LUKA 16

1Yesu handi yaboolera abeeki bae ati, “Olwoola, waliwo omusaacha munyali wundi owali nende omuliindi wae, mani abandu bandi beecha bamwekanyiisira muno ebidiira hu musaacha wuno, nibaboola bati, yali anyaasa-nyaasa emyaandu chae. 2Mani omusaacha munyali yeecha yalaanga omuliindi oyo, mani yamuboolera ati, ‘Siina syeene sino siindi ohuhuwuliraho? Mberese embaliirira y'obuliindi bwao, olwohuba sochia huba handi omuliindi w'ebiindu byaange.’ 3Mani omuliindi oyo yeecha yaboola omweene mu mwooyo kwae ati, ‘Ndaahole siina syeene, olwohuba omwaami wange mbano achia ohumalaho omulimo kw'obuliindi? Ese mbula amaani k'ohulima, handi ohwesabirisa hunyaambya esoni. 4Heengereo esy'ohuhola, hu bandu bandi banyale ohumbukaanira mu madaala kaabwe, nibanjiruuse hu mulimo kw'obuliindi kuno.’ 5Mani yeecha yalangaanga buli muundu yeesi owali nende ekobi ly'omwaami wae syamulala-mulala, mani yeecha yaboolera owataangira ati, ‘Omwaami wange ahubaanja siina?’ 6Nae naboola ati, ‘Ebikero emia ndala eby'amafuta.’ Nae omuliindi oyo yeecha yamuboolera ati, ‘Mani bukula obwandiike bw'efukiirisania yao, mani wihale aasi bwaangu, wandiike ebikero amahumi kataanu.’ 7Handi yeecha yamuboolera owundi ati, ‘Nae ewe obaanjwa siina?’ Nae yamuboolera ati, ‘Ebikero emia ndala by'eng'aano.’ Omuliindi oyo yeecha yamuboolera ati, ‘Mani bukula obwandiike bw'efukiirisania yao, omale wandiike amahumi kataanu-na-kadatu.’ 8Omwaami oyo yeecha yaasiima muno omuliindi otaali nende obwesikwa wuno hulw'obukesi-kesi bwae obwo; olwohuba abana b'esyaalo sino bakesi-kesi muno mu ngeri yibadiiraniramo nende oluse lwaabwe ohuhira abana b'obulafu. 9Mani sakira mbaboolera endi, mwehoonyere mammona chitaali enungifu, ohwewaambira abeecha mani ebiha nibyoola chabawaaho, banyala baabakaanira mwaba mu bumenyo butaakama. 10“Oyo yeesi oba omwesikwa mu biindu bidiidi muno aba anaba omwesikwa mu biingi byosi; nae oyo otaali omwesikwa mu biindu bidiidi muno, haba saaba achia ohuba omwesikwa mu biindu biingi byosi. 11Mani nikali mbwe haba soobeere omwesikwa mu mammona chitaali enungifu, wiina mweene ochia ohuhubiihisa obunyali bwadyeeri? 12Handi nikali mbwe soobeere omwesikwa mu biindu by'owundi, wiina ochia ohuhubeeresa ebiindu byao byeene? 13Abulao omuhalaabani onyala ohuhalaabanira abaami babiri; olwohuba achia ohusyuula mulala nae aheere owundi, oba aba achia ohwiisa oluyaali mu mulala nae alekerese owundi. Mani sonyala ohuhalaabanira Nasae nende mammona.” 14Abafalisaayo abali baheera muno eseende, nibawulira bino byoosi, beecha bechusuula muno Yesu. 15Nae Yesu yeecha ababoolera ati, “Eng'we ning'we abelyooya abeene mu moni w'abandu, nae Nasae amanyire emyooyo cheeng'we koti luchiri; olwohuba esyo si bandu bakinia, siwumamo obuhoonyi mu moni wa Nasae. 16“Amalako ka Musa nende obwandiike bw'abanabbi byali nibyo ebiri nende obunyala ohwoola hu Yowaana; nae ohutula awo, Emboosi Ndai y'Obwaami bwa Nasae yiri ohuyaalwa, mani buli muundu ali ohubwiingiraangamo nende esirifu. 17Nae syaangu muno Ekulu nende esyaalo ohuwao, ohuhira kata ahatonyese halala hong'ene ah'amalako ka Musa ohunyaasibwa. 18“Omuundu yeesi owirusa omuhasi wae, mani yadeehya owundi, aba aholere obucheke, handi oyo yeesi odeehya omuhasi waloba omusaacha, yesi aba ahola obucheke. 19“Olwoola, waliwo omusaacha munyali wundi, owali yefwalaanga engubo ch'oluyaali muno nende ech'elaasi ndayi muno, handi owalichaanga bulai buli ludaalo. 20Nae omusaacha mumanani, olaangwa Lasaaro, owali yechula amakoonjo hu mubiri, yeyalisanga hu siruwa sy'omusaacha munyali oyo. 21Lasaaro wuno, yekombanga ohulyaaho ebyohulya byali nibilakahaanga aasi ohutula hu meesa y'omusaacha munyali oyo; handi embwa chechaanga mani nichihomberera amakoonjo kae ako. 22Omusaacha mumanani oyo yeecha yafwa, mani yaakiingwa nende bamalaika bamuyira yehala mu makulu ka Yibbulaimu. Omusaacha munyali oyo yesi yeecha yafwa, mani yaasiihwa; 23mani niyali nasaandisibwa muno emakoombe, yeecha yaasingisa emoni chae, mani yabona Yibbulaimu naali eyale muno, handi Lasaaro niyehaale mu makulu kae. 24Mani yeecha yahuumula nalaanga ati, ‘Lata Yibbulaimu, ngwiire esisa, mani otume Lasaaro, yeenihe mu maachi olwala lwae mani yeeche anyiseho olulimi lwaange; olwohuba ndi mubuchuuni bungi muno mu muliro kuno.’ 25Nae Yibbulaimu yaboola ati, ‘Musyaani ng'ene, yichulisa oti, mu bulamu bwao hu syaalo, wanyoola ebiindu bilai byao; Lasaaro nae yanyoola ebiindu bibi; nae bulaanu ali mu bulamu buyenjeefu ano, naawe oli mu buchuuni bungi muno. 26Nae notusireho bino byoosi, akati-kaati w'efwe naawe, bataawo ehoondo ndakalafu muno, ohukayira abo boosi abahabitire ohutula eno nibeecha yimuli, handi abulewo oyo yeesi onyala ohuhalakania ohutula eyo ohwiicha yihuli.’ 27Nae yeecha yaboola ati, ‘Mani Lata hwekweeda, otume Lasaaro ache engo weefwe, 28olwohuba ndi nende ba mwaanama bataanu, ache abalabule, bosi bateecha mu sifwo sy'ohusaandisibwa sino.’ 29Nae Yibbulaimu yamuboolera ati, ‘Abo bali nende Musa alala nende abanabbi; leha babawulire.’ 30Nae yaboola ati, ‘Haba daawe, Lata Yibbulaimu; olwohuba niwichuhira omuundu yacha yibali natula mu bafu, bacha ohweyolobya.’ 31Nae Yibbulaimu yamuboolera ati, ‘Nibatawulira Musa nende abanabbi, mani haba sibachia ohuwulira omuundu yeesi kata asyuhe ohutula mu bafu.’ ”

will be added

X\