LUKA 14

1Olwoola, hu ludaalo lwa Sabbaato lundi, Yesu yeecha yacha mu nyumba ya mulala hu bemirisi Bafalisaayo, nae niyali naalya, abandu bandi beecha bachaaka ohumwewunja. 2Mani bone, omusaacha wundi owali niyafwiimba amakulu nende amahono yeecha yi Yesu ali. 3Mani Yesu yeecha yaalomaloma nende abekesa ba malako nende Abafalisaayo naboola ati, “Mani sifukiirirwa ohuwonia hu ludaalo lwa Sabbaato, kose haba?” 4Nabo bawuleera busa. Mani Yesu yeecha yabukula omusaacha oyo, mani yamuwonia, mani yaamuleha yawaawo. 5Mani Yesu yeecha yababoolera ati, “Wiina mweene hweeng'we, oli nende omwaana wae, oba esurusi yae, eyiba niyikwiire mu buko, otatulaniramo yacha yamuhwesa yamutusamo hu ludaalo lwa Sabbaato?” 6Nabo sibanyala ohumukobolamo mu sino. 7Bulaanu, Yesu niyabona engeri yi bakeni balaange bali bedooleremo obwihalo bw'oluyaali luhoongo, yeecha yabakaadira olukaado nababoolera ati, 8“Nooba nolaangirwe hu sidyaalo sy'obweeya, otachichaanga wihala mu sifwo sy'oluyaali luhoongo muno, olwohuba oyo ohulaangire anyala ohuba nalaangire omuundu wundi ohuhirira elalira oluyaali; 9mani oyo obalaangire mwembi anyala ohwiicha yahuboolera ati, ‘Ewe yikulira wuno esifwo esyo,’ mani bulaanu ochia ohudiirwa esoni nosiingira nochia ohwihala mu sifwo sy'oluyaali lwa aasi muno. 10Nae nooba nolangirwe, chichaanga wihala mu sifwo sy'oluyaali lwa aasi muno, hu bulaanu obalaangire niyeecha, anyale ohuhuboolera ati, ‘Mwiicha wange, siingira ochie wihale akulu’; mani oba ochia ohufuna oluyaali mu moni w'abandu boosi ababa nibehaale naawe hu meesa. 11Olwohuba buli muundu weniinia omweene achia ohuloongoyaswa, nae oyo oweloongoyasa omweene, achia ohuniinisibwa.” 12Yesu yeecha yaboolera omuundu wali amulaangire yesi ati, “Nooba nokabula abandu ohulya oba hu sidyaalo, otalangaanga abeecha bao, kose bamwaanaamao, kose abanaluya bao, kose abasibirana naawe banyali, olwohuba bano bosi banyala ohuhulaanga oludaalo lundi, mani bahutunga. 13Nae nooba nokabula esidyaalo, langaanga abamanani, nende abadiimbe, nende abalema, nende abawofu, 14mani awo niwo yocha ohufunira ehabi, olwohuba abo haba sibanyala huhutunga. Ochia ohutungwa hu ludaalo lu boolerefu bacha ohusyuuhiraho.” 15Nae bulaanu mulala hu bandu bali nibehaale nende Yesu hu meesa, niyawulira sino yeecha yamuboolera ati, “Ali nende ehabi oyo owahalye omugaati mu Bwaami bwa Nasae!” 16Nae Yesu yeecha yamuboolera ati, “Olwoola, omusaacha wundi yeecha yakabula esidyaalo sihoongo muno, mani yalaanga abandu bangi muno ohwiicha. 17Mani esiha sy'esidyaalo nisyoola, yeecha yaatuma omuhalaabani wae ache aboolere abandu bali balaangirwe ati, ‘Mwiiche; olwohuba buli siindu sidahibwa simalire ohutekehwa.’ 18Nae boosi beecha bachaaka buli mulala ohwelira-bwelira. Owataangira yamuboolera ati, ‘Ese bulaanu hu ngulire omukunda, mani hoyeere njie kuboneho; hwekongooyere muno wundeheremo obuteecha.’ 19Handi owundi yeecha yaboola ati, ‘Ese bulaanu hundaakulire busa eng'ombe chirima emikoondo chitaanu, mani hoyeere njie mbone koti lu chirima; mani hwekongooyere muno wundeheremo obuteecha.’ 20Handi owundi yeecha yaboola ati, ‘Ese bulaanu hundadehiisye omuhasi, mani haba sinyala ohwiicha.’ 21Mani omuhalaabani oyo yeecha yaakobola mani yaboolera omwaami wae atyo. Mani etima lyeecha lyadiira omwenengo oyo mani yaboolera omuhalaabani wae oyo ati, ‘Cha bwaangu hu makira nende hu myanda chiri mu siko sihoongo, mani oleete abamanani, nende abadiimbe, nende abaofu, nende abalema.’ 22Mani omuhalaabani oyo yeecha yaboola ati, ‘Omuhulundu, ebyo byoosi biwumboleere ohuhola, mbyosereese endyo, nae handi obweyaango bundi busidong'ereo.’ 23Nae omwaami oyo yeecha yaboolera omuhalaabani oyo ati, ‘Tula mani ochie hu ngira hoongo choosi, nende otukira tudiidi twoosi, mani oleete abandu beengire bechule enyumba yange. 24Olwohuba ewe huboolera endi, abulao omuundu yeesi hu bandu bali balaangirwe ochia ohuhoombaho hu sidyaalo syaange.’ ” 25Bulaanu, ebidiyiha bihoongo biindi byeecha byachaana nende Yesu; mani yeecha yakaluhaana yababoolera ati, 26“Omuundu yeesi owiicha yindi, saanyala ohuba omweeki wange ohutusaho nga atangire mberi ohusyuula simwaana mweene nende ng'ina nende omuhasi wae, nende abaana bae, nende ba mwaanang'ina, nende ba mboochong'ene, eee, nende kata obulamu bwae bweene. 27Oyo yeesi otanyala ohukinga omusalabba kwae kweene, mani yanoonda, haba saanyala ohuba omweeki wange. 28Olwohuba, wiina mweene hweeng'we, oba nadaha ohwombaha omunara, otataangira mberi yehala aasi, mani yabaliirira obuungi bw'ebiindu bidahibwa, yabona oba ali nende ebiindu bimala ohwombaha omunara kwawa? 29Ataali awo, naamala ohwombaha omuse, mani byeecha byamuhaya ohumaliirisa, abo boosi abakubona, baba bacha ohumucheha, 30nibaboola bati, ‘Omuundu wuno yachaaka ohwombaha nae siyanyala ohumaliirisa.’ 31Oba mutuki siina, oba naachia ohulwaana nende omutuki wundi, atatangira mberi yehala aasi, yabaliira bulai naali nende abalwaani emitwaalo ehumi nanyala ohuyingira oyo omuseeta nende abalwaani emitwaalo amahumi kabiri? 32Mani naabona ati sibinyaliha, atuma bawamwaanda basabe ohuwuliirisania babe nende emireembe, omutuki waasye oyo nasisiiri eyale muno. 33Mani sakira, oyo yeesi mweng'we otebwaaba byoosi byali nabyo, saanyala ohuba omweeki wange. 34“Omuunyu mulai nikwo; nae omuunyu nikuwaamo echamu lyaakwo, kunyala ohukaluswamo kutye echamu elyo? 35Kubula obuhoonyi bwoosi hu loba, oba hu mbolera yosi; kusukunwa busa eyale. Oyo oli nende amatwi kawulira, leha awulire.”

will be added

X\