LUKA 21

1Yesu yeecha yaasingisa emoni akulu, mani yabona abanyali nibali ohuta ebiyaanwa byaabwe mu sibiihiro; 2mani yeecha yabona omuhasi mufwiire mumanani nataamo obuhela bubiri. 3Mani yaboola ati, “Mbaboolera obwadyeeri endi, omuhasi mufwiire mumanani wuno ateeremo ohuhira abo boosi; 4olwohuba abo batusireho busa hu biingi bibali nabyo, nae wuno ohutula mu bumanani bwae ateeremo byoosi byaabeere nabyo mu bulamu bwae.” 5Mani abandu bandi nibali nibalomaloma hu nyumba ya Nasae, koti luyali niyimila-milana hulw'amakina k'obuhala bungi, nende ebiyaanwa byaamwo, Yesu yeecha yaboola ati, 6“Ebiindu bimubona bino byoosi, endaalo chahoole, abulewo ano ekina lyahaleheebwe hu liindi, nikahasukunwe koosi kaweere aasi.” 7Mani beecha bamuteeba bati, “Omweekesa, sino syahabeeo liina, handi silolero siina esyahabeo esyeekesa siti sino siri aambi ohukwao?” 8Nae Yesu yaboola ati, “Mweliinde muhaye ohukoswa; olwohuba abandu bangi bacha ohwiicha mu liita lyaange, nibaboola bati, ‘Nise oyo!’ handi bati, ‘Ebiha mbino!’ Mutabaloondakiriraanga. 9Nae nimuwuliraanga amaye nende embuungu, mutatengatengaanga; olwohuba sino sihoyeere ohubao mberi, nae enjakamo nayo siyichia hukwao busa ehabi lala.” 10Bulaanu Yesu yeecha yababoolera ati, “esyaalo sichia ohusiingira siseete esiindi, handi obwaami bwosi buseete obuundi; 11esyaalo syahateengerehe muno, handi enjala nende amalwaaye maangi mabi kahakwe mu byaalo bitaali nasilala; handi ebiindu bitiisa muno nende obulolero bw'amaani ohutula akulu bicha ohubaao. 12Nae bino byoosi nibisisiiri ohukwao, abandu bacha ohubadiira mani babasaandye muno, nibabayira mu Sinagoogi chitaali nasilala nende mu mboyero, handi mucha ohuleetwa eyiri abatuki nende Bagafana hulw'eliita lyaange. 13Awo niwo yi eng'we mwahatusire obujulisi. 14Mani sakira mumanyire elalira mu myooyo ch'eng'we, mutachaaka ohukana-kana hale nibitoola koti lumuba mucha ohukobolamo ebiteebo; 15olwohuba, njia ohubaba eby'ohulomaloma nende amakesi kadahibwa, ka kata mulala hu basuku beeng'we aba cha ohunyala ohuhira kata ohudondobania. 16Mucha ohusiindihwayo kata nende abebusi beeng'we, kata abanaluya beeng'we, kata abeecha beeng'we handi abandi hw'eng'we mucha ohwiitwa bwiitwa; 17abandu boosi bacha ohubasyuula hulw'eliita lyaange. 18Nae haba kata olwooya lw'efwiiri lulala olwohumitwe cheeng'we siluchia husihirira daawe. 19Nae ni mu hwesimiirisa hw'eng'we mumucha ohufunira obulamu. 20“Nae nimubonaanga Yerusaalemu nisyebodoohanisiibwe nende amaye, mani mumanyeenge busa muti, olubwa lwasyo luba lumalire ohwoola. 21Mani muleheenge abo ababa nibali mu Buyudaaya beruheenge bacha hu ngulu, handi leheenge abo ababa nibali mu siko sihuluundu bweene bawuya, handi mutalehanga abo ababa nibali erwaanyi mu ngoongo beecha baasiingiramo; 22olwohuba chino nicho endaalo ch'ohwetungiramo, ohwoseresa byoosi ebyandiikwa. 23Chakaanire abo abaliba nende abana nende abo abaliba nibanuunia abana mu biha ebyo! Olwohuba amasira amaangi kacha ohuba hu syaalo nende egiili ohuweera hu bandu bano; 24bancha ohwiitwa nende obusoonjo bw'engaanga handi bayirwe mu mboye mu byaalo biindi byoosi; mani Yerusaalemu sichia ohuseenakirwa mu makulu nende Abateende, ohwoola lu ndaalo ch'Abateende chiriweera. 25“Handi yicha ohubao obulolero hu lyuuba nende hu mwoosi nende hu ning'ining'i chosi, nae hu syaalo, ebyaalo bicha ohuba nende engisa nyiingi muno nibitiire ohuwoola hw'enyaanja huluundu nende ohukingana hw'amafwinda kaahwo, 26abandu boosi bacha ohufwichaanga obuti nibelalihiriire ebicha ohukwaao hu syaalo; olwohuba obunyala bw'omu Kulu bwosi bucha ohudengaanisibwa. 27Mani awo niwo yibacha ohubonera Omwana w'Omuundu niyeechera mu sireesi naali nende amaani mani nende oluyaali lubitiirifu. 28Nae bulaanu, ebiindu bino byoosi nibiba nibichaaka ohuholehana, eng'we musingisaanga emitwe cheeng'we, mani mutingaala akulu, olwohuba obuwonia bw'eng'we buba busuda aambi bweene.” 29Handi Yesu yeecha yabakaadira olukaado lundi ati, “Mubonere hu mutuli, nende kata hu misaala chiindi choosi; 30huchahasebuhira busa chiti amasaafu, mweboneraanga busa abeene mani mumanya muti esiminyu simalire ohwoola. 31Mani nasilala nilwo lubiri, nimubonaanga ebiindu bino nibikwao, manyeenge busa muti, Obwaami bwa Nasae buli aambi. 32Mbaboolera obwadyeeri endi, oluse luno haba silwahaweeo bino byoosi nibitaakwao. 33Ekulu nende esyaalo bicha ohuwao, nae emboosi change haba sichicha ohuwao. 34“Nae mweliinde abeene, emyooyo cheeng'we chitakatayaswa nende emilyo nende obumeesi nende ohwelalihirira hw'ebihoyera obulamu buno, bikere oludaalo olwo lwabakwaaho busa nimutetekeehe koti omuteego; 35olwohuba oludaalo olwo lucha ohwichira abandu bali hu syaalo huno boosi. 36Nae eng'we mube ameeso esiha syoosi, nimwekongooya Nasae muti muduhane amaani, ak'ohweyonia ebiindu bino byoosi ebicha ohukwaao, nende ohweema mu moni w'Omwaana w'Omuundu.” 37Mani Yesu yemeeda ohwekesanga buli ludaalo mu nyumba ya Nasae, nae nibweraanga yatulanga erwaanyi achia akona hu sigulu silaangwa Olibeti. 38Nae nibwahyechaanga echuli, abandu bawunaanga ohwiicha yali mu nyumba ya Nasae ohumutekeeresa.

will be added

X\