LUKA 22

1Ebiha bino, esidyaalo sy'Omugaati kw'obusye Butabbahirwe esilaangwa siti Paasaka, syali siri aambi ohwoola. 2Mani abalaamisi bahuluundu nende abaandiiki b'amalako bali nibakonyeresa engeri yibanyala ohumwitiramo; olwohuba bali nibatya abandu bandi ohubabona. 3Bulaanu Sitaani yeecha yaniina Yuda olaangwa Yisikarioti, owali mulala hu beeki ehumi-na-babiri; 4yeecha yaatula ao yaachia ohuchwichwiisania nende abalaamisi bahuluundu alala nende abahuluundu bandi engeri yaanyala yaamutumbuliramo yibali. 5Mani beecha basangaala muno, mani bomiisa ohumubaaho eseende. 6Mani sakira yesi yeecha yafukiirira, mani yakonyeresa ehabi yinyala yaamukwiira yaanyala ohumutuumbuliramo yibali abundu ataali omuhunu kw'abandu. 7Oludaalo lw'ohuliiramo esidyaalo sy'Omugaati kw'obusye butaali obubbaahe, lubeteraangaho ekoondi yeere lwemao lwoola. 8Mani sakira Yesu yatuma Peetero nende Yowaana naboola ati, “Muche mututekehere Paasaka, fwesi huyirye.” 9Nabo bamuboolera bati, “Ni yena bweene yonadahe huchie huyitekehere?” 10Nae yababoolera ati, “Boneho, nimunaba nimumalire ohwingira mu siko sihuluundu, omusaacha onaba nakiingire esyoongo y'amaachi achia ohubakaanira; mani mumulondaanga mwingira nae mu nyumba yaba achia ohwingiramo, 11mani muboolere omuliindi w'enyumba eyo muti, ‘Omweekesa ali ohuhuboolera ati, Enyuumba y'abakeni yiri ena, yinja ohuliiramo Paasaka alala nende abeeki bange?’ 12Mani aba achia ohubeekesa esiseenge sitaabafu esiri akulu esimalire ohuteebwamo ebiindu bidahibwa; ni eyo niyo nimuba mucha ohutekeha.” 13Mani beemao bacha basibukaana koti busa luyali ababoolere; mani bamala batekeha Paasaka. 14Mani esaa niyoola, Yesu yeecha yehala hu meesa, alala nende abatume abo. 15Mani yeecha baboolera ati, “Ndekoombere elalira ohulya Paasaka yino nang'we nitoola ohusaandisibwa; 16olwohuba mbaboolera endi haba siinjia huyirya ohwoola luyilyosereswa abweene mu bwaami bwa Nasae.” 17Mani yeecha yabukula esikoombe, mani niyamala ohwebasa yeecha yaboola ati, “Mubukule sino, mani musikabanemo abeene-na-beene; 18olwohuba mbaboolera endi, ohutula bulaanu buti, ohuchia mu moni, siinjia hung'waaho hu syaamo sy'omusabbibbu ohwoola lu bwaami bwa Nasae bulichiira.” 19Handi yeecha yabukula omugaati, mani yamala ohwebasa yeecha yaakudonya-donyamo mani yamala yakubabeeresa naboola ati, “Kuno nikwo omubiri kwaange okwakabulwa hu lw'eng'we. Muholeenge muti nimunjichulisa.” 20Handi nasilala yahola atyo esikoombe lunyuma lw'ohumala ohulya esy'engoloobe naboola ati, “Esikoombe sino busa sibeeresebwa hu lw'eng'we, nisyo elakano yaaha eya abamabanga kange. 21Nae muboneho, omuhono kw'oyo owundyaamo olukwe kuli ohulya naange. 22Olwohuba Omwaana w'Omuundu wuno achia ohuwaao busa koti lusyahengwawo; nae chakaanire omuundu oyo ochia ohuhoseswa mu humulyaamo olukwe!” 23Mani beecha bachaaka ohuteebana abene-na-beene ni wiina hu beene abo oli oyo ananyale ohuhola sino. 24Amayingani kosi keecha kabatuumbuhamo, akaboola mbwe ni wiina mweene hu beene abo ochia ohuyiribwa koti omuhunuufu obahiramo boosi. 25Nae Yesu yeecha yababoolera ati, “Abatuki baabandu Abateende babekeserangaho obwaami; handi abo ababa nibaliho akulu mu bunyala nibo abalaangwa bati, ‘abaliindi b'abandu’. 26Nae haba sibiri bityo mwesi yimuli; nae mukanye oyo omuhunuufu oli mweng'we yehole abe koti omuyere mweene, handi omwimirisi nae abe koti oyo ohalaabanira abaasye. 27Olwohuba ni wiina mweene omuhunuufu ohiramo, oyo owihaale ohulya, kose oyo omuhalaabanira? Sisiri mbwe niye oyo owihaale hu meesa ohulya? Nae ese ndi mw'eng'we koti oyo oli ohubahalaabanira. 28“Eng'we ning'we abachiririire ohuba naange niindi mu mateemo kange; 29mani ndi ohubaba omulimo ohuhola koti Bbaabba yamberesa Obwaami, 30endi mucha ohuliira nende ohung'wera hu meesa yange mu Bwaami bwaange, handi mucha ohwihala hu bisaala by'obutuki nimukayaanga enjia ehumi-na-chibiri echa Yisirayiri. 31“Simooni, ewe Simooni! Bonaho, Sitaani yekombere ohubabukula hu yemewo anyale ohubatondoola koti engaano, 32nae ese malire ohubekongooyera endi efukiirira yeng'we yitahaywa; mani nimuba nimumalire ohwomiira handi, muhoyeere ohugumia abaasyeng'we.” 33Nae Simooni yeecha yaboolera Yesu ati, “Omwaami, ese ndi omwetekefu ohuchia naawe mu jiela kata nende mu hufwa.” 34Yesu nae Yaboola ati, “Ese huboolera ewe Peetero endi, edaaywa haba siyichia ohuholyooha olwaleero, ohwoola lw'ewe ochia ohuba nomalire ohwekaana oti haba siwumanyireho.” 35Handi Yesu yeecha yababoolera ati, “Mani ludaalo lundabatumira muche nimutaaliho nende omufuuko, kata esanduku, kata ebiraato, mwacha mwahaya ohubaaho nende esiindu syoosi?” Baboola bati, “Poo!” 36Yecha yababoolera ati, “Nae bulaanu buti, leha oyo oli nende omufuuko akubukule, handi katyo busa nende esanduku lyosi. Handi leha oyo otaali nende olugaanga akuse engubo yae alukule. 37Olwohuba ndi ohubaboolera endi, esyandiiko syolerefu sino sichia ohunjosereswaho, siti ‘Yabalirwa mu badondobanu’; olwohuba esyo syoosi esyanyandiikwaho siri nende ohwosereswa hwaasyo.” 38Handi beecha baboola bati, “Omwaami, lolaho, ngandi engaanga chibiri njino chiri ano.” Handi Yesu yeecha yababoolera ati, “Ebyo bimala.” 39Bulaanu Yesu yeecha yaatula erwaanyi, mani koti luyali esaambo yae, yeecha yacha hu lugulu lwa Olibeti; handi abeeki beecha bamuloondaho ebweene eyo. 40Nae niyeecha yoola mu sifwo esyo, yeecha yababoolera ati, “Mwekongooye muhaye ohukwa mu huhemwa.” 41Handi yeecha yabatulaho yaasudaho eyale yiwahasukuna ekina lyoola, mani yaasigama aasi mani yekongooya ati, 42“Bbaabba, nikali mbwe ni ohweenya hwao, nduseho esikoombe sino; kata katyo, bitaba mbwe ni muhudaha hwange busa, nae ohwao nihwo ohuba huholerweho.” 43 44 45Mani niyasiingira yaatula mu hwekongooya, yeecha eyiri abeeki mani yabanyoola nibali ohukona hulw'obwelalihirifu, 46mani yababoolera ati, “Lwasiina mukona? Musiingire mwekongooye munyala ohukwa mu huhemwa.” 47Yesu niyali nasilomalomaanga, esidiyiha sy'abandu syeecha syoola, mani omusaacha olaangwa Yuda, owali mulala hu ehumi-na-babiri, niye owali abemiriire. Yecha yaasuda muno eyiri Yesu ati amukwe mu sirifu; 48nae Yesu yeecha yamuboolera ati, “Ewe Yuda, onyala otye ohuchia ohulya olukwe mu Mwaana w'Omuundu mu humukwa mu sirifu?” 49Mani abo boosi abali nibali aambi nende Yesu nibabona esyali sichia ohulondaho, beecha baboola bati, “Omwaami, hwehonyere olugaanga kose?” 50Mani mulala hu beene abo yeecha yatemaho omuhalabani w'omulaamisi muhuluundu mani yaamumalaho ohutwi hw'omuhono muluungi. 51Nae Yesu yeecha yaboola ati, “Bino biweere awo!” Mani yeecha yadiira ohutwi ohwo, mani yamuwonia. 52Bulaanu Yesu yeecha yaboolera abalaamisi bahuluundu nende abandu bahunuufu b'enyumba ya Nasae nende abahuluundu, abali nibamwichiire ati, “Mwiichire koti abechera omunyaka, nimuli nende engaanga nende ebiruga? 53Nindabereenge busa nang'we buli ludaalo mu nyumba ya Nasae, nimutanyalaanga ohungwaho busa. Nae olwohuba yino niyo esaa yeng'we, nende obunyala bw'esiirima.” 54Mani beecha bamukwaaho, mani bamala bamutusa awo, nibamuleeta mu nyumba y'omulaamisi muhuluundu mweene. Peetero nae yalondangaho busa naali eyale hooho; 55mani nibali nibahaadusa omuliro akati-kaati w'olwaanyi nibahehala alala, Peetero yesi yeecha yabehalamo. 56Mani nae omuhaana muhalabani niyamubona niyehaale mu bulafu yamuhang'aasa emoni mani yaboola ati, “Omusaacha wuno yesi abeere nende omuundu oyo.” 57Nae yeecha yaasikaana muno naboola ati, “Muhasiiwe, ese haba simumanyire daawe.” 58Handi ebiha bidiidi nibyabitao, omuundu wundi yeecha yamubona mani yaboola ati, “Ewe wesi oli mulala hu beene abo.” Nae Peetero yaboola ati, “Omuhongo, ese siindiho nabo daawe.” 59Mani handi oluunyuma lw'esiha syoola esaa ndala, handi omuundu wundi yeecha yomiisa naboola ati, “Ataali ohukana-kana, omusaacha wuno yesi abeere nae; olwohuba yesi Mugalilaaya niye.” 60Nae Peetero yaboola ati, “Omuhongo, ese haba siimanyire ebyo byooli ohulomalomaanga.” Ni abweene awo, niyali mbwe hwasilomalomaanga, edaaywa yeecha yaholyooha. 61Mani ni Omwaami akaluhana atingaala Peetero. Mani Peetero yeecha yechulisa emboosi y'Omwaami yira, koti luyali namuboolere ati, “Edaaywa niyitaholyooha olwaleero, onandekaana amahabi kadatu.” 62Mani Peetero yeecha yaatula erwaanyi mani yaalira muno. 63Nae bulaanu abasaacha bali nibadiirire Yesu beecha bachaaka ohumuhoomolera alala nende ohumuhuya; 64handi beecha bachaaka ohumufuunihaanga emoni, ni bamuteeba bati, “Tuumbulaho! Ni wiina mweene ohuhuyire?” 65Handi ni bachiririra ohulomalomaho emboosi nyiingi cheene nibamunyeka. 66Nibwahya, oluhung'aano lw'abandu bahuluundu b'abandu beecha bebuusa alala, nende abalaamisi bahuluundu alala nende abandiiki b'amalako boosi; mani beecha bamutusa awo bamuyira ena luhiiho lwaabwe, bamala baboola bati, 67“Nikali mbwe niiwe Kristo, tuboolere busa.” Nae yeecha yababoolera ati, “Ese nimbaboolera busa, haba simuchia ohufukiirira; 68handi naange nimbateeba, haba simuchia hunyala ohungobolamo. 69Nae kali mbwe ohutula esiha sino nende ohwemeeda mu moni, Omwaana w'Omuundu wuno achia ohuba niyehaale hu muhono muluungi okw'obunyala bwa Nasae.” 70Mani boosi beecha baboola bati, “Mani niiwe Omwaana wa Nasae?” Nae yababoolera ati, “Muli ohuboola muti nise oyo.” 71Mani nabo beecha baboola bati, “Mani aliwo obuloli bundi buhusiidaha? Humalire ohwewuliirira abeene ohutula mu munwa kwae kweene.”

will be added

X\