LUKA 18

1Handi Yesu yeecha yabakaadira olukaado lundi, olweekesa luti bahoyeere ohwekongoyaanga Nasae buli siha, batawaamo omwooyo. 2Yaboola ati, “Mu siko sihuluundu siindi, yaliwo omukayi w'emisango wundi, otaali niyatya Nasae handi otabaasaho hu muundu wundi yeesi; 3nae yosi yaliyo omuhasi mu fwiire wundi mu siko sihuluundu esyo, owali yedinya ohumwichaangaho naboola ati, ‘Ngwiire mani wuheengere omusango hire abasuku baange.’ 4Nae yeecha yahayaho hulw'esiha sidiidi; nae lunyuma yeecha yeboolera omweene ati, ‘Ndahaba mbwe ese sitya Nasae kata nende ohufwa hu muundu, 5nae olwohuba omuhasi mu fwiire wuno ali ohunyaasa-nyaasa, njia ohumukwiira, ataali awo aba achia ohunjoong'ya nende ohunonderesa hwae.’ ” 6Mani Omwaami yeecha yaboola ati, “Wulireho bi mukai w'emisaango otaali omulungifu byaboola. 7Nae Nasae salikwiira abadoole bae, abamulirira esiro nende esideete? Mani aba achia ohuhiinda muno ohubahoonya? 8Mbaboolera endi achia ohubakwiira bwaangu muno. Kata katyo, Omwaana w'Omuundu niyaheeche, mani achia ohwakaana efukiirira hu syaalo?” 9Yesu handi yeecha yakaadira olukaado luno abandu bandi abali nibemanyire abeene bati bali abolerefu mani nibalekeresaanga abasyaabwe, ati: 10“Olwoola, abasaacha babiri bacha mu nyumba ya Nasae ohwekongooya. Mulala yali Omufalisaayo nae owundi yali omutoosa w'emisolo. 11Omufalisaayo yema mani yesabira omweene naboola ati, ‘Nasae, hwebasa muno olwohuba siindi koti abandu bandi, abang'uusi, ababacha, abacheke, kata siindi koti omutoosa w'emisolo wuno. 12Siiba habiri hu juma, ngaba silala sy'ehumi syabuli siindu sifuna.’ 13Nae omutoosa w'emisolo yeecha eyale muno, natanyala kata ohusiingisa emoni chae yaatingaala Mukulu, mani yachaaka ohwehubba esirifu naboola ati, ‘Nasae, ngwiire esisa, ese omuholi w'ebibi!’ 14Mbaboolera endi, omusaacha wuno yakobola engo wae naali omwolerefu mu moni wa Nasae ohuhira Omufalisaayo wula; olwohuba buli muundu yeesi oweniinia achia ohwiiswa aasi, nae oyo yeesi oweyisa aasi, achia ohuniiniswa.” 15Bulaanu, abandu bachaaka ohuleeta abana bayere eyiri Yesu abadiireho nende amahono kae; nae abeeki bae nibabona sino, beecha baabakayira. 16Nae Yesu yabalaanga beeche yali naboola ati, “Mulehe abana beeche yindi, handi mutabakayira; olwohuba, abali bati, nibo abeene Bwaami bwa Nasae. 17Mbaboolera obwadyeeri endi, oyo yeesi otakaanira Obwaami bwa Nasae koti omwaana muyere haba saachia hubwingiramo.” 18Mani omutuki wundi yeecha yateeba Yesu ati, “Ewe Omweekesa mulai, siina syeene sihoyera ohuhola hu nyoole obulamu butaakama?” 19Nae Yesu yamuboolera ati, “Lwasiina wunaanga oti omulai? Abulao omuundu mulai ohutusaho Nasae yeng'ene. 20Omanyire amalako kano: ‘Otaholaanga obucheke, Otetaanga, Otebaanga, Otatusaanga obuloli bw'obubacha, Yisaanga mu latao nende mao oluyaali.’ ” 21Nae yeecha yaboola ati, “Bino byoosi, ndabiloonda ohutula mu buyere bwaange.” 22Mani Yesu niyawulira atyo, yamuboolera ati, “Osiibulwaho esiindu silala. Kusa ebiindu byao byoosi, mani okabire abamanani, mani ochia ohunyoola obuyiinda Mukulu; mani wiiche, wunonde.” 23Nae oyo niyawulira atyo, yeecha yaanyoolera muno, olwohuba yali omuyiinda muno. 24Nae Yesu yamutingaala mani yaboola ati, “Nga sidinyu muno abayiinda ohwingira mu Bwaami bwa Nasae! 25Syaangu muno engamia ohubita mu moni y'esindaani, ohuhira omuyiinda ohwingira mu Bwaami bwa Nasae.” 26Nae abawulira sino beecha baboola bati, “Mani wiina mweene onyala ohuwonisibwa?” 27Nae Yesu yaboola ati, “Esitanyalihana eyiri abandu, sinyalihana eyiri Nasae.” 28Nae Peetero yeecha yaboola ati, “Eee, efwe hwaleha amadaala keefwe mani hwahuloonda.” 29Nae Yesu yeecha yababoolera ati, “Mbaboolera obwadyeeri endi, abulao omuundu yeesi, owaleha enyumba, oba omuhasi, oba bamwaanang'ina, oba abebusi, oba abana, hulw'Obwaami bwa Nasae, 30otachia hunyoola amahabi maangi ak'ebyeene ebyo, mu biha bino, handi nende obulamu butaakama mu ndaalo chiicha.” 31Yesu yeecha yabukula ehumi-na-babiri abo yabayira endulo, mani yababoolera ati, “Bone, mbano huli ohuchia e Yerusaalemu, mani buli siindu syoosi si banabbi bandiika hu Mwaana w'Omuundu sichia ohwosereswa. 32Olwohuba achia ohudiiswa Abateende, mani bamudyabuhire, handi bamuyire bubi, handi bamufucheho; 33bacha ohumunaala ehoba, mani bamwiite, nae hu ludaalo lw'ohudatu, achia ohusyuuha.” 34Nae abeeki bae haba sibanyala ohumanya biyali naalomalomaho; olwohuba enomanoma yino yali yabakiswaho, mani bahaya ohudiira ebyali nibilomaloomwe. 35Yesu niyoola aambi nende Yeriko, omusaacha muwofu wundi yali yehaale hu ndulo w'engira nasabirisaanga. 36Nae niyawulira esidiyiha sy'abandu nisibita, yeecha yateeba esyali nisikwiireo. 37Bamuboolera bati, “Yesu we Nasareti niye oli ohubita.” 38Mani yachaaka ohulira naboola ati, “Yesu, omwichukulu wa Daudi, ngwiire esisa!” 39Nae abo abali nibali mu moni wae bachaaka ohumuhabuhira nibamuboolera bati awuleere; nae yemeeda ohulirira mu kono ly'akulu naboola ati, “omwichuhulu wa Daudi, ngwiire esisa!” 40Mani Yesu yeecha yeema, yaalagira ati bamuleete yali; mani niyoola aambi, Yesu yamuteeba ati, 41“Siina syodaha huholere?” Nae yaboola ati, “Omwaami, leha handi nyale ohubona.” 42Nae Yesu yamuboolera ati, “Chaaka handi ohubona; efukiirira yao yihuwonisye.” 43Mani abweene-na-bweene awo nachaaka ohubona, mani yaloonda Yesu naberesa Nasae oluyaali; mani abandu abo boosi nibabona sino, beecha bakinia Nasae.

will be added

X\