LUKA 6

1Hu ludaalo lwa Sabbaato, Yesu niyali nakeenda naabitira mu ndalo y'engaano, abeeki bae beecha bachaaka ohwaakula emitwe ch'engaano, nibachiwuulira mu mahono kaabwe, nibalya. 2Nae Abafalisaayo bandi baboola bati, “Lwasiina muli ohuhola esitafukiirirwa ohuholwa hu ludaalo lwa Sabbaato?” 3Nae Yesu yakobolamo ati, “Musisiiri ohusomaho si Daudi yahola enjala niyali ni yimuluma, alala nende abo bayali nabo: 4koti lu yengira mu nyumba ya Nasae, yabukula, handi yamala yaalya, omugaati kwawanirwa Nasae, ku muundu yeesi atafukirirwaanga ohulya ohutusaho omulaamisi yeng'ene, handi koti lwosi luyakukabaho abo abali nae.?” 5Mani yeecha yababoolera ati, “Omwaana w'Omuundu niye omwaami wa Sabbaato.” 6Handi hu Sabbaato yindi, Yesu niyengira mu Sinagoogi mani yekesa, omusaacha yalimo yi muhono kwae muluungi kwali kwaafwa. 7Handi Abandiiki b'Amalako ka Musa nende Abafalisaayo, beecha bewunja Yesu babone oba achia ohuwonia hu ludaalo lwa Sabbaato, banyale ohunyoola esifune sibanyala ohumutaaho. 8Nae Yesu yali namanyire ebibaaso byaabwe mani yeecha yaboolera omusaacha wali nende omuhono kwaafwa ati, “Yicha weeme ano.” Mani omusaacha oyo yasingira yacha yeema. 9Mani Yesu yeecha yababoolera ati, “Ese hambateebeho, sifukiirirwa hu ludaalo lwa Sabbaato, ohuhola esilai, kose ohuhola esibi, ohuwonia obulamu kose ohubusihirisa?” 10Mani Yesu yeecha yabatingaala yabebodohania boosi, mani yaboolera omusaacha oyo ati, “Kolola omuhono kwao.” Mani yesi yahola atyo, mani omuhono kwae kwakaluha abweene. 11Mani etima liingi lyeecha lyabadiira bachaaka ohuteebana abeene-na-beene, esiindu sibanyala ohuhola Yesu. 12Mu ndaalo chino, Yesu yatula yacha hu lugulu ohwekongooya; mani yekongooya Nasae esiro syoosi. 13Nae nibwahya, yeecha yalaanga abeeki bae, mani yalobolamo ehumi-na-babiri, bayalaanga Abatume; 14Simooni, yiyeecha yalaanga ati Peetero, nende Andereya mwaanang'ina, nende Yakobbo nende Yowaana, nende Filipo, nende Batulumaayo, 15nende Matayo, nende Tomasi, nende Yakobbo omusyaani wa Alufaayo, nende Simooni owalaangwanga Omulwaanirisi w'esyaalo syae, 16nende Yuda omusyaani wa Yakobbo, nende Yuda Yiskarioti, owehola omuhobi. 17Yesu yeecha yeha nabo natula hu lugulu, yeema musifwo sikwalaafu, alala nende esidiyiha sihoongo sy'abeeki bae Esidiyiha sihoongo muno esy'abandu bandi ohutula mu Buyudaaya nende mu Yerusaalemu alala nende hu lwaasi lw'enyaanja ye Tiro nende Sidoni syosi syaliwo, abali beechere ohumutekeeresa alala nende ohuwonisibwa endwaae chaabwe. 18Handi abo bosi abali nibasandisibwa nende emisambwa bosi baonisibwa. 19Mani esidiyiha syoosi syeecha syakiyaanga ohumudiiraho, olwohuba amaani kamutulangaho mani nabaonia boosi. 20Mani Yesu yasingisa emoni chae yewunja abeeki bae mani yaboola ati: “Muli nende ehabi eng'we abamanani, olwohuba Obwaami bwa Nasae bweeng'we. 21“Muli nende ehabi eng'we abalumwa enjala bulaanu, olwohuba mwahekute. “Muli nende ehabi eng'we abali ohulira bulaanu, olwohuba mwahachehe. 22“Muli nende ehabi eng'we abandu nibabasyuula, handi nibabebwaaba mani baabanyeka handi baababoola bati muliho emisaambwa, hulw'Omwaana w'Omuundu! 23Musangaale hu ludaalo olwo, handi mutuumakale olw'omwehoyo, olwohuba bone, omukabo kweeng'we Mukulu muhoongo; olwohuba kata basaabwe bosi baholaanga batyo abanabbi. 24“Nae chibakaanire eng'we abanyali, olwohuba mwamala ohulemesebwa emyooyo. 25“Chibakaanire eng'we abekuute bulaanu, olwohuba mucha ohulumwa enjala. “Chibakaanire eng'we abacheha bulaanu, olwohuba mucha ohulira nende ohuchereenjesa. 26“Chibakaanire eng'we, abandu nibabalomalomaho bulai, olwohuba nilwo lu basaabwe baholeraanga abanabbi bobubacha. 27“Nae ese mbaboolera eng'we abali ohuwulira endi, Mudaheenge abasuku beeng'we, muholereenge ebilai abo ababasyula, 28mubereseenge ehabi abo abababwaaba, handi musabireenge abo ababanyeka. 29Oyo ohupaama hu tama, mubereseenge etama liindi lyosi; nae oyo ohumalaho ekooti, otamwimaanga kata esaati lyao. 30Beresaanga buli muundu yeesi ohusaba esiindu syoosi; nae oyo ohumalaho ebiindu byao, otamusabaanga ahukalusire handi. 31Handi koti lu wahadahire abaasyo bahuholere, nilwo wesi lwooba obaholere. 32“Nimudaha busa abo ababadaha, muba musuubira hasiimo siina? Olwohuba kata abaholi be bibi bosi badaha busa abo ababadaha. 33Handi nimuholera ebilai abo ababaholera ebilai bong'ene, muba musuubira hasiimo siina? Olwohuba kata abaholi be bibi bosi bahola nasilala batyo. 34Handi nimweyosa abo bamusuubira ohubafunaho, hasiimo siina hamuba musuubira ohufuna? Kata abaholi be bibi bosi beyosa abaholi be bibi basyaabwe, hu lunyuma banyale bosi ohubafunaho ebyaaka bityo. 35Nae mudaheenge abasuku beeng'we, handi mubaholereenge ebilai, handi mubeyoseenge nimutasuubira ohubafunaho esiindu syoosi; mani omukabo kweeng'we kucha ohuba omuhongo, handi mucha ohuba abana boyo Owa Akulu Muno; olwohuba omweene oyo wesisa eyiri abo abatasiima nende abemani. 36Mubecheenge abesisa, koti lu Seeng'we ali owesisa. 37“Mutahengeraanga abaasyeng'we emisango, hu mwesi muhaye ohuheengerwa; mutaayasaanga abaasyeng'e, hu mwesi muhaye ohuyaaswa; muleheraangamo abaasyeng'e, hu mwesi munyale ohuleherwamo; 38mukabenge abasyengwe, hu mwesi munyale ohubeereswa; mu sikero silayi, esisinyiirwe muno, syadengaanisibwa, syediha aasi, sichia ohubabereswa mu mahono. Olwohuba esikero simubereseramo abaasyeng'e, nisyo mwesi simuba mucha ohukalusirwamo.” 39Yesu handi yemeeda yabakaadira olukaado lundi ati: “Mani omuundu muwofu anyala ohwimiriramo omuwofu waasye? Mani bombi sibaba bacha ohukwa mu buko? 40Omweeki haba saanyala ohuhira omweekesa wae, nae buli muundu yeesi naaba naamalire ohwekeswa bulai bweene, aba achia ohuba koti omweekesa wae. 41Lwasiina ewe obona esikoha siri mu moni yo waasyo, nae sonyala humanya esichihi siri mu moni yao yene? 42Kose, ewe onyala otye ohuboolera owaasyo oti, ‘Wasyaange, leha hutusemo esikoha siri mu moni yao,’ nae ewe mweene haba sonyala ohubonaho esichihi siri mu moni yao yene? Omwebachirisi ewe, mberi tusa esichihi siri mu moni yao, hwonyale ohubona bulai bweene mani hu wiche otuse esikoha siri mu moni y'owaasyo. 43“Olwohuba abulao omusaala mulai okwamaanga ebyaamo bibi, kata handi omusaala mubi okwamaanga ebyaamo bilai; 44olwohuba omusaala kwoosi kumanyihaniraanga hu byaamo byaakwo. Olwohuba enduli haba sichinokwaanga hu musaala kw'amawa, kata emisabbiibbu haba sichinokwaanga hu misaala chomubichaha. 45Omuundu mulai, niyeemere hu biindu bilai biyabiiha mu mwooyo kwae, ahola ebiindu bilai, nae omuundu mubi, niyeemere hu biindu bibi biyabiiha mu mwooyo kwae, ahola busa ebibi; olwohuba, omunwa kwae kulomaloma ebiindu byechula mu mwooyo. 46“Lwasiina mu naanga-naanga muti, ‘Omwaami, Omwaami,’ nae haba simuhola bimbaboolera? 47Buli muundu yeesi owiicha yindi, mani yawulira emboosi change, mani yaachiholeraho, njia ohubeekesa koti lwali: 48ali koti omuundu owali niyombaha enyumba, owayaba aasi muno, yaata omuse hu lwaanda; mani amaachi k'ofwomboole nikeecha, ehulukusi yahubba hu nyumba eyo, mani yahaya ohuyidengaania, olwohuba yiba yali yombahwa hu lwaanda. 49Nae oyo owulira emboosi change mani yahaya ohuchiholeraho, ali koti omuundu wombaha enyumba hu loba busa eyibulaho omuse; yi hulukusi yahubbaho, mani abweene awo enyumba eyo yakwa, mani yanyaasiha bubi muno.”

will be added

X\