LUKA 19

1Yesu yacha yengira mu Yeriko mani yali nasibitamo. 2Nae waliwo omusaacha wundi olaangwa Sakayo; owali omutoosa w'omusolo, handi omuyiinda muno. 3Mani yali nadaha muno ohubona Yesu koti lwafwaana, nae haba siyanyala ohumubona ohweema hu bungi bw'abandu, handi yali omuundu mwimbikiti muno. 4Mani yeecha yeruha yacha mu moni w'esidiyiha, mani yaniina hu musaala muhuyu hw'anyale ohubona Yesu, owali achia ohubitira ebweene eyo. 5Nae Yesu niyoola mu sifwo esyo, yatingaala akulu mani yamuboolera ati, “Sakayo, yanguyaho bwaangu wiihe aasi; olwohuba lwaleero luno hoyeere ohuba mu nyumba yao.” 6Mani Sakayo yanguyaho, mani yeeha aasi bwaangu, yakaanira Yesu nende esangaalo liingi muno. 7Nae abandu nibabona batyo, boosi-boosi bachaaka ohweng'ulung'uunya nibaboola bati, “Bone, yahacha ohukeniya omusaacha muholi w'ebibi.” 8Nae Sakayo yasingira yeema, mani yaboolera Omwaami ati, “Omwaami bona, njia ohubeeresa abamanani esituundu sy'ebiindu byaange byoosi; handi nimba nindeebaho omuundu yeesi esiindu syoosi, njia ohumukoboserayo ebiindu ebyo, amahabi kane amalaamba.” 9Nae Yesu yamuboolera ati, “Olwaleero, obuwonia bwiichire mu nyumba yino, olwohuba wuno yesi mwichuhulu wa Yibbulaimu. 10Olwohuba Omwaana w'Omuundu yeecha ohukoonya nende ohuwonia abakota.” 11Abandu nibawulira ebiindu bino, Yesu yeecha yemeeda ohubakaadira olukaado, olwohuba yali aambi ohwoola e Yerusaalemu, handi olwohuba abandu bali babaasirisa bati, Obwaami bwa Nasae bucha ohwoola ebiha byeene ebyo. 12Mani sakira Yesu yeecha yababoolera ati, “Olwoola, omusaacha w'oluyaali wundi, yatula yaacha mu syaalo sy'eyale muno bamubeerese obwaami, mani amale akobole. 13Yecha yalaanga abahalaabani bae ehumi, mani yamala yababeeresa epawundi ehumi, mani yababoolera ati, ‘Muchurusire eseende chino ohwoola lundirikobola.’ 14Nae abandu bomu bwaami bwae bali bamusyula, mani beecha batuma bawamwaanda ohumulondaho nibaboola bati, ‘Sihudaha omusaacha wuno atutuke.’ 15Mani niyakobola, naamalire ohunyoola obwaami, yeecha yaalagira bamulaangire abahalaabani bayali yabeeresa eseende, anyale ohumanya obuhala bubanyoola mu buchurusi bwaabwe obwo. 16Owataangira mweene, yeecha mu moni wae, naboola ati, ‘Omwaami, epawundi yao, yebula epawundi chiindi ehumi.’ 17Mani yeecha yamuboolera ati, ‘Oholere bulai muno, oli omuhalaabani mulai mweene! Olwohuba obeere omwesikwa mu siindu sidiidi, mani ochia ohutuka ebiko bihuluundu ehumi.’ 18Handi owohubiri yeecha naboola ati, ‘Omwaami, epawundi yao, yebula epawundi chiindi chitaanu.’ 19Nae yamuboolera ati, ‘Mani ewe ochia ohutuka ebiko bihuluundu bitaanu.’ 20Handi owundi yeecha naboola ati, ‘Omwaami, epawundi yao ngino, ndayibiiha bulai adiiyu mu sitambaara; 21ndahutya muno, olwohuba oli omusaacha omudinyu mweene; obukula byotabiiha, handi wakesa byotataaka.’ 22Yamuboolera ati, ‘Ewe omuhalaabani mubi muno, njia ohuhuheengera omusango ohweema hu byolomaloome omweene nende omunwa kwao! Ewe hane wamanya oti ndi omusaacha mudinyu, obukula bitabiiha, handi okesa bitataaka? 23Mani lwasiina siwachia waata eseende change mu biihiro ly'eseende, mani nindahakoboole, sindahachitusireyo nichiriho obuhala?’ 24Mani Yesu yeecha yaboolera abo abali nibeemere aambi awo ati, ‘Mumubukuleho epawundi eyo, mani muyibeerese oyo oli nende epawundi ehumi.’ 25Nae beecha bamuboolera bati, ‘Omwaami, oyo ali nende epawundi ehumi!’ 26‘Mbaboolera endi, buli muundu yeesi oli nabyo, achia ohumeedwa ebiindi; nae oyo yeesi otaliho nende esiindu, kata nende ebyo biyaba ali nabyo bicha ohumutusibwaho. 27Nae abasuku bange bano, abatadaha ese mbatuke, mubaleete ano mani mubeetere mu moni wange.’ ” 28Mani Yesu niyamala ohuboola atyo, yeecha yemeeda mu moni ohuchia e Yerusaalemu. 29Mani niyali aambi ohwoola e Bbetifaage nende e Bbetani, hu sigulu silaangwa siti Olibeti, yeecha yaatuma abeeki bae babiri 30naboola ati, “Muche mu lukoongo lubali mu moni olwo, mani nimunaba humwingiramo muti, mucha ohunyoola omwaana kw'esuhiri nikuboyerwe, ku muundu yeesi atehalaho hooho; mukuboolole mani mukuleete ano. 31Nae omuundu yeesi nabateeba ati, ‘Lwasiina muli ohukuboolola?’ mumuboolera sino muti, ‘Omwaami niye okudaha.’ ” 32Mani abatumwa abo, nibatula bacha bakaana busa koti lu Yesu yali ababooleere. 33Mani nibali hubaboololanga omwaana kw'epunda okwo, abeenekwo beecha bababoolera bati, “Lwasiina muli ohuboolola omwaana kw'esuhiri okwo?” 34Nabo baboola bati, “Omwaami niye okudaha.” 35Mani beecha bakuleetera Yesu, mani nibamala ohusukuna engubo chaabwe hu mwaana kw'esuhiri okwo, beecha behasaho Yesu. 36Mani omwaana kw'esuhiri nikwali kukiingire Yesu naacha, abandu beecha bachaaka ohwaala engubo chaabwe hu ngira. 37Nae bulaanu niyali aambi ohwoola e Yerusaalemu, naali husiihiriro sy'Olugulu lwa Olibeti, esidiyiha sihoongo sy'abeeki, syachaaka ohwehoya handi nisifumia Nasae mu kono hoongo muno, hulw'emirimo mikali chibali nibabweene, 38nibaboola bati, “Ali nende ehabi Omutuki oyo owiicha mu liita ly'Omwaami! Emireembe chibe Mukulu, handi oluyaali lube akulu Mukulu!” 39Nae Abafalisaayo bandi abali mu sidiyiiha beecha bamuboolera bati, “Omweekesa, kaania abeeki bao.” 40Nae Yesu yakobolamo ati, “Mbaboolera endi, kata bano boosi nibawuleera, amakina keene kacha ohuyokera.” 41Yesu niyasuda aambi mani yabona esiko sihuluundu esyo, yasirira muno, 42naboola ati, “Biba mbwe olwaleero luno wamanya ebiindu bileeta emireembe! Nae bulaanu ebyo byahwekisaho. 43Olwohuba endaalo chicha ohwoola, abasuku bao bacha ohuyaba olukoba, mani bahwebodoohane, mani bahwikalire embeka choosi, 44mani bamale bahubbe aasi, ewe alala nende abaana bamenya mu lukoba lwao, mani sibachia huhulehamo ekina hu liindi; olwohuba siwamanya esiha sy'obuwonia bwao nisyoolere.” 45Mani Yesu yeecha yengira mu nyumba ya Nasae mani yachaaka ohwirusamo abo abali nibachurusiramo, 46naboola ati, “Syandiikwa siti, ‘Enyuumba yange yicha ohuba enyumba y'ohwekongooyeramo’; nae eng'we mwayihola obweyikamo bw'abanyaka.” 47Mani Yesu yachaaka ohwekesaanga buli ludaalo mu nyumba ya Nasae. Abalaamisi bahuluundu nende abandiiki b'amalako alala nende abandu b'oluyaali luhoongo beecha bachaaka ohukiiya engira y'ohumusihirisa; 48nae sibanyoola esiindu syoosi sibanyala ohuhola, olwohuba abandu boosi bali bahayiire hu mboosi chae.

will be added

X\