LUKA 3

1Mu mwaaka kw'ehumi nende chitaanu kw'obwaami bwa Tibberio Kaisaali, Pootio Pilaato naali Gafana wa Buyudaaya, nae Herode naali omutuki we situundu sya Galilaaya, nae Filipo mwaanang'ina naali omutuki we situundu sye Yiturea nende Turakoniiti; Lisania yali niye omutuki wa Abbilene, 2Anasi nende Kayaafa nibali abalaamisi bahuluundu, emboosi ya Nasae yechera Yowaana omwaana wa Sakariya naali musiparara. 3Mani Yowaana yacha mu situundu sya Yorudaani syoosi, nayaala ohubatiisa hwohweyolobya hulw'ohuleherwamo ebibi. 4Koti lu syandiikwa mu sitabo sya cha Yisaaya omunabbi siti, “Ekono ly'omuundu wundi ohumulira musiparara niliboola liti: Mutereese engira y'Omwaami, mukolole emyaanda chae. 5Buli hoondo yicha ohwichuswa, handi buli lugulu nende esigulu bicha ohukwalaaswa, nende ebyo ebyekodakoda bicha ohukololwa, nende engira ch'ebiguruguunya chicha ohunyiriswa; 6handi buli muundu yeesi achia ohubona obuwonia bwa Nasae.” 7Mani sakira yaboolera abandu bangi abali nibeetusireyo ababatiise ati, “Eng'we abana b'endemo! Ni wiina obalabule ohwiruha ohwewonia egiili yicha? 8Mani mwaame ebyaamo bihoyera ohweyolobya, handi mutachaaka ohweboolera abeene-na-beene muti, ‘Efwe huli abana ba Yibbulaimu’; olwohuba mbaboolera endi, Nasae ali nende obunyala bwohubukula amakina kano yakaholamo abana ba Yibbulaimu. 9Kata bulaanu buti, embaachi yiteerwe hu musi bweene wa buli musaala; mani buli musaala okutaama ebyaamo bilai kucha ohutemerwa aasi, mani kusukunwe mu muliro.” 10Nae ebidiyiha byeecha byamuteeba biti, “Mani hunaahole siina syeene?” 11Nae yabakobolamo ati, “Oli nende amakooti kabiri, leha abereseho oyo otaliho nalyo; handi oyo oli nende ebyohulya, leha yesi ahole nasilala atyo.” 12Abatoosa b'omusolo bosi beecha ohubatiisibwa, mani bamuboolera bati, “Omweekesa, efwe hunaahole siina syeene?” 13Nae yababoolera ati, “Mutatosaanga ebihira bimuhoyeere.” 14Abasirikaari bosi bamuteeba bati, “Nae efwe naafwe, hunaahole siina syeene?” Nae yababoolera ati, “Mutayayaanga omuundu yeesi nimwehoonyera amaani oba nimumubachira busa, handi omuheemba kweeng'we kubamaleenge.” 15Koti lu bandu bali busa nibaliindirira, handi nga boosi bali ohwetebaanga mu myooyo chaabwe ebidiira hu Yowaana, bati awundi yahaba naali niye Kristo, 16nae Yowaana yabakobolamo boosi ati, “Ese mbabatiisa nende amaachi; nae oyo owuhira oluyaali ali ohwiicha, yi ese tahoyera ohuboolola esya ch'ebiraato byae; oyo niye ochia ohubabatiisa nende Mwooyo Mwolerefu handi nende omuliro. 17Olubibo lwae lumuli mu muhono, ohubisa eng'aano yoosi eyiri hu lwanyi lwae lw'ohubbakiraho, handi nende ohuteera eng'aano mu syaaki syae, nae omuhuchi, achia ohukusaamba nende omuliro kutasimiswa.” 18Awo mani, nachiiririra ohubachooma, nayaalira abandu Emboosi Ndai. 19Nae Herode owali omutuki w'esituundu esyo, yiyali yamala ohuchooma hulwa Herodia, owali omuhasi wa mwaanang'ina handi hulw'ebibi biingi biindi biyali naaholaanga, 20yameeda sino hw'ebyo byoosi, mani yekalira Yowaana mu mboye. 21Bulaanu, abandu boosi nibali nibabatiisibwe, handi nende Yesu yesi niyali naamalire ohubatiisibwa, mani naali ohwekongoyaanga, Ekulu lyekulwa, 22mani Mwooyo Mwolerefu yamwihaho mu ngeri y'omubiri nafwaanana koti eguugu, handi ekono lyatula Mukulu niliboola liti, “Niiwe Omwaana wange muheerwa; niiwe yi sangaliire.” 23Yesu hwachaaka obuhalaabani bwae, yali aambi ow'emyaaka amahumi kadatu ech'obuhuluundu, yali omwaana (koti lusyayiribwa ohuba) wa Yosefu, omusyaani wa Heeli, 24omusyaani wa Masati, omusyaani wa Leefi, omusyaani wa Meleki, omusyaani wa Yanai, omusyaani wa Yosefu, 25omusyaani wa Mataasia, omusyaani wa Amosi, omusyaani wa Nahumu, omusyaani wa Esili, omusyaani wa Nagai, 26omusyaani wa Maasi, omusyaani wa Mataasia, omusyaani wa Semeini, omusyaani wa Yoseki, omusyaani wa Yoda, 27omusyaani wa Yowanani, omusyaani wa Reesa, omusyaani wa Serubbabbeeri, omusyaani wa Salatieli, omusyaani wa Neeri, 28omusyaani wa Meleki, omusyaani wa Adi, omusyaani wa Kosamu, omusyaani wa Elimadamu, omusyaani wa Eri, 29omusyaani wa Yoswa, omusyaani wa Eliesa, omusyaani wa Yorimi, omusyaani wa Masati, omusyaani wa Leefi, 30omusyaani wa Simioni, omusyaani wa Yuda, omusyaani wa Yosefu, omusyaani wa Yonamu, omusyaani wa Eliakimu, 31omusyaani wa Meleeya, omusyaani wa Meena, omusyaani wa Mataasa, omusyaani wa Nasani, omusyaani wa Daudi, 32omusyaani wa Yese, omusyaani wa Obbedi, omusyaani wa Bbowaasi, omusyaani wa Saala, omusyaani wa Nahasoni, 33omusyaani wa Aminadabbu, omusyaani wa Adimini, omusyaani wa Arini, omusyaani wa Hesirooni, omusyaani wa Pereesi, omusyaani wa Yuda, 34omusyaani wa Yakobbo, omusyaani wa Yisaka, omusyaani wa Yibbulaimu, omusyaani wa Teera, omusyaani wa Nahori, 35omusyaani wa Serugo, omusyaani wa Reewu, omusyaani wa Pelegi, omusyaani wa Ebberi, omusyaani wa Seela, 36omusyaani wa Kainaani, omusyaani wa Arifakusadi, omusyaani wa Seemu, omusyaani wa Nowa, omusyaani wa Lameeka, 37omusyaani wa Mesusela, omusyaani wa Enoka, omusyaani wa Jareedi, omusyaani wa Mahalaleeli, omusyaani wa Kainaani, 38omusyaani wa Enosi, omusyaani wa Seesi, omusyaani wa Adamu, owa Nasae.

will be added

X\