LUKA 7

1Yesu niyafundihira enomanoma yae yino abandu nibatekereese, yatula awo yacha yengira mu Kaperanaumu. 2Nae bulaanu omuhongo w'abasirikaari emia ndala yali nende omuhalaabani wae mukoosi muno owali omulwae muno, handi naali aambi ohufwa. 3Mani omusirikaari oyo niyawulira efuma ya Yesu, yamutumira abahuluundu b'Abayudaaya, nibamusaba ohwiicha ohuwonia omuhalaabani wae oyo. 4Mani niboola eyiri Yesu, bamwekweeda nende esinani nibaboola bati, “Ahoyeere ohuholererwa atyo, 5olwohuba yaheera muno esyaalo syeefwe sino, handi yatwombahira Sinagoogi yeefwe.” 6Mani Yesu yeecha yacha nabo. Nae niyali aambi ohwoola mu daala, omuhongo w'abasirikaari oyo, yamutumira abeecha bae naboolera Yesu ati, “Omwaami, otenyahania daawe, olwohuba ese haba sihoyera ewe ohwingira mu nyumba yange; 7sakira ese mweene sindeleetere yooli. Nae lomaloma busa emboosi, mani omuhalaabani wange achia ohuwona. 8Olwohuba ese syesi ndi omuundu w'obunyala, handi ndi nende abasirikaari bali aasi wange; mani nimboolera mulala endi, ‘Cha,’ naachia busa; handi owundi endi, ‘Yicha,’ niyeecha busa; handi omuhalaabani wange endi, ‘Hola sino,’ nasihola busa.” 9Nae Yesu niyawulira bino, yesinduha muno, mani yakaluhaana yaboolera esidiyiha syali nisimulondaho ati, “Mbaboolera endi, sisiiri ohwakaanaho efukiirira koti yino mu Yisirayiri mwoosi.” 10Mani abo abali batumibwe eyiri Yesu, nibakobola mu nyumba, baakana omuhalaabani oyo naali omulamu. 11Abweene awo ebyo nibiweere, Yesu yacha mu siko sihuluundu silaangwa siti, Naini, mani abeeki bae alala nende esidiyiha sihoongo bosi bacha nae. 12Nae niyali naali aambi ohwoola mu siruwa sy'esiko sihuluundu esyo, bone, omusaacha wali nafwiire yali akingirwe natusibwa erwaanyi w'esiko ohuchia ohusiihwa, owali omwaana mudeerwa wa ng'ina, handi ng'ina oyo, yali omuhasi mufwiire. Mani esidiyiha sihoongo sy'abandu bomu siko esyo bali bakeendera alala nende omuhasi oyo. 13Mani Omwaami niyabona omuhasi oyo, yamukwiira esisa mani yaamuboola ati, “Otalira daawe.” 14Abweene awo, Yesu yeecha yadiira hu butalihe bw'omufu, mani abakiingi beecha beema. Mani Yesu yaboola ati, “Omuraaga ewe, huboolera endi, siingira.” 15Mani omuundu wali afwire oyo yeecha yasingira yehala, mani yachaaka ohulomaloma. Yesu yeecha yaamudiisa ng'ina. 16Obuti bweecha bwadiira abandu bali awo boosi; mani bachaaka ohukinia Nasae nibaboola bati, “Omunabbi w'amaani atwichiremo!” Haandi bati, “Nasae akeniye abandu bae!” 17Mani efuma yidiira hu Yesu yino yeecha yasasaana mu Buyudaaya mwoosi, alala nende ebyaalo byoosi ebisyebodohaanie. 18Abeki ba Yowaana beecha bamuboolera ebiindu bino byoosi. 19Mani Yowaana yeecha yalaanga babiri hu beeki bae yabatuma eyiri Omwaami naboola ati, “Ewe niiwe oyo owohwiicha, oba hukoonye owundi?” 20Mani abasaacha abo nibamala ohwoola eyiri Yesu, baboola bati, “Yowaana Omubatiisi atutumire yooli naboola ati, ‘Ewe niiwe owohwiicha oba hukoonye owundi?’ ” 21Esiha syeene esyo, Yesu yeecha yawonia abalwaye bangi muno nende ab'endwaae chitaali nasilala alala nende ab'emisaambwa, handi yakera abawofu bangi babona bulai. 22Mani Yesu yabakobolamo ati, “Muche mani muboolere Yowaana ebyo bimubweene nende bimuwuliire: abawofu, babona; abalema, bakeenda; abamakere, baamulwaho; abadiimbe, bawulira; abafu, balamusibwa; abamanani bayaalirwa Emboosi Ndai. 23Mani ali nende ehabi oyo otaambonera bubi.” 24Mani ba wamwaanda ba Yowaana nibamala ohuwao, Yesu yachaaka ohulomaloma eyiri ebidiyiha ebyo ebidiira hu Yowaana ati: “Siina syeene simwachia musiparara ohubona? Ekada li muyaka kuwucha nilidengaana? 25Mani siina syeene simwachia ohubona? Omuundu ofwaalire engubo chifwooha? Bone, abo abafwaala eching'enang'ena handi bamenya mu bulamu bw'ohwedaha baba mu mbiri ch'abatuki. 26Mani siina syeene simwachia ohubona? Omunabbi? Eee, mbaboolera endi, nae oyo niye ohiraho omunabbi. 27Wuno niye oyo yibaandikaho bati, ‘Bone, mbawo nduma wamwaanda wange mu moni wao, ochia ohuhuteresera engira mu moni wao.’ 28Mbaboolera endi, mu bandu beebulwa boosi, abulao ohira Yowaana; kata katyo, oyo ohiramo obudiidi mu bwaami bwa Nasae amuhira oluyaali.” 29(Mani abandu boosi alala nende abatoosa b'omusolo nibawulira batyo, basiima ehola ndayi ya Nasae, olwohuba bali babatiiswa nende embatiisa ya Yowaana; 30nae Abafalisaayo alala nende Abamalako bebwaaba esichiririrwa sya Nasae yibali, koti lubali nibatabatiisibwa nende Yowaana.) 31“Siina syeene sindaakeraanieho abandu b'olwiibulo luno, oba bafwaanana nende siina? 32Bafwaana koti abaana behaale mu siito, mani nibalanganaanga abeene-na-beene bati, ‘Hwabobbera elere li sangaasa, nae mwahaya ohuhina; handi hwabacherenjesera, nae mwahaya ohulira.’ 33Olwohuba Yowaana Mubatiisi yeecha natalia omugaati kwoosi, handi natang'wa efwiini yoosi; nae mwaboola muti, ‘Wuno aliho omusaambwa.’ 34Nae Omwaana w'Omuundu yeecha naalya handi nang'wa; nae mwaboola muti, ‘Bone, ow'okuliira handi omumeesi wuno, omwiicha w'abatoosa b'omusolo nende abaholi be bibi!’ 35Nae amakesi ka Nasae obwadyeeri bwaako, bubonehera mu bandu bakafukiirira.” 36Olwoola, Omufalisaayo wundi yalaanga Yesu ache alye nae, mani Yesu yeecha yacha mu nyumba y'Omufalisaayo oyo, mani yehala hu meesa, ohulya nae. 37Mani bone, omuhasi wundi ow'omusiko sihuluundu esyo, owali omuholi w'ebibi, yeecha yawulira ati Yesu ali ohulya mu nyumba y'Omufalisaayo oyo, yeecha yaleeta echupa y'amafuta k'esiing'aari siingi muno, 38mani yeema emukoongo wa Yesu enamakulu wae naalira, mani yachaaka ohudoonya amasika kae hu makulu ka Yesu, handi nakasimuula nende efwiiri ly'ohumutwe kwae, mani yahoomba amakulu ka Yesu, mani yamala yaakabaha nende amafuta k'esiing'aari ako. 39Nae bulaanu, Omufalisaayo wali nalaangire Yesu niyabona atyo, yaboola mu mwooyo kwae ati, “Nikali mbwe omusaacha wuno munabbi mweene, aba amanyire muhasi w'engeri siina wuno oli ohumudiiraangaho, olwohuba muholi w'ebibi.” 40Nae Yesu yamukobolamo naboola ati, “Simooni, ndi nende esiindu siindaha ohuhuboolera.” Nae Simooni yakobolamo ati, “Omweekesa, siindu siina syeene?” 41Yesu yamukanira ati, “Olwoola, omuundu wundi yali nende abandu babiri babaanja; mulala yali nende ekobi lya edinaari emia chitaanu, nae owundi edinaari amahumi kataanu. 42Nibyoola byabahaya ohutunga, yeecha yabaleheramo bombi. Bulaanu, ni naanu mweene hu bombi abo ochia ohumuheera muno?” 43Simooni yakobolamo ati, “Mbaasa endi oyo, yiyaleheramo ebiingi.” Mani Yesu yamuboolera ati, “Ewe hane mbao oheengere omusango bulai.” 44Mani Yesu yakaluhaana yatingaala omuhasi oyo, mani yaboolera Simooni ati, “Obona omuhasi wuno? Ese nyiingire mu nyumba yao muno, nae haba siwumbereese amaachi k'ohwoosa amakulu kange, nae wuno adosere amakulu kange nende amasika kae, handi yakasimuula nende efwiiri lyae. 45Haba siwungwiireho mu sirifu, nae ohutula nyiingira muno, omuhasi wuno haba saaleheereho ohuhoomba amakulu. 46Ewe haba soobahireho omutwe kwaange amafuta koosi, nae omuhasi wuno abahire amakulu kange nende amafuta k'esiing'aari siingi muno. 47Mani sakira huhuboolera endi, ebibi byae, biingi muno bityo, bimuleheerwemo, olwohuba yekeese ohudaha hungi muno; nae oyo oleherwamo ebidiidi, niye oweekesa ohudaha hudiidi.” 48Mani Yesu yeecha yaboolera omuhasi oyo ati, “Ebibi byao bihuleheerwemo.” 49Nae abo boosi abali nibali nae hu meesa, bachaaka ohuboolanira abeene-na-beene bati, “Wuno niye wiina, onyala ohuleheramo kata ebibi?” 50Nae Yesu yeecha yaboolera omuhasi oyo ati, “Efukiirira yao yihuwonisye; cha nende emireembe.”

will be added

X\