LUKA 20

1Ludaalo lundi, Yesu niyali ali ohwekeseraanga abandu mu nyumba ya Nasae handi naali ohuyalaanga Emboosi Ndai, abahuluundu babalaamisi nende abaandiiki b'amalako alala nende abahuluundu beenjia beecha 2mani bamuboolera bati, “Tuboolereho bunyala siina bwoholera ebiindu bino, oba wiina mweene owahuba obunyala buno.” 3Yesu yabakobolamo ati, “Ese syesi njia ohubateebaho esiteebo silala; bulaanu mu mboolereho, 4Ohubatiisa hwa Yowaana hwali hutula Mukulu kose mu bandu?” 5Mani beecha basiteesaho abeene-na-beene nibaboola bati, “Nihuboola huti, ‘Hwatula Mukulu,’ aba achia ohuboola ati, ‘Lwasiina simwamufukiirira?’ 6Nae nihuboola huti, ‘Hwatula mu bandu,’ abandu bano boosi baba bacha ohutuhubba amakina; olwohuba bamanyire bati Yowaana yali omunabbi.” 7Mani beecha bakobolamo bati haba sibamanyire yiyatula. 8Mani Yesu yeecha yababoolera ati, “Syesi siinjia hubaboolera bunyala buholera ebiindu bino.” 9Mani Yesu yachaaka ohukaadira abandu olukaado luno ati: “Olwoola, omusaacha wundi yalima endaalo y'emisabbiibu, mani yamala yayirehera abahosi, mani yamala yacha mu syaalo siindi embaka ndeeyi. 10Nae ebiha byohunoka ebyaamo nibyoola, yeecha yaatuma omuhalaabani mulala eyiri abahosi abo, bamubeereseho hu byaamo by'omuundalo eyo; nae abahosi abo beecha bamuhuya, mani bamwiirusa mahono mereere. 11Handi yeecha yaatuma omuhalaabani wundi; oyo yesi beecha bamuhuya bamala bamuswaasa muno, mani bamwiirusa mahono mereere. 12Handi yeecha yaatuma owohudatu; nae wuno beecha banyaala, bamala bamusukuna erwaanyi. 13Abweene awo, omweene ndalo oyo yeecha yaboola ati, ‘Ndaahole siina? Njia ohutuma omwaana wange muheerwa muno; awundi banyala ohumwisamo oluyaali.’ 14Nae abahosi abo nibamubona, beecha baboolanira abeene-na-beene bati, ‘Wuno niye omusiha mweene; lehe humwiite, obusiha bube obweefwe.’ 15Mani beecha bamusukuna erwaanyi w'endaalo y'emisabbiibu, mani bamwiita. Omweene ndalo y'emisabbiibu aba achia ohuholera siina abandu abo? 16Achia ohwiicha mani asihiriise abahosi abo, mani aberese abandu bandi endaalo y'emisabbiibu eyo.” Mani nibawulira sino, baboola bati, “Sitabaaho sityo kata nabudiidi!” 17Nae Yesu yabatingaala mani yaboola ati, “Mani esyandiikwa sino syekesa siina siti: ‘Ekina lyeene li bombahi balekeeresa, nilyo elyeholere ely'amaani mu soonda’? 18Buli muundu yeesi owegumula hu kina elyo, achia ohusasakuha; nae nilikwa hu muundu yeesi, licha ohumunyonyobola.” 19Abandiiki ba malako ka Musa nende abalaamisi bahuluundu bakesaho ohumukwaaho esiha syeene esyo, nae baatya abandu; olwohuba basiyira bati nibo bakaadire mu lukaado luno. 20Mani beecha bamwewunja bilai, mani bamala batuma abahemeresi, abebachirisa bafwaane koti abandu b'obwadyeeri, banyale ohumudiira mu mboosi chae, hu banyale ohumudiisa abobunyala nende obutuki bwa Gafana we Roomu. 21Beecha bateeba Yesu bati, “Omweekesa, humanyire huti byolomaloma nende biweekesa byadyeeri, handi haba siwehubbira, nae mu bwadyeeri bweene weekesa bi Nasae adaha abandu bahole. 22Mani sifukiirirwa efwe ohuberesa Kaisaali omusolo, kose haba?” 23Nae Yesu yeecha yafumbula obukodyo bwaabwe, mani yababoolera ati, 24“Munjekeseho ebbeesa. Esifwaanani nende obwandiike biriho bya naanu?” Baboola bati, “Bya Kaisaali.” 25Yesu yeecha yababoolera ati, “Mani mubeerese Kaisaali ebya Kaisaali, nae beerese Nasae ebya Nasae.” 26Mani haba sibanyala ohudiisa Yesu omusango kwoosi mu lwichuule lw'abandu ohweema hubiyalomaloma; nae bawuka muno engaluhamo yae, mani banyita chi. 27Abweene awo Abasadukaayo bandi, ababoola bati abulao ohusyuuha hw'abafwa, beecha eyiri Yesu, 28mani bamuteeba esiteebo nibaboola bati, “Omweekesa, Musa yatwandiikira ati, mwaanang'ina muundu naafwa yaleha omuhasi natebuuleho nae omwaana, omusaacha oyo ahoyere ohubukula omuhasi oyo, mani yebulira mwaanang'ina wafwa abana. 29Bulaanu, waliwo abasyaani b'enda ndala bataanu-na-babiri; omuhulundu waabwe yeecha yadeehya omuhasi, mani yafwa nataalehereho abana; 30handi owohubiri yesi yaamudeehya yaba atyo 31handi owohudatu yeecha yaamubukula mani byaaba bityo. Mani nasilala batyo boosi bataanu-na-babiri baafwa nibatelehereho abana. 32Lunyuma, omuhasi oyo yesi yeecha yafwa. 33Mani sakira mu husyuuha hw'abafu, omuhasi oyo achia ohuba owa wiina mweene? Olwohuba yadeheraho abasyaani bataanu-na-babiri abo boosi.” 34Nae Yesu yababoolera ati, “Abandu bo husyaalo huno nibo abadeehya handi badeeha; 35nae abo abahoyera ohuba mu bulamu bwiicha, nende mu husyuuha hw'abafwa, haba sibadeehya, handi kata sibadeeha, 36olwohuba sibanyala hufwa handi, olwohuba bali koti bamalaika, handi baana ba Nasae, olwohuba bali abana b'ohusyuuha mu bafwa. 37Nae ohweekesa mbwe abafu basyuuha, kata Musa yesi yekesa atyo, mu situundu sy'ebyandiiko byolerefu esidiira hu sichaha, syalangiramo Omwaami ati, Nasae wa Yibbulaimu, handi Nasae wa Yisaka, handi Nasae wa Yakobbo. 38Bulaanu haba saali Nasae wa bafu, nae ali Nasae wa balamu; olwohuba abandu boosi balamu yali.” 39Mani Abaandiiki ba malako bandi beecha bakobolamo bati, “Omweekesa, olomaloome bulai bweene.” 40Olwohuba ohutula hwolwo, abulao omuundu yeesi owateemaho ohuteebaho Yesu esiindu syoosi. 41Nae Yesu yababoolera ati, “Bahaboola batye bati, Kristo mwichuhulu wa Daudi? 42Olwohuba Daudi mweene aboola mu sitabo sy'Esabbuli ati, ‘Omwaami yaboolera Omwaami wange ati, Yihala hu muhono kwaange muluungi, 43ohwoola lu ndahahole abasuku bao babe esiteeni syowuluusiraho amakulu kao.’ 44Mbao, Daudi amulaanga ati Omwaami; mani handi yahaba atye omwichuhulu wae?” 45Mani Yesu yeecha yaboolera abeeki bae abandu boosi nibawulira ati, 46“Mweliinde abaandiiki ba malako, abaheera ohung'alaala nibefwaalire emiganjuula chereera, handi abadaha muno ohuheeswa nende oluyaali mu biito, handi abadaha muno ohwihalira mu bifwo by'oluyaali mu Sinagoogi nende mu bidyaalo, 47abayaaya amadaala k'abahasi bafwiire, handi abekongooya esaala ndeeyi nibekaadya. Abo bacha ohunyoola ohusaandisibwa huhiramo obubi.”

will be added

X\