LUKA 8

1Ebyo nibyawa busa biti, Yesu yakenda naabitira mu biko bihuluundu nende engoongo nayaala handi naleetera abandu Emboosi Ndai ch'Obwaami bwa Nasae. Yali ali nende abeeki bae ehumi-na-babiri, 2alala nende abahasi bandi abali baonisibwa emisaambwa nende amadehere kataali nasilala. Abahasi bano nibo: Maria, olaangwa Magadaleena, yi Yesu yali atusiremo emisaambwa chitaanu-na-chibiri, 3nende Jowana, omuhasi wa Chuusa, omubiihi muhuluundu wa Herode, nende Susaana, nende abahasi bangi bandi, abahonyaanga Yesu nende abeeki bae nibatusa hu biindu bi beene bahalaabanaanga ohufuna. 4Mani esidiyiha sy'abandu sihoongo nisyamala ohwebuusa alala, handi abandu bandi abatula mu biko bikabuhaane bosi nibeecha yali, Yesu yalomaloma nabo mu lukaado ati, 5“Olwoola, omulimi yacha ohuwaanya emwo yae. Mani niyali awaanya, emwo yindi yakwa hu ngira, mani yaasenakirwa mu makulu, mani handi amayoni keecha kayiboocha yoosi. 6Nae emwo yindi yakwa hu bikina-kina; mani niyachaaka ohuhula yiti, yeecha yooma, olwohuba haba siyali nende omunyiti. 7Nae emwo yindi yakwa mu mawa; mani amawa kahulira alala nayo, mani kayifwinyirira. 8Nae emwo yindi yakwa mu loba layi mani yaahula, mani yaama ebyaamo amahabi emia ndala.” Niyamala ohuboola busa atyo, yeecha yahuumula naboola ati, “Oyo oli nende amatwi kawulira, leha awulire.” 9Mani abeeki bae nibamuteeba amahulundu k'olukaado luno, 10Yesu yaboola ati, “Eng'we ning'we ababeresebwa ehabi y'ohumanya ebyaama by'Obwaami bwa Nasae; nae eyiri abandu bandi, bino biri mu ngaado busa, mani batingaale bahaye ohubona, handi batekeerese bahaye ohuwulira. 11“Bulaanu, amahulundu k'olukaado lw'omuwaanyi niko kano: Emwo niyo Emboosi ya Nasae. 12Emwo yakwa hu ngira, nibo abo abawulira; nae Sitaani yeecha yabatusaho emboosi chali mu myooyo chaabwe, mani bahaye ohufukiirira bataonisibwa. 13Nae emwo yiri hu bikina-kina nibo abo, nibawulira emboosi, bayakaanira nende esangaalo; nae koti lubataali nende emisi, bafukiiriraho hulw'esiha sidiidi, nae ebiha by'ohuhemebwa nibyoola, nibabyekaana. 14Nae emwo yakwa mu mawa, nibo abo abawulira emboosi, nae ohwelalihirira nende ohubaasa hu buyiinda bw'esyaalo nende esangaalo ly'obulamu bifwinyirira emboosi eyo, mani ebyaamo byaabwe sibihula byaangala. 15Nae emwo yakwa mu loba layi, nibo abo abawulira emboosi, bayidiira bulai muno nende obwadyeeri alala nende omwooyo mulai, mani baama ebyaamo muhwesimiirisa hwaabwe. 16“Abulao omuundu oba naamalire ohuwaambia etaara, olifuniha mu simweero, oba yaalita mu lwalo w'esitaanda, nae alita hu siteeni syalyo, hulihosere abengira mu nyumba. 17Olwohuba abulao esiindu syoosi esyakiswa, esitahakisulwe, handi, abulao esiindu sy'omusyaama esitalimanyihana syatuswa alafu. 18Mani mweliinde engeri yimuwuliriramo; olwohuba oyo oli nabyo, niye ochia ohumeedwaho ebiindi, nae oyo otaliho nende esiindu syoosi, kata nende syabaasa ati ali nasyo, bacha ohumumalaho.” 19Olwoola, ng'ina Yesu nende ba mwaanang'ina beecha yali, nae haba sibanyala ohumwolaho olwa esidiyiha sihoongo. 20Mani beecha baboolera Yesu bati, “Maao nende ba mwaanamaao beemere erwaanyi, badaha ohuhubona.” 21Nae Yesu yababoolera ati, “Maama nende ba mwaanama nibo abo abawulira emboosi ya Nasae mani bayiholeraho.” 22Ludaalo lundi, Yesu yeecha yengira mu lyaato nende abeeki bae mani yababoolera ati, “Mulehe husyaabale huchie engereha w'enyaanja.” Mani beecha bachaaka olukeendo, 23nae nibali nibasyaabala, Yesu yeecha yaakona endoolo. Mani omuyaka kw'amaani kweecha kwasiingisa amafwinda kehubba hu bwaato, bwechula amaachi bwaaba aambi ohusihama. 24Mani abeeki bacha bamusimusa nibaboola bati, “Omwaami, Omwaami, huli ohufwa!” Mani Yesu yeecha yaasimuha, mani yahabuhira omuyaka alala nende amafwinda; mani byeecha byayenjeera byanyita chi. 25Mani Yesu yeecha yababoolera ati, “Efukiirira yeng'we yiri yena?” Mani obuti bwabadiira, mani bawuka muno nibaboolanira bati, “Nae wuno niye wiina, onyala ohulagira kata omuyaka nende amaachi, mani byamuwulira?” 26Mani beecha boola mu syaalo sye Geraseneesi, esitingalaane nende e Galilaaya. 27Nae Yesu niyali atula busa mu lyaato ati, abweene awo omusaacha wundi, otula mu siko sihuluundu esyo oliho emisambwa yamwoolaho; omusaacha oyo yali yamala embaka hoongo muno natefwalaangaho esiindu syoosi, handi siyamenyaanga mu nyumba yoosi ohutusaho, yamenyanga mu biriindwa mwong'ene. 28Omusaacha oyo niyabona busa Yesu ati, yobba wuwi mani yeecha yaakwa mu moni wae, mani yahuumula mu kono ly'akulu naboola ati, “Yesu, mwaana wa Nasae oli Akulu Muno, onaahole otye? Hwekweeda endi, otasaandia daawe.” 29Olwohuba Yesu yali amalire ohulagira omusaambwa mubi okwo ohumutulamo. (Olwohuba omusaambwa okwo kwali kwanala ohumuniinaanga amahabi maangi; yali yalindwa bulindwa nende abasirikaari, niyaboyebwa nende eminyororo alala nende epiingo, mani nahalakaanga busa eminyororo echo alala nende epiingo cheene, mani omusaambwa okwo kwamwiirusaanga nikumuyira mu siparara.) 30Mani Yesu yeecha yaamuteeba ati, “Eliita lyao nilyo naanu?” Nae yaboola ati, “Esidiyiha”; olwohuba emisaambwa miingi muno chali nichimulimo. 31Mani emisambwa echo cheecha chekweeda Yesu atachilagira chacha emakoombe ekotero. 32Nae bulaanu, eyicho ly'embiichi hongo lyali niriri ohwayaanga aambi awo hu ndulo w'esigulu; mani emisambwa echo cheecha chamwekweda achilehe chiche chiingire mu mbiichi echo. Mani Yesu yeecha yachileha chacha. 33Mani emisaambwa echo cheecha chatula mu musaacha oyo, chacha cheengira mu mbiichi echo, mani eyicho ly'embiichi echo lyoosi lyeecha lyabbabuluha embiro lyehirira egenya, lyaweera mu nyaanja mani embiichi choosi chasihama chafwa. 34Nae abaayi b'embiichi nibabona ebyo, beeruha, bacha baasalaania emboosi echo mu siko sihuluundu syoosi alala nende mu ngoongo. 35Mani abandu beecha basiingira bacha ohubona esyali nisiholehane, mani beecha boola hu Yesu, mani babukaana omusaacha yi misaambwa chali chituliremo oyo, niyehaale mu makulu ka Yesu, niyefwaalire engubo, naali mwaaywe; mani beecha batya muno. 36Nae abo abali basibweene, beecha baabakaniaya engeri yi musaacha waliho emisaambwa oyo, yawonisirwamo. 37Mani abandu boosi abali mu syaalo syebodohaanie Geraseneesi beecha bamusaba abatuleho; olwohuba bali batiire muno; mani Yesu yeecha yengira mu lyaato mani yaakobolerayo. 38Nae omusaacha yi misaambwa chatulamo oyo, yeecha yekweda Yesu ati, amufukiirire adoong'e nae; nae Yesu yamuseebula naboola ati, 39“Kaluha engo, mani obaboolere alafu, obulayi bu Nasae ahuholeere yibwaaka.” Mani yeecha yawaawo, nayaala mu siko sihuluundu esyo syoosi ebilai bi Yesu amuholeere koti lu byaaka. 40Mani bulaanu, Yesu niyakobola, esidiyiha sy'abandu syamwakaanira, olwohuba boosi bali nibamuliindiriire busa. 41Abweene awo, omusaacha olaangwa ati Yayiro yesi yeecha yoola. Yayiro yali omuhulundu wa Sinagoogi; mani niyoola eyiri Yesu, yamukwa mu makulu yamwekweeda yeeche mu nyumba yae, 42olwohuba yali ali nende omuhaana wae mulala yeng'ene, owali aambi w'emyaaka ehumi nende chibiri ech'ohubuluundu, naali aambi ohufwa. Nae Yesu niyali hwakeenda naachia, abandu bali bamweyindikanieho muno. 43Nae, omuhasi wali naamalire emyaaka ehumi nende chibiri nalwaala obulwaae bw'ohudaachirira handi omuundu yeesi natanyalaangaho ohumuwonia, 44yatulira enyuma, yoola hu Yesu, mani yamala yadiira hu kemo ly'engubo yae; mani abweene awo, ni ohudaachirira hwae ohwo nihwaakama. 45Nae Yesu yaboola ati, “Naanu oyo owundiirireho?” Nae abandu boosi nibekaana, Peetero yaboola ati, “Omwaami, mbawo esidiyiha sy'abandu sihwebodohaanie handi siri ohuhudiiya!” 46Nae Yesu yaboola ati, “Aliwo omuundu wundirireho; olwohuba mbulira aliwo amaani kahandulaho.” 47Mani omuhasi oyo niyeecha yabona ati amanyihane, yeecha natengereha, mani yaakwa mu moni wa Yesu naboola mu moni w'abandu boosi esikerere namudiiraho, handi koti lwaonere abwene-na-bweme naamalire ohumudiiraho. 48Nae Yesu yamuboolera ati, “Muhana-ng'ene, efukiirira yao yihuwoniisye; cha nende emireembe.” 49Yesu niyali nasilomalomaanga, omusaacha wundi ohutula mu daala ly'omutuki wula ni yoola amuboolera ati, “Omuhaana wao amalire ohufwa; mani handi otanyaahania Omweekesa.” 50Nae Yesu niyawulira sino, yamukobolamo ati, “Otatya; fukiirira busa, mani omuhaana wao achia ohuba omulamu abweene.” 51Mani Yesu niyeecha yoola mu daala, siyafukiirira omuundu yeesi ohwingira nae mu nyumba, ohutusaho Peetero nende Yowaana nende Yakobbo, nende simwaana nende ng'ina mwaana oyo. 52Nae abandu boosi bandoong'a nibalira handi nibacherenjesa hulw'omuhaana oyo; nae Yesu yaboola ati, “Mutalira; olwohuba haba saafwiire, nae ali ohukona.” 53Nae abandu bamucheha busa, olwohuba bali bamanyire bulai bweene bati, omuhaana oyo afwiire. 54Mani Yesu yamudiira omuhono, yaamulaanga naboola ati, “Mwaana ewe, siingira.” 55Mani naakalusa omwooyo, mani nasiingiraniramo; mani Yesu yeecha yabakerakira ati bamubeereseho esiindu sy'ohulya. 56Mani abebusi bae beecha besinduha muno; nae Yesu yabahuutira batabooleraho omuundu yeesi esyali nisiholehaane.

will be added

X\