nende obunyala ohwirusa emisaambwa choosi nende ohuwonia endwaae, 2mani yabatuma bache bayaale ebidiira hu Bwaami bwa Nasae alala nende ohuwonia abalwaye. 3Mani yeecha yababoolera ati, “mutakiingaho esiindu syoosi hu lukeendo lweng'we kata, endabuhi, kata omufuuko, kata omugaati, kata eseende; handi mutakiinga kata engubo chibiri. 4Mani, enyumba yoosi yimwingiramo, mubecheenge omwo, ohwoola lu mwahatulemo nimuwaao. 5Nae eyo yoosi yibatababukaanira, nimuba nimutula mu siko esyo, muteng'uleenge olufu luli hu makulu keeng'we, sibe esilolero esibakabuhania nabo.” 6Mani basiingira bawaao, bacha babita mu ngoongo, nibayaala Emboosi Ndai nende ohuwonia abandu buli abundu woosi yibacha. 7Nae bulaanu, Herode omutuki we Galilaaya, niyawulira ebyo byoosi ebyali biholehaane, yeecha yawunga, olwohuba abandu bandi bali baboola bati, Yowaana niye osyuhire mu bafu, 8nae abandi bati, Elija niye owali abonehane, nae abandi bati, mulala hu banabbi bahale niye asyuhire. 9Nae Herode yeecha yaboola ati, “Nise owatema hu Yowaana omutwe; nae wuno niye naanu yimbulira nibalomalomaho ebiindu bino?” Mani yaakesaho muno ati amuboneho. 10Mani Abatume nibakobola, bacha baboolera Yesu bibali nibaholere. Nae Yesu yababukula, yabayira endulo bong'ene mu siko sihuluundu silaangwa siti, Bbetisaida. 11Nae esidiyiha sy'abandu nisyamanya sityo, syeecha syamulondaho; mani Yesu yeecha, yabakaanira, mani yeecha yababoolera abidiira hu Bwaami bwa Nasae, handi yeecha yawonia abo boosi abali nibadaha ohuwonisibwa. 12Nae obwiire nibwali nibuchaaka ohwiira; ehumi-na-babiri beecha eyiri Yesu bamuboolera bati, “Seebula esidiyiha sy'abandu sino siweeo, sichie mu ngoongo, nende mu syaalo sya aambi, bache bakoonye owohukona, nende ewohunyoola ebiindu by'ohwehoonyera biindi; olwohuba huli mu syaalo sibulamo abandu.” 13Nae Yesu yababoolera ati, “Eng'we beene mubaberese esiindu sy'ohulya.” Nabo baboola bati, “Huli nende emigaati chitabita mu chitaanu, nende eng'eeni chibiri, ohutusaho nihucha hwakulira abandu bano boosi ebyohulya.” 14Olwohuba bali aambi abasaacha elifu chitaanu. Nae Yesu yeecha yaboolera abeeki bae ati, “Mubehase aasi mubakabule mu buli mukaanda mubeemo abandu aambi wa amahumi kataanu-kataanu.” 15Mani beecha bahola batyo, beehasa abandu boosi aasi. 16Mani Yesu yeecha yabukula emigaati chitaanu echo, nende eng'eeni chibiri, mani yaatingaala akulu Mukulu, yamala yabibeeresa ehabi, mani yabidonyadonya, yamala yabibeeresa abeeki abo babikabule esidiyiha sy'abandu esyo. 17Mani boosi balya, mani beekuta. Mani beecha babuusa ebidonye-donye bidong'ereho, boosa ebimweero ehumi-na-bibiri. 18Olwoola, Yesu niyali yekongooya Nasae yeng'ene naali nende abeeki bae; yeecha yabateeba ati, “Abandu baboola bati, ese nise wiina?” 19Nabo bakobolamo bati, “Yowaana Omubatiisi; nae abandi baboola bati, Elija; handi abandi nabo bati mulala hu banabbi bahale niye osyuhire.” 20Nae yababoolera ati, “Nae eng'we muboola muti ese nise wiina?” Nae Peetero yakobolamo ati, “Niiwe Kristo wa Nasae.” 21Mani Yesu yeecha yabahuutira handi yabalagira batabooleraho omuundu yeesi, 22naboola ati, “Omwaana w'Omuundu ahoyeere ohusaanda mu biindu biingi muno, handi abahuluundu b'enjia nende abalaamisi bahuluundu, nende abandiiki b'amalako boole ohumwebwaaba, handi bamwiite, mani hu ludaalo lw'ohudatu asyuhiswe.” 23Mani Yesu yeecha yaboolera abandu boosi ati, “Omuundu yeesi nadaha ohunoonda, leha mberi yefwirise omweene, mani akinge omusalabba kwae buli ludaalo, mani yanoonde. 24Olwohuba omuundu yeesi odaha ohuwonia obulamu bwae omweene, achia ohubufwiirwa; nae oyo yeesi ofwiirwa obulamu bwae hulwaange, achia ohubuwonia. 25Olwohuba ngaanga siina yi muundu anyoola, naalya esyaalo syoosi, nae afwiirwa oba yekosya omweene? 26Olwohuba oyo yeesi owumaambirwa esoni alala nende emboosi change, oyo yesi niye yi Mwaana w'Omuundu achia ohuwambirwa esoni niyeecha mu luyaali lwae nende mu luyaali lwa Simwaana nende olwa bamalaika boolerefu. 27Nae mbaboolera obwadyeeri bweene endi, aliwo abandi abemere ano bulaanu abatacha ohubonaho ohufwa nibatabona Obwaami bwa Nasae.” 28Nae bulaanu, lunyuma lw'endaalo chitanu-na-chidatu, Yesu naamalire ohulomaloma ebiindu bino, yeecha yabukula Peetero, nende Yowaana nende Yakobbo, mani yaniina nabo hu lugulu ohwekongooya. 29Mani niyali niyekongooya, efwaani yae yakaluhanisibwa, mani ebyefwalo byae byalafuya byamilamilana. 30Nae boneho, abasaacha babiri, Musa nende Elija, beecha balomaloma nae. 31Bano babonehera mu luyaali handi balomaloma hu huwaao hwae, huyali achia ohumaliirisira e Yerusaalemu. 32Bulaanu Peetero nende abaasye bayali abali nabo, endoolo nyiingi chali chibayirire, mani nibasimuha, beecha babona oluyaali lwae alala nende abasaacha babiri abo nibeemere nae. 33Mani abasaacha abo nibali hu balehana nae bati, Peetero yaboolera Yesu ati, “Omwaami, silayi muno efwe ohuba ano; leha hwombahe ebikaali bidatu, silala esyao, esiindi esya Musa, nae esiindi esy'Elija” (Yali saamanyire biyali alomaloma.) 34Nae niyali hwasilomalomaanga atyo, esireesi syeecha, syababwiiha; mani nibali nibengira mu sireesi, beecha baatya muno. 35Nae ekono lyatula mu sireesi niliboola liti, “Wuno niye mwaana wange, Omulobole wange; mu muwulireenge!” 36Nae ekono elyo nilyamala ohulomaloma, Yesu yaboneha nadong'ere yeng'ene. Mani abeeki badoong'a nibawuleerere, mani bahaya ohubooleraho omuundu yeesi mu ndaalo echo, esiindu syoosi sibali nibabweene. 37Nae nibwahya, hu ludaalo luloondaho, nibamalire ohwiha ohutula hu lugulu, esidiyiha sy'abandu sihoongo syeecha syabukaanana nae. 38Mani boneho, omusaacha wundi ohutula mu sidiyiiha yachaaka ohulira naboola ati, “Omweekesa, hwekweeda bonaho omusyaani wange wuno, olwohuba niye omwaana wange yeng'ene; 39mani boneho, omusaambwa kumukwichaangaho, mani yesinduha naalira lukali; kumukikaanga ohwoola lwabira efiro muhanwa, mani kumukuchumbula muno, mani kuhaya ohumutulaho bwaangu. 40Nae ndekweedere abeeki bao ohukwiirusa, nae sibanyalire.” 41Yesu yakobolamo ati, “Poo, oluse lubi luwuma efukiirira, ndahabe nang'we ohwoola liina, handi ndahabesimiriise ohwoola liina? Leeta ano omusyaani wao.” 42Nae niyali ali ohwiicha, omusaambwa okwo kwamususucha, mani kwamumika. Nae Yesu yeecha yahabuhira omusambwa mubi okwo, mani yawonia omusyaani oyo, mani yamukalusira simwaana. 43Mani abandu boosi bawuka muno amaani ka Nasae. Nae abandu boosi nibali basiwukaangaho ebyo byoosi bi Yesu yali naaholere, yeecha yaboolera abeeki bae ati, 44“Mulehe emboosi chino chiingire elalira mu matwi keeng'we; olwohuba Omwaana w'Omuundu achia ohudiiswa mu mahono k'abandu.” 45Nae nabo haba sibamanya amahulundu k'enomanoma yino, handi yali yibakisiibweho, bahaye ohuyimanya; handi bali batiire ohumuteeba ebidiira hu nomaloma yino. 46Mani abeene-na-beene bachaaka ohuyingana nibateebana bati, ni wiina ohiramo oluyaali? 47Nae Yesu niyeecha yaamanya embaasa yiri mu myooyo chaabwe, yabukula omwaana muyere yaamusudya mu lubafu lwae, 48mani yababoolera ati, “Oyo yeesi owakaanira omwaana wuno mu liita lyaange aba yanjakaanira, handi oyo yeesi owunjakaanira aba yakaaniire oyo owanduma; olwohuba oyo ohiramo ohuba aasi mweng'we, niye ohiramo oluyaali.” 49Nae Yowaana yakobolamo ati, “Omwaami, hubweene omusaacha niyerusaanga emisambwa mu liita lyao mani hwamukayira, olwohuba haba saali mulala hweefwe.” 50Nae Yesu yamuboolera ati, “Mutamukayira; olwohuba oyo yeesi otabayingania aba ali alala nang'we.” 51Nae endaalo chae ch'ohukobolayo Mukulu nichasuda aambi, Yesu yahengawo ohuchia e Yerusaalemu. 52Mani yaatuma ba wamwaanda bae bache mu moni wae, mani bacha beengira mu lukoongo lw'Abasamaria, ohumutekehera; 53nae abandu bamwo bahaya ohumwakaanira, olwohuba yali ahengerwo ohuchia e Yerusaalemu. 54Nae abeeki bae, Yakobbo nende Yowaana nibabona sino, baboola bati, “Omwaami, odaha hulaange omuliro kwiihe ohutula Mukulu, kubasihirise?” 55Nae Yesu yakaluhaana mani yabahabuhira. 56Mani beecha bemeeda, bacha mu lukoongo lundi. 57Nae nibali nibakeenda hu ngira, omuundu wundi yeecha yaboolera Yesu ati, “Ese njia ohuhulondaanga buli y'ochiira.” 58Nae Yesu yamuboolera ati, “Amabbwe kali nende ameena, handi amayoni kabburuha nako kali nende ebiswi; nae Omwaana w'Omuundu abulaho kata abundu yaanyala ohugeeng'a omutwe kwae.” 59Nae Yesu yaboolera omuundu owundi ati, “Noonde.” Nae omuundu oyo yaboola ati, “Omwaami, leha mberi njie siihe lata yange.” 60Nae Yesu yamuboolera ati, “Leha abafu basiihe abafu baabwe; nae ewe, cha mani oyaale Obwaami bwa Nasae.” 61Nae owundi yaboola ati, “Omwaami, ese njia ohuhuloonda; nae leha mberi njie seebule ab'omudaala lyaange.” 62Yesu yamuboolera ati, “Abulao omuundu yeesi, odiira embako y'eng'ombe ohulima, mani yobba amahemo, ohoyera Obwaami bwa Nasae.”

will be added

X\