LUKA 17

1Handi Yesu yeecha yaboolera abeeki bae ati, “Ebihemo bikera omuundu yahola ebibi bicha ohubaao; nae chimwakaanire oyo obileeta! 2Syahamubereere esilai ohuboyebwa mu kosi wae ekina hoongo libasyeraangaho, mani yamala yaasukunwa mu nyaanja, ohuhira lwakera mulala hu baana bayere bano, ohuhola esibi. 3Mani mweliinde abeene; mwaanamao naahola esibi, mwekese esibi syaba naaholere, nae niyeyolobya, muleheremo; 4nae nahuholera ebibi amahabi kataanu-na-kabiri mu ludaalo lulala, handi yakobola yooli amahabi kataanu-na-kabiri, naboola ati, ‘Ndeyolobya,’ ohoyeere ohumuleheramo.” 5Abatume beecha baboolera Omwaami bati, “Twongesemo efukiirira!” 6Nae Omwaami yaboola ati, “Muba muli nende efukiirira yaakana nende olumwo lw'omutuumba, mwahaboolere omusaala muhuyu kuno muti, ‘Weyiye, mani ochie wetaake mu nyaanja,’ mani kwahabawuliire. 7“Ali hoo hweeng'we, oli nende omuhalaabani olima oba owaaya amakoondi, onyala yamuboolera niyahenuha ati, ‘Yicha bwaangu wihale hu meesa olye’? 8Oba natamuboolere ati, ‘Taangira mberi wundekehere esy'engoloobe, omale weterese bulai mani wiche wuninde, male ohulya nende ohung'wa; hu lunyuma wesi hwoche olye handi hwong'we’? 9Mani omwenengo oyo, anyala yebasa omuhalaabani oyo olwohuba aholere syaatumirwe ohuhola? 10Mani mwesi, nimuba nimuholere ebyo byoosi bimutumirwe ohuhola, muboleenge muti, ‘Efwe huli busa abahalaabani abatahoyeera; huholere busa ebiindu bihuhoyeere ohuhola.’ ” 11Yesu niyali hu lukeendo ohuchia e Yerusaalemu, yabitira hu lwaaho lukabuhania esyaalo sya Samaria nende esya Galilaaya. 12Mani niyali hu huyaheengira mu lukoongo lundi, yabukanana nende abasaacha bagenge ehumi, abemaho eyale nae 13mani behuuma nibaboola bati, “Omwaami Yesu, tukwiire esisa.” 14Nae Yesu niyababona, yeecha yababoolera ati, “Eng'we muche mweyekese eyiri abalaamisi.” Mani nibali hu bacha, beecha baonisibwa. 15Nae mulala hw'abo, niyabona ati amalire ohuwona, yakaluhaana yacha eyiri Yesu naakinia Nasae mu kono ly'akulu; 16mani yaakwa, yafumama aasi mu makulu ka Yesu, namwebasa muno. Bulaanu, omusaacha wuno yali Omusamaria. 17Mani Yesu yeecha yaboola ati, “Abandu baonisibwe, haba sibabeere ehumi? Nae bataanu-na-bane bali yena? 18Abulao wahakoboole ohukinia Nasae ohutusaho omuteende wuno?” 19Mani Yesu yeecha yamuboolera ati, “Siingira mani ochie yocha; efukiirira yao yihuwonisye.” 20Abafalisaayo nibateeba Yesu lu Bwaami bwa Nasae bucha ohwiichira, Yesu yakobolamo ati, “Obwaami bwa Nasae haba sibuchia ohwiicha nende obulolero buboneha; 21oba, sibahaboole bati, ‘Eee, mbano buli ano!’ oba bati, ‘Mbula buli era!’ olwohuba bone, Obwaami bwa Nasae buli akati-kaati w'eng'we.” 22Mani Yesu yeecha yaboolera abeeki bae ati, “Endaalo mbawo chiicha, lu mwahekombere ohubonaho hu ludaalo lulala lw'Omwaana w'Omuundu, nae simuchia hulubona. 23Mani bahababoolere bati, ‘Eee, mbawo buli era!’ oba, ‘Eee, mbano buli ano!’ Nae mutacha, mutabaloondaho. 24Olwohuba, koti lu lumesu lumyesuhaanga mani luhosa ekulu ohutula hu luwaande lulala ohwoola hu luwaande lundi, nilwo lu Mwaana w'Omuundu achia ohuba hu ludaalo lwae. 25Nae ahoyeere ohusaandisibwa mberi mu biindu biingi muno, handi yebwabwe nende olwiibulo luno. 26Koti lu byali mu ndaalo cha Nowa, nilwo lu bicha ohuba mu ndaalo ch'Omwaana w'Omuundu 27Abandu bali nibalichaanga, nibang'wechaanga, nibadehyaanga, handi nibadehaanga, ohwolera elalira hu ludaalo lu Nowa yengirira mu lyaato, mani amaachi k'ofwomboole keecha kabasihirisa boosi. 28Handi nasilala koti lubyali mu ndaalo cha Luti, -- abandu balichaanga, bang'wechaanga, bakulanga, bakusaanga, bataakaanga, bombahaanga, 29nae hu ludaalo lu Luti yatulira mu Sodomu, omuliro nende enjeserye byakwa ohutula Mukulu mani byabasihirisa boosi. 30Handi nilwo lusicha ohuba hu ludaalo lu Mwaana w'Omuundu yahabonehere. 31Hu ludaalo olwo, leha oyo oli hu sirama sy'enyumba, yi biindu byae biri mu nyumba, ahaye ohwiiha aasi ohubibukula; handi nasilala, leha oyo oli mu ndalo ahaye ohukobola engo. 32Mwichulise omuhasi wa Luti. 33Oyo yeesi okoonya ohuliinda obulamu bwae, achia ohubufwiirwa, nae oyo ofwiirwa obulamu bwae, achia obuliinda. 34Mbaboolera endi, mu siro esyo, abaliba babiri hu sitaanda silala; mulala yahayirwe, nae owundi alehwe. 35Abahasi babiri abaliba alala nibali ohusya; mulala aliyirwa nae owundi alehwe.” 36 37Nae abeeki bae beecha bamuboolera Yesu bati, “Omwaami, yena bweene?” Nae yababoolera ati, “Yi mubiri kuba, niyo yi eswi chahebuusire alala.”

will be added

X\