LUKA 24

1Nae hu ludaalo lutaangira mu juma, mu mabweeri-bweeri, abahasi abo beecha baabukula ebiindu biwunya esiing'aari bibali nibatekeehe, bacha hu siriindwa. 2Mani beecha babukaana ekina nirisiingiiswe niritusirwe hu mulyaango kw'esiriindwa, 3nae nibengiramo, haba sibanyoola omubiri. 4Nibali basyeemere awo, nibawuka esyali siholehane, bone, abasaacha babiri abefwalire engubo chimesa-mesana be beema aambi nabo; 5nae koti lubali batiire, handi beenamye obweeni bwaabwe hu loba, abasaacha abo beecha bababoolera bati, “Lwasiina mukoonya omulamu mu bafu? 6Mwichulise koti lu yababoolera, nasisiiri mu Galilaaya, 7ati, Omwaana w'Omuundu ahoyeere ohuteebwa mu mahono k'abaholi be bibi, handi ahomererwe hu musalabba, nae hu ludaalo lw'ohudatu asyuhe.” 8Mani beecha beechulisa emboosi chae echo, 9mani beecha batula hu ng'ani bacha baboolera ehumi nende mulala alala nende abadong'ereyo boosi ebiindu bino byoosi. 10Bulaanu abahasi bano bali, Maria Magadaleena, nende Jowana nende Maria ng'ina Yakobbo alala nende abahasi bandi babali nabo ababoolera Abatume ebiindu bino. 11Nae Abatume bayira emboosi chino koti olukano busa, mani bahaya ohufukiirira eby'abahasi ebyo. 12Nae Peetero yasingira mani yeruha naachia hu siriindwa; nae nyenama mani yatingaalamo, yabona engubo ch'elaasi nichiri chong'ene; mani yaakobola engo nawuka busa esyali nisyeholeehe. 13Hu ludaalo lweene olwo, babiri hu beeki ba Yesu, bali bacha mu lukoongo lulaangwa luti Emausi, aambi we mairo kataanu-na-kabiri ohutula e Yerusaalemu, 14bali nibalomalomaanga abeene-na-beene hu biindu byoosi ebyali nibiholehaane. 15Nibaba nibasilomalomaanga handi nibeteebanaho abeene-na-beene, Yesu mweene yaasuda aambi mani yakenda nabo. 16Bamubona nae bahaya ohumumanyirisa. 17Mani Yesu yababoolera ati, “Mbaha siina yino yimuli ohukaniayaanga abeene-na-beene nimukeenda?” Mani beecha beema nibelalihiriire muno. 18Mani mulala hw'abo, olaangwa ati Kulyopa, yamukobolamo ati, “Niiwe omukeni weng'ene mu Yerusaalemu otaamanyireho ebiindu byeholeheyo mu ndaalo chino?” 19Nae Yesu yababoola ati, “Bindu siina?” Nae bamuboola bati, “Ebidiira hu Yesu we Nasareti, owali omunabbi w'amaani muno mu biholwa nende mu mboosi mu moni wa Nasae nende mu moni w'abandu boosi, 20handi koti, abalaamisi bahuluundu beefwe nende abatuki bamuyira ahengerwe omusango kw'ohufwa mani bamuhomerera hu musalabba. 21Nae hwali hubaasa huti niye ochia ohuwonia Yisirayiri. Eee, handi ohumeeda hu bino byoosi, bulaanu chibitirewo endaalo chidatu, ohutula bino biholehana. 22Handi, abahasi bandi ohutula mu mukaanda kweefwe batusinduuse muno. Bachiire hu siriindwa echuli muno, 23mani bahaya ohubukaanayo omubiri kwae; mani bakobola nibaboola bati, baboneheerwe bamalaika, abababoolere bati, mulamu. 24Abasyeefwe bandi bosi bachiire hu siriindwa, mani babukaana nisiri busa koti lu bahasi babeere nibaboolere; nae omweene haba sibamubweneho.” 25Nae Yesu yababoolera ati, “bae eng'we, nga muli abasiru, handi emyooyo ch'eng'we nga chihiinda ohufukiirira ebyo byoosi bi banabbi baboola! 26Mubaasa muti sisyali nisihoyerwa Kristo ohusaanda atyo mberi hu yemewo yengire mu luyaali lwae?” 27Mani Yesu yachaaka ohutotolera ebiindu byoosi ebimudiiraho ebiri mu byandiiko byolerefu, ohutulira elalira hu Musa alala nende banabbi boosi. 28Mani bali aambi ohwoola mu lukoongo lubali bachamo. Yesu yaboneha koti oli ohuchiiririra mu moni, 29mani bamwekweeda nibaboola bati, “Sikala naafwe, olwohuba mbano bwiira handi oludaalo mbano luweere.” Mani yeecha yadoong'a nabo. 30Nae niyali hu meesa nabo, yabukula omugaati, mani yakubeeresa ehabi, mani yaakumekula, mani yakubabeeresa. 31Mani emoni chaabwe chaamuha, mani bamumanyiirisa; mani abweene awo yabahamyuhaho. 32Mani nibaboolanira abeene-na-beene bati, “Mani emyooyo cheefwe sichityemuheenge mw'efwe busa naalomaloma naafwe hu ngira, koti lwatutotoleere ebyandiiko byolerefu?” 33Mani baasiingiraniramo ebiha byeene ebyo, mani bakobola e Yerusaalemu; mani banyoola ehumi-na-mulala nibebuusire alala nende abo babali nabo, 34ababoola bati, “Bwadyeeri, Omwaami asyuhire, handi aboneheere Simooni!” 35Mani bosi bababoolera ebyaholehana hu ngira, handi koti lu bamumanyira mu hu mekula omugaati. 36Nae nibali basilomalomaanga bino, Yesu mweene yeecha yeema akati-kaati waabwe. 37Nabo beecha besinduha mani batya muno nibabaasa bati babweene esihyeeno. 38Mani Yesu yababoolera ati, “Lwasiina mwesinduha handi nimukana-kana mu myooyo cheeng'we? 39Bone amahono kange nende amakulu kange, mumanye muti nise omweene; mundiireho mani mubone; olwohuba esihyeeno haba sisiri nende enyama nende amakumba koti lumubona niindi nabyo.” 40 41Nae nibali nibasisiiri ohufukiirira hulw'esangaalo, nende ohuwuka-wukana, yababoolera ati, “Muliho nende esiindu syoosi-syoosi esyohulya?” 42Bamubeeresa omunyonyo kw'eng'eni ndeehe, 43mani yaakubukula yaakulya nibabona. 44Mani yababoolera ati, “Chino nicho emboosi chindababooleraanga nindali nisisiiri nang'we, endi buli siindu syoosi syanyandiikwaho mu malako ka Musa nende mubyandiiko by'abanabbi, alala nende mu Sabbuli ebyali ebyohwolerera abweene.” 45Mani Yesu yekula ebibaaso byaabwe, bamanye ebyandiiko byolerefu, 46mani yababoolera ati, “Sino nisyo esyandiikwa siti, Kristo ahoyeere ohusaanda mani hu ludaalo lw'ohudatu, asyuhe mu bafu, 47handi siti, ohweyolobya nende ohuleherwamo hw'ebibi, huhoyeerwe ohuyaalwaanga mu liita lyae mu byaalo byoosi, ohuchaakira mu Yerusaalemu. 48Niing'we abajulisi be biindu bino. 49Handi bone, njia ohubatumira si Bbaabba yalaka; nae mudong'e mu siko ohwoola lu maani katula akulu kalibehaho.” 50Mani Yesu yeecha yabatusa erwaanyi w'esiko mani yabemirira ohwoola e Bbetani, mani yaasingisa akulu amahono kae mani yababeeresa ehabi. 51Nae niyali nababeeresa ehabi, yabatulaho, mani yaakiingwa yayirwa Mukulu. 52Mani bakobola e Yerusaalemu nende esangaalo liingi muno, 53mani bachiririra ohuba mu nyumba ya Nasae nibafumia Nasae.

will be added

X\