LUKA 15

1Olwoola, abatoosa b'emisolo nende abaholi be bibi boosi bachaaka ohwiicha eyiri Yesu ohuwulira bi yekesa. 2Nae Abafalisaayo nende abandiiki bamalako beecha bachaaka ohweng'ulung'uunya nibaboola bati, “Omusaacha wuno yakaanira abaholi be bibi handi yaalya nabo.” 3Mani Yesu yeecha yabakaadira olukaado luno ati, 4“Muundu siina hw'eng'we, oba nende amakoondi kae emia ndala, mani lala hwaako lyeecha lyakota, otahalehao amahumi kataanu-na-kane nende kataanu-na-kane kala mu saa, mani yacha yakoonya lala lira eliba nilikotere, ohwoola lwalyakaana? 5Mani naamala ohulyakaana, alikinga yaalita hu mabeka kae, niyehoya. 6Nae niyoola engo, alaanga abeecha bae alala nende abaasye, nababoolera ati, ‘Mwiiche hwehoyere alala, olwohuba malire ohwakaana ekoondi lyaange libeere likotere.’ 7Mbaboolera endi, mu ngeri nasilala yityo, nilwo lu mwehoyo mungi kucha ohuba Mukulu hu lw'omuholi we bibi mulala oweyolobya ohuhira abandu balungifu amahumi kataanu-na-kane nende bataanu-na-bane abatadaha ohweyolobya. 8“Oba muhasi siina, oba nende eseende mwaamwa ch'efeesa ehumi, mani yaakosa emwaamwa ndala, otawaambya etaara, yeya bulai bweene enyumba yoosi nakoonya, ohwoola lwayakaana? 9Mani naamala ohuyakaana, alaanga abecha bae alala nende abaasye, naboola ati, ‘Mwiiche hwehoyere alala, olwohuba njakaanire eseende y'emwaamwa yange eyali niyikotere.’ 10Mbaboolera endi, mu ngeri nasilala yityo, niyo lu bamalaika ba Nasae lubehoyera omuholi we bibi mulala oweyolobya.” 11Yesu handi yaboola ati, “Olwoola, waliwo omusaacha wundi owali nende abasyaani bae babiri; 12mani omusyaani muyere yeecha yaboolera simwaana ati, ‘Bbaabba, mberese esiha sino omukabo kwaange kw'obuyiinda kuwahambereese nofwiire.’ Mani saabwe yeecha yabakabaniamo obuyiinda bwae. 13Nae endaalo endiidi muno nichabitao, omusyaani muyere oyo yabuusa alala ebiindu biyali nabyo byoosi, mani yadiira olukeendo yacha mu syaalo sy'eyale muno, mani yachakia-chakira eyo obuyiinda bwae bwoosi mu bulamu bw'ohuchakala. 14Mani niyamala ohuhosesa buli siindu siyali nasyo, enjala nyiingi muno yeecha yaakwawo mu syaalo esyo, ohwoola luyadoong'a naabulaho esiindu syoosi. 15Mani yeecha yacha yaamenya nende mulala hu bandu bo musyaalo esyo, owamutuma ache mu mikuunda chae amulisire embiichi. 16Yoola ohwekoomba ohulya ebyoola bi mbiichi chalichaanga; nae abulao omuundu yeesi owamuberesa esiindu syoosi. 17Nae niyekaluhaho, yabaasa omweene naboola ati, ‘Nae baanga hu bahalaabani ba Bbaabba yapangisa abali nende emigaati chibalya handi chadoong'aho, nae ese ndi ohufwiira ano enjala! 18Ese njia ohusiingira mani njie eyiri Bbaabba, mani njia ohumuboolera endi, Bbaabba, ndakosa mu moni w'Ekulu nende mu moni wao; 19Sisihoyera ohulaangwa, omwaana wao; nae mbukule busa koti mulala hu bahalaabani bao bapangise.’ ” 20Mani yasingira mani yeecha eyiri simwaana. Nae niyali nasisiiri eyale, simwaana yamubona mani yaamukwiira esisa, mani yeruha yacha yamubukaanira yaamukwa mu sirifu. 21Nae omusyaani oyo yamuboolera ati, “Bbaabba, ndakosa mu moni w'Ekulu nende mu moni wao; Sisihoyera ohulaangwa omwaana wao.” 22Nae simwaana yaboolera abahalaabani bae ati, “Muleete bwaangu engubo yihiramo obulayi, mani mumufwase; handi mumuteeho engila hu muhono, handi mumufwase ebiraato mu makulu; 23mani muche muleete eng'ombe nginu muyiite, mani lehe hulye hwesangaase; 24olwohuba omwaana wange wuno yali yafwa, nae bulaanu mulamu; yali yakota, nae bulaanu abonehane.” Mani bachaaka ohwesangaasa. 25“Nae bulaanu, omusyaani wae muhuluundu yali naali mumukuunda; mani niyali naakobola, yoola aambi nende edaala, yeecha yawulira abandu nibeemba handi nibahina. 26Mani yeecha yalaanga mulala hu bahalaabani yamuteeba ati, ‘Siina syeene esikwiireo?’ 27Nae yamuboolera ati, ‘mwaanamaao yeechere, mani lataao amwitiire eng'ombe nginu, olwohuba amwakaanire naali omulamu abweene.’ 28Nae yeecha yaanyoolera muno, mani yahaya ohwingira mudaala. Nae simwaana yeecha yaatula erwaanyi yacha yamwekweeda yengire, 29nae yakobola mu simwaana ati, ‘Bonaho, huhalaabaniire busa emyaaka chino choosi, handi kata sindatenguyiraho amalako kao; nae osisiiri kata ohumbaaho busa ahameeme hong'ene, nyale ohwesangaasaho nende abeecha bange. 30Nae omusyaani wao wuno, owanyaasa omwaandu kwao nende abacheke niyeechere, ewe omwiitire eng'ombe nginu!’ 31Nae yamuboolera ati, ‘mwaana wange, buli siha oli naange ano, mani ebiindu byaange byoosi byao nibyo. 32Mani sibeere esilai muno hwesangaase handi hwehoye, olwohuba mwaanamaao wuno yali yafwa, nae bulaanu mulamu; yali yakota, nae bulaanu abonehane.’ ”

will be added

X\