LUKA 2

1Mundaalo echo, Kaisaali Agusito yatusa elako ati abandu boosi mu bwaami bwae bahoyeere ohubalibwa. 2Huno nihwo ohwali ohubalibwa hutangira Kwirino naali Gafana wa Siiria. 3Mani buli muundu yeesi yacha ohubalibwa, mu siko syae. 4Mani Yosefu yesi yatula mu Galilaaya, mu siko sye Nasareti, yacha e Buyudaaya, mu siko sya Daudi, esilaangwa siti Bbeteleheemu, olwohuba yali ow'enyumba handi ow'olwiibulo lwa Daudi, 5ohuchia ohubalibwa nende Maria, yiyali afukiirisaanie nae ohudeehisania. Maria oyo yali ali asito. 6Nae nibali eyo, ebiha byae by'ohwetusaho byoola. 7Mani yebula omwaana wae musyaani omwikula-nda, yamubwiha mu bikubo, mani yamwalisa mu bwaato bu byaayo biriiramo, olwohuba sibanyoola obweyaango mu nyumba chaabakeni. 8Nae mu syaalo esyo, mwalimo abaayi nibali mu syaayiro, nibaliindire ebyaayo byaabwe esiro. 9Mani malaika wa Nasae yeecha yababonehera, mani oluyaali lwa Nasae lweechula lwaaduha nilubebodohaanie, mani beecha besinduha muno. 10Nae malaika yababoolera ati, “Mutaba nohutya; olwohuba bone, mbaleetera emboosi ndayi ch'esangaalo liingi, ericha ohuba hu bandu boosi; 11olwohuba olwaleero luno, mu siko sya Daudi, Omuwonia abebuliirwe, niye Kristo Omwaami. 12Mani hano niho ahanaba ahalolero heeng'we: mucha ohwakaana omwaana mudoto yibabwihire mu bikubo, handi niyeyaliise mu bwaato bu byaayo biriiramo.” 13Nae bwaangu-bwaangu, malaika oyo alala nende bamalaika bandi bangi abo Mukulu baboneha nibafumia Nasae nibaboola bati, 14“Oluyaali lube eyiri Nasae akulu Mukulu, nae emireembe kibe hu syaalo mu bandu abahola ebiindu bisangaasa Nasae!” 15Nae Bamalayika nibatulao bawao bacha Mukulu, abaayi beecha baboolanira abeene-na-beene bati, “Mulehe huchie e Bbeteleheemu, hubone esiindu sino esiholehaane, si Nasae atwekeese.” 16Mani badindikirira ohuchia, bakaana Maria nende Yosefu, alala nende omwaana mudoto oyo, niyeyaliise mu bwaato bu byaayo biriiramo. 17Mani nibabona omwaana oyo, batumbula ebyo ebyali bibabooleerwe ebidiira hu mwaana wuno; 18Mani abo boosi ababiwulira, bawuka muno ebyo bi baayi bali nibababoolere. 19Nae Maria yabiiha ebiindu bino byoosi, nabibasaangaho muno mu mwooyo kwae. 20Mani abaayi bakobolayo ewaabwe, nibakinia handi nibaberesa Nasae oluyaali, hulweebyo byoosi bibali nibawuliire handi nibabweene, olwohuba byali busa koti lubyali nibibaboolerwe. 21Nae oluunyuma lw'endaalo chitanu-na-chidatu, omwaana niyali amalire ohuhebwa, yabeereswa eliita mbwe Yesu, eliita li malaika yaamubeeresa natayerwa munda. 22Nae ebiha nibyoola eby'ohulabisibwamo babe abolerefu, koti elako lya Musa lyali, Yosefu nende Maria baleeta Yesu e Yerusaalemu ohumudiisa Nasae 23(koti lu syandiikwa mu lako lya Nasae siti, “Buli mwaana musyaani yeesi, owikula enda ya ng'ina achia ohulangaangwa omwolerefu wa Nasae” ) 24handi bacha ohutusaanga esiyaanwa esihoyerwa koti lu lako lya Nasae liboola liti, “Amaguugu kabiri, oba amaburuku madoto kabiri.” 25Bulaanu, mu Yerusaalemu, mwalimo omusaacha olaangwa mbwe Simioni, owali omulungifu handi owaheera Nasae muno, owali nalindaanga ohulemeswa omwooyo hwa abandu ba Yisirayiri, handi nga Mwooyo Mwolerefu amuliho. 26Handi yali yamala ohwekeswa nende Mwooyo Mwolerefu ati, haba saachia hufwa nataabona Kristo wa Nasae. 27Mani niyali niyemiriirwe nende Mwooyo, yeecha mu nyumba ya Nasae; mani abebusi ba Yesu nibali hubamwiingisa bati mu nyumba ya Nasae, bamuholere koti lu lako liboola, 28Simioni yeecha yaakiinga Yesu mu mahono, mani yebasa Nasae naboola ati, 29“Omwaami, bulaanu onyala ohuleha omuhalaabani wao yawaawo mu mireembe, koti lu mboosi yao yiboola; 30olwohuba emoni change chimalire ohubonaho obuwonia bwao 31bu ewe mweene watekehera mu moni w'abandu boosi, 32obulafu bubonera Abateende, handi obw'oluyaali eyiri abandu bao Yisirayiri.” 33Mani simwaana nende ng'ina bawuka muno ebiindu byali bimulomalomwaho; 34handi Simioni yabasabira omukisa mani yaboolera Maria ng'ina ati, “Bona, omwaana wuno ateerweo hulw'ohukwa nende ohusiingira hw'abandu bangi mu Yisirayiri, handi nende ohuba esilolero siyinganisibwa 35(handi olugaanga lucha ohuhufumita lubite mu mwooyo kwao kwosi), hu bibaaso by'emyooyo miingi binyale ohubonehana alafu.” 36Handi waliwo nabbi muhasi, Ana, omuhaana wa Fanueli, ow'oluyia lw'Asheri; yali omukofu naali nende emyaaka miingi muno. Ohutula nawamo omubiri ati, yamenya nende wamwe wamutusamo omubiri oyo emyaaka chitanu-na-chibiri, 37mani yadoong'a koti omuhasi mufwiirwe olw'embaka y'emyaaka amahumi kataanu-na-kadatu-na-kine. Haba siyalehaho enyumba ya Nasae, nae yabechaanga busa omwo nalaama, handi nasiiba alala nende ohwekongooya Nasae esiro nende esideete. 38Nae niyolerao ebiha byeene ebyo, yebasa Nasae, handi yaboolera abo boosi abali baliindiriire ohuwonisibwa hwa Yerusaalemu, ebidiira hu mwaana oyo. 39Nae nibamala ohuhola ebyo byoosi, bi lako lya Nasae liboola, bakobolayo mu Galilaaya, mu siko syaabwe syeene sye Nasareti. 40Mani omwaana oyo yahula, handi yaba ow'amaani, niyechula amakesi; handi ehabi ya Nasae yamuliho. 41Bulaanu abebusi bae bachichaanga e Yerusaalemu buli mwaaka hu sidyaalo sya Paasaka. 42Mani Yesu niyoosa emyaaka ehumi nende chibiri ech'obuhuluundu, beecha bacha e Yerusaalemu, koti lubali nibaholaanga; 43Nae esidyaalo nisyawa, nibali nibakobolayo engo, omuraaga wuno Yesu yadoong'a enyuma mu Yerusaalemu. Nae sino, abebusi bae haba sibasimanya, 44nae koti lubali babaasa bati ali mu basye babakeenda nabo, bakeenda oludaalo olulaamba nibatamubona, mani bachaaka ohumukoonya mu beeho bwaabwe nende mu bandu babamanyire; 45nae nibatamuduuhana, bakaluha e Yerusaalemu nibamukoonya. 46Endaalo chidatu nichabitao, bamuduhana naali mu nyumba ya Nasae, niyehaale mu beekesa, nabatekeresaanga handi nabateebaanga ebiteebo; 47mani abo boosi abawulira by'aboola, bawuka muno amakesi kae nende engaluhamo yae. 48Nae abebusi bae nibamubona, bawuka muno; mani ng'ina yamuboolera ati, “mwaana wange, lwasina otuholere otyo? Bone, ese nende lataao koti lu huhukoonyere nihwaabaaba.” 49Nae yabakobolamo ati, “Bibeere bitye ohungoonya? Mubeere mukoterwe muti hoyeere ohuba mu nyumba ya Lata?” 50Mani byabahaya ohumanya biyeemaho ohubaboolera ebyo. 51Mani Yesu yasingira yawaawo nabo bakobola e Nasareti, mani yaba omuwulisi yibali; nae ng'ina yabiiha ebiindu bino byoosi mu mwooyo kwae. 52Mani Yesu yemeeda ohuhula, handi amakesi kae kemeeda, handi yemeeda ohuheerwa nende abandu alala nende Nasae.

will be added

X\