LUKA 23

1Mani ni omukanda okwo kwoosi kweemao kusiingira, kumuleeta mu moni wa Pilaato. 2Mani ni bachaaka ohumuwabira nibaboola bati, “Hubukaanire omusaacha wuno naali ohudondobanianga esyaalo syeefwe, handi naali ohutukaana ohutusiraanga obuhoonyi bwefwe Kaisaali, handi naboola ati omweene niye Kristo handi niye Omutuki.” 3Nae Pilaato yeecha yamuteeba ati, “Niiwe omutuki w'Abayudaaya?” Nae yamukobolamo ati, “Niiwe oboolere otyo.” 4Mani Pilaato yeecha yaboolera abalaamisi bahuluundu alala nende emikaanda ch'abandu ati, “Ese haba simbonaho omusango kwoosi hu musaacha wuno.” 5Nabo baangalala busa nibaboola bati, “Asangulusa busa abandu, naabitira niyeekesa mu Buyudaaya mwoosi, ohutulira e Galilaaya ohwolera elalira kato ano wosi.” 6Nae Pilaato niyawulira atyo, yeecha yateeba ohubona omusaacha wuno yali Omugalilaaya. 7Mani Pilaato niyeecha yaamanya ati, hane atula mu butuki bwa Herode, yeecha yayira Yesu eyiri Herode, owali yesi naali mu Yerusaalemu esiha syeene esyo. 8Nae Herode niyabona Yesu, yasangaala muno, olwohuba yali yekomba luleeyi ohumubona, olwohuba yali namuwuliraangaho busa, mani yali nasuubiraanga ohubonaho obulolero bwahola. 9Mani yeecha yaamuteeba ebiindu biingi muno, nae Yesu yahaya ohumukobolamo kata silala. 10Abalaamisi bahuluundu alala nende Abandiiki b'amalako nabo bandonga busa nibeemere awo nibedinyiisie ohuwabira butoli-toli. 11Nae Herode alala nende abalwaani bae beecha bachaaka ohumusaandia nibamuhoomolera; mani nibeecha nibamufwaasa engubo chobuyaayi nibamala nibamukalusa eyiri Pilaato. 12Mani ohuchaakira abweene awo, ni Herode nende Pilaato bachaakirawo ohuba abeecha handi, olwohuba enyuma eyo bali nibasyuulana busa. 13Bulaanu, Pilaato yeecha yabuusa alala abalaamisi bahuluundu nende abatuki nende abandu bandi, 14mani yababoolera ati, “Mundeteere omusaacha wuno koti oyo owali nadondobania abandu. Nae nimalire ohumuwosesa mu moni w'eng'we, boneho, ese haba siinyalire ohumunyoolaho omusango kwoosi hw'ebyo byoosi bimubeere mu muwabiire. 15Kata nende Herode yesi atyo, sakira amutukalusiire handi. Boneho, abulao esiindu syoosi esihoyera ohufwa syaholereho daawe; 16Mani ese njia ohumunaalaho ehoba budiidi, mani male mulehuule yeweerewo.” 17 18Nae boosi beecha bahuumira alala nibaboola bati, “Musihirise omuundu wuno, mani mutuboololere Bbarabba” -- 19omusaacha yali yasukunibwa mu mboye hulw'ahasasakamalo hali hakwiireo mu siko sihuluundu handi nende hulw'obwiiti, 20Pilaato handi yeecha yabalomalomera ehabi liindi, nadaha abolole Yesu; 21nae handi beecha bahuumira mu kono ly'akulu nibaboola bati, “Mumuhomerere busa, mumuhomerere!” 22Handi ehabi ly'ohudatu, Pilaato yeecha yababoolera ati, “Hu lwasiina, sibi siina syeene syaholere? Haba simubweeneho omusango kwoosi okuhoyera ohufwa; Mani sakira, njia busa ohumunaalaho ehoba busa mani nyemeo mulehuule.” 23Nae bali nende amayiingi maangi muno nibamusaba nibehuuma bati ahoyeere ohuhomererwa. Mani amakono kaabwe keecha kayingira. 24Mani Pilaato yeecha yahenga omusango ati ohudaha hw'abandu nihwo ohuba huholerweho. 25Pilaato yeecha yalehuula omusaacha oyo owali yasukunwa mu mboye hulw'ohusasakamala hwali hukwiireo mu siko sihuluundu nende hulw'obwiiti, yibali nibasabire; nae yeecha yahola Yesu koti lubali badahire. 26Mani koti nibali hu bamutusa awo, beecha baakwa hu Simooni wundi Omusireeni, owali naakobola busa mu siko natula mu ngoongo mani beecha bamudwiiha omusalabba yakukiinga naloonda hu Yesu. 27Mani enyuma wae esidiyiha sihoongo esy'abandu syeecha syamulondaho nende omuhunu kw'abahasi abali nibacherenjesa nibamulira. 28Nae Yesu niyakaluhaana yabatingaala, yaboola ati, “Bahaana ba Yerusaalemu, mutandirira haba, nae mwelirire abeene, handi mulirire abana beeng'we. 29Olwohuba bone, endaalo mbawo chiicha, chibahabooleremo bati, ‘Bali nende ehabi abakumba, nende enda chitebulaho omwaana yeesi, handi nende embeere chitanuuniaho haba!’ 30Mani bahachaake ohuboolera engulu bati, ‘Mutukweeho’; handi ohuboolera ebigulu bati, ‘Mutufuniihe.’ 31Olwohuba nibahola bati omusaala nikusisiiri omubisi, byahabe bitye nikwahabe kwoomere?” 32Beecha bayira abasaacha babiri bandi bali beebi babeetere alala nende Yesu. 33Nae niboola musifwo silaangwa siti, Esiyaanga, awo niwo yibahomerera Yesu hu musalabba alala nende abeebi babiri abo, mulala hu muhono muluungi, nae owundi humuhono kwae mukaada. 34Mani Yesu yeecha yaboola ati, “Bbaabba, baleheremo; olwohuba bakoterwe bibahola.” Mani beecha bahubba eha ohukabania engubo chae. 35Mani abandu bali nibeemere awo nibabatingaalire; nae abatuki bamucheha nibamudyabuhira nibaboola bati, “Yawonia abandi; mani leha yewonie omweene, naaba naali Kristo wa Nasae, Omudoole wae Mweene!” 36Abamaye bosi beecha bamuhomolera, nibeecha yaali nibamuba efiini yihaliihe, 37mani nibaboola bati, “Nooba nooli Omutuki w'Abayudaaya, wewonie omweene!” 38Beecha baata obwandiike bwosi akulu wae buti, “Wuno niye Omutuki w'Abayudaaya.” 39Mulala hu beebi bali bosi bahomereerwe yahabuhira Yesu naboola ati, “Ewe haba siniiwe Kristo? Wewonie omweene nende efwe fwesi!” 40Nae owundi yeecha yaanyeka owaasye oyo naboola ati, “Ewe haba sotyaaho Nasae, nga wesi oheengerwe omusango nasilala nae? 41Nae efwe fwembi huhoyera busa; olwohuba efwe huli busa ohunyoola omukabo kuhoyera ebiholwa byeefwe; nae omusaacha wuno nae haba saholereho esiindu syoosi esitahoyera.” 42Mani yeecha yaboola ati, “Yesu, wunjichulisanga niwingira mukati wa Bwaami bwao.” 43Nae Yesu yeecha yamuboolera ati, “Mu bwadyeeri bweene, ndi ohuhuboolera endi, olwaleero luno ochia ohuba naange mu Paradaisi.” 44Ebiha bino byali nibiri aambi w'esaa chisaasaba mani esiirima syeecha syadiira syaalo syoosi ohwoola esaa chitaanu-na-chine, 45omubasu nikuhaire ohufwa; mani engubo yadembaanga mu nyumba ya Nasae yeecha yeecha yaatandulwamo habiri. 46Mani bulaanu Yesu yeecha yaalira mu kono hoongo mani yaboola ati, “Bbaabba, ngeeng'a omwooyo kwaange mu mahono kao!” Mani Yesu niyamala ohuboola atyo, yayeera omuuya kwae kuheneerehayo. 47Nae bulaanu, omumaye muhuluundu niyamala ohubona ebyo byoosi ebyaholehana, yeecha yafumya Nasae, mani yamala yaboola ati, “Ataali ohukana-kana, omusaacha wuno abeere omulaboota mweene!” 48Mani abweene awo, ebidiiyiha byoosi ebyali nibyebuusire awo ohubonaho ebyo, nibabona ebyaholehana ebyo byoosi, bakobola mu madaala kaabwe nibehuya mu birifu. 49Mani abandu bali bamumanyiirira boosi, alala nende abahasi bali bamuloondereho ohutula e Galilaaya beecha beema eyale mani babona bulai muno ebiindu bino. 50Bulaanu waliwo omusaacha olaangwa ati, Yosefu otula mu siko sy'Abayudaaya silaangwa siti Arimaseya. Yali mulala hu b'oluhiiho, handi yali omusaacha mulai handi omulungifu muno, 51yali natafukiirisaanie nende ebichiiririrwa nende ebiholwa bibi by'abaasye, handi yali naliindiriire Obwaami bwa Nasae bwiiche. 52Omusaacha wuno yacha eyiri Pilaato, mani yaamusaba omubiri kwa Yesu. 53Mani yeecha yaakwanula mani yaakuboya mu suuka ly'elaasi lya rachaari, mani yamwalisa mu ng'ani yabaachwa mu lwaanda yibali basisiiri ohusiiha hoomo omuundu yeesi. 54Oludaalo olwo lwali oludaalo lw'Ohwetekeheramo, handi Sabbaato yali aambi ohuchaaka. 55Abahasi bali beechere nae ohutula e Galilaaya, baloondaho, mani babona eng'ani, nende engeri yibali basihiremo omubiri kwae. 56Mani bakobolayo, batekeha ebiindu biwunya esiing'aari nende amafuta k'ohumubaha. Hu ludaalo lwa Sabbaato, bawuluuha ohweema koti amalako lu kaboola.

will be added

X\