LUKA 4

1Mani Yesu, niyali yechuule Mwooyo Mwolerefu, yakobola natula e Yorudaani, mani yemirirwa nende Mwooyo oyo 2hulwa embaka y'endaalo amahumi kane naali mu siparara, nahemwa nende Sitaani. Mu mbaka eyo yoosi, haba siyalyaaho esiindu syoosi; mani embaka eyo niyawa, enjala yachaaka ohumuluma. 3Sitaani yeecha yamuboolera ati, “Nooba nooli Omwaana wa Nasae, lagira ekina lino lyehole omugaati.” 4Nae Yesu yamukobolamo ati, “Syandiikwa siti, ‘Omuundu saaba mulamu hulw'ebyohulya byong'ene.’ ” 5Handi Sitaani yeecha yaamuyira akulu, mani yamweekesa obwaami bwoosi obw'ohusyaalo mu siha silala, 6mani yamuboolera ati, “Ese njia ohuhubeeresa obunyala buno bwoosi, alala nende oluyaali lwaabwo; olwohuba bwamala ohumbereswa, mani mbubeeresa oyo yeesi yimba nindaha. 7Mani ewe niwunyinamira, buno bwoosi bucha ohuba obwao busa.” 8Nae Yesu yamukobolamo ati, “Syandiikwa siti, ‘Ohoyeere ohwiinamiraanga Nasae, Omwaami wao, handi oyo yeng'ene niye yonahalabaniranga.’ ” 9Handi Sitaani yeecha yayira Yesu e Yerusaalemu, mani yamudungeeresa hu sifwo sihira obuleeyi hu nyumba ya Nasae, mani yamuboolera ati, “Nooba nooli Omwaana wa Nasae, yakuha otule ano okwe aasi; 10olwohuba syandiikwa siti, ‘Achia ohutuma bamalaika bae bahwakaanire mani bahuliinde,’ 11handi ‘Bacha ohuhukiingira akulu hu mahono kaabwe, ohaye ohuhuya ohukulu hwao hu kina.’ ” 12Nae Yesu yamukobolamo ati, “Siboolwaanga siti, ‘Otahemaanga Nasae Omwaami wao.’ ” 13Mani Sitaani niyali amalireyo buli sihemo, yamutulaho yaalinda esiha siindi syoole. 14Mani Yesu yeecha yakaluha e Galilaaya nasisiiriho amaani ka Mwooyo, mani efuma yae yasasaana yaswaania esyaalo esyo syoosi. 15Mani yeecha yekesa mu Sinagoogi chaabwe, mani buli muundu yeesi yaamukinia. 16Yesu yeecha yoola e Nasareti, yiyali yahusirwa; mani yeecha yacha mu Sinagoogi, koti lu yali yanala ohuholaanga, hu ludaalo lwa Sabbaato. Mani yeecha yaasingira ohusoma; 17nae bone beecha bamubeeresa esitabo sya nabbi Yisaaya. Yabwihula esitabo esyo, mani yakaana yisyandiikwa siti, 18“Mwooyo w'Omwaami yandiho, olwohuba amalire ohumbahaho amafuta ohuyaalira abamanani, Emboosi Ndai Yanduma ohulaangirira eyiri abadiirwa endi bacha ohulehuulwa, handi abawofu endi bacha ohulimbula babone, nende abehalwaho ohulehwa babe nende emireembe, 19ohulaangirira endi omwaaka kwafukiirirwa ohuba okw'Omwaami kwolere.” 20Mani Yabwihawo esitabo esyo, yeecha yaasikalusira omuliindi oyo, mani yehala aasi; mani emoni ch'abandu boosi abali mu Sinagoogi, chamuweeraho. 21Mani yeecha yachaaka ohubaboolera ati, “Olwaleero, ebyandiiko byolerefu bino, byolereere koti lumuwuliire mutyo.” 22Mani boosi bamulomalomaho bulai muno, handi bawuka muno obulayi bw'emboosi chatulaanga mu munwa kwae; mani baboola bati, “Wuno haba siniye omwaana wa Yosefu?” 23Nae yababoolera ati, “Mucha ohunduumbulira ataali ohukana-kana olukaado luno mbwe, ‘Ewe omulesi, wewonie omweene; ebyo bihwawulira huti waholera e Kaperanaumu, biholere ano wosi, mu syaalo syao syeene.’ ” 24Nae Yesu yaboola ati, “Mbaboolera obwadyeeri endi, abulao nabbi yeesi ofukiirirwaanga mu syaalo syae syeene. 25Nae mubwadyeri mbaboolera endi, mu ndaalo cha Elija, ekulu nilyeekalwa ohumala embaka y'emyaaka chidatu nende emyoosi chisaasaba emilaamba, handi esiminyu sihoongo muno nisyalya esyaalo syoosi, baliwo abahasi bafwiire abangi muno mu Yisirayiri, 26nae Elija siyatumwa eyiri abo boosi ohutusaho eyiri omuhasi mufwiire owe Sarefaati, mu syaalo sye Sidoni. 27Handi mu biha bya nabbi Erisa, waliwo abageenge abangi mu syaalo sya Yisirayiri syoosi; nae abulao kata mulala hwaabo owawonisibwa, ohutusaho Namani Omusiria yeng'ene.” 28Nae nibawulira sino, abo boosi abali mu Sinagoogi, etima liingi muno lyeecha lyabadiira. 29Mani baasiingiriramo, bamusiindikirisa bamusukuna erwaanyi w'esiko sihoongo esyo, mani bamuniinia hu sigulu si siko sihoongo syaabwe esyo syombahwaho, nibadaha ohumusiindiha aasi akwiire omutwe. 30Nae omweene yeyindikania yabitira mu sidiyiiha esyo yeweerawo. 31Mani Yesu yeecha yehirira yaacha e Kaperanaumu, mu siko sye Galilaaya. Handi niyali nabekesa hu lwa Sabbaato; 32abandu bawuka muno enjekesa yae eyo, olwohuba emboosi yae yali yiri nende obunyala. 33Nae mu Sinagoogi omwo, mwalimo omuundu wundi owali nende omwooyo kw'omusaambwa mubi; mani yeecha yaalirira mu kono ly'akulu ati, 34“Eee, Onaatuhole otye, ewe Yesu we Nasareti? Wichire ohutusihirisa? Ese humanyire, niiwe Omwolerefu mweene wa Nasae.” 35Nae Yesu yakuhabuhira naboola ati, “Buleera chi, mani omale omutulemo!” Mani omusambwa okwo nikwamala ohumubba aasi akati-kaati wa baandu, kwamutulamo, nikutaamuholereho obubi bwoosi. 36Mani abandu boosi bawuka babolanira abene-na-beene bati, “Yino mboosi siina? Olwohuba yehoonyera busa obunyala nende amaani, nalagira-bulagira emisaambwa, mani nichibatulaho-butula.” 37Mani efuma yae yeecha yasasaana mu bifwo byoosi-byoosi eby'esyaalo sisibiraane awo. 38Mani Yesu yeecha yasingira yaatula mu Sinagoogi, yacha yengira mu nyumba ya Simooni. Bulaanu, masaalang'ene Simooni yali omulwae w'omusuuja, mani basaba Yesu amuhoonye. 39Mani Yesu yeecha yeema ayali, yahabuhira omusuuja okwo, kwamuleha; mani abweene awo, yasingira yabahalaabanira. 40Bulaanu, elyuuba nilyali nilikwa, abo boosi abali nende abalwaye balwaala obulwaae butaali nasilala beecha baabaleeta yaali; mani Yesu yesa amahono kae hu buli mulwae, mani yabawonia boosi. 41Mani emisaambwa chosi chatula mu bandu bangi nichirira chiti, “Niiwe Omwaana wa Nasae!” Nae yakihabuhiraanga, natachikanya ohulomaloma, olwohuba chali chamanya chiti niye Kristo. 42Nae nibwahya, Yesu yasingira yacha mu sifwo sitaalimo abandu. Nae abandu beecha bamukoonya ohwoola lubamwolaho, bamuhayiraho nibatadaha abatuleho; 43Nae yababoolera ati, “Ese hoyeere ohuchia ohuyaala Emboosi Ndai ch'Obwaami bwa Nasae mu biko biindi byosi; olwohuba sino nisyo esyakera ndatumwa ohwiicha.” 44Mani yacha yayaalira mu Sinagoogi chikabuhane mu Buyudaaya.

will be added

X\