LUKA 13

1Esiha syeene esyo, waliwo abandu bandi ababoolera Yesu ebidiira hu Bagalilaaya ba Pilaato yasasaania amabaanga kaabwe nende ebiyaanwa byaabwe bibali bayirira Nasae. 2Nae Yesu yakobolamo ati, “Mubaasa muti Abagalilaaya bano bali abaholi be bibi ohuhiraho Abagalilaaya bandi hu beemeo basaandisibwe batyo? 3Mbaboolera endi, haba daawe; nae ohutusaho nimuteyolobya mwesi mucha ohusihirira mutyo. 4Oba, abandu ehumi-na-bataanu-na-badatu ba omunara kwe Siloamu kwakwaho mani kweta, mubaasa muti bali abaholi be bibi muno ohuhiraho abandu bandi boosi abali bamenya mu Yerusaalemu? 5Mbaboolera endi, Haba daawe; nae nimuteeyolobya, mwesi mucha ohusihirira mutyo.” 6Mani Yesu yeecha yabakaadira olukaado luno ati, “Waliwo omusaacha wundi owataaka omusaala kw'enduli mu ndalo yae; olwoola omusaacha oyo yeecha nakoonyaho ebyaamo, nae yahaya ohwakaanaho esyaamo syoosi. 7Mani omusaacha oyo yeecha yalaanga omulimi w'endaalo eyo, yamuboolera ati, ‘Aaa, ndaheecha ano emyaaka chidatu chino choosi ningonyaanga hu mutuli kuno esyaamo, nae haba sinyolaangaho esiindu syoosi. Mani bulaanu kuteme kukwe aasi; olwohuba simbona esikera nikuchiiririra ohunyaasa eloba lino?’ 8Nae omulimi oyo yeecha yamukobolamo namuboolera ati, ‘Omuhulundu, kulehe kubeo omwaaka kuno kwosi, ngwaakeho mu sisina kwebodoohanie, male kuteeho embolera. 9Mani nikwichuhana kwaamaho omwaaka kwiicha, siba sinaba esilai; nae nikuhaya ohwaamaho, bulaanu onyala ohukutema kukwa aasi.’ ” 10Olwoola, Yesu yali niyeekesa mu Sinagoogi yindi hu ludaalo lwa Sabbaato. 11Mani mubweene omwo, mwalimo omuhasi wundi wali aliho omusaambwa kwamulemya hulwa embaka ye myaka ehumi-na-chitaanu-na-chidatu emilaamba; yali niyefuumbamo omukoongo, natanyala kata ohweema nakololoohe. 12Mani Yesu niyamubona ati, yamulaanga mani yamuboolera ati, “Muhasi-ng'ene, omalire ohuwonisibwa obulema bwao.” 13Mani Yesu yeecha yamwiisaho amahono kae, mani abweene-na-bweene awo, ni omuhasi oyo akololoha, mani yachaaka ohufumia Nasae. 14Nae omwimirisi wa Sinagoogi eyo, yeecha yechula etima liingi olwohuba Yesu yali awonisye hu ludaalo lwa Sabbaato, mani yeecha yaboolera abandu ati, “Aliwo endaalo chisaasaba echihoyeere ohuholerwaho emirimo; mani mwiicheenge hu ndaalo echo muwonisibwa, nae mutechaanga hu ludaalo lwa Sabbaato.” 15Nae Omwaami yeecha yamukobolamo ati, “Abebachirisi eng'we! Mweng'we mweesi, naanu otaboololaanga eng'oombe yae kata esuhiri yae hu ludaalo lwa Sabbaato ayitusa mu sidwooli, mani ayiyira ohung'wa? 16Nae omuhasi wuno, omuhaana wa Yibbulaimu, yi Sitaani yaboya hu lwa embaka ye myaka ehumi-na-chitaanu-na-chidatu emilaamba, haba sahoyera ohuboololwa obuboye buno, hu ludaalo lwa Sabbaato?” 17Mani Yesu niyalomaloma sino, abasuku bae boosi esoni chabadiira muno; nae abandu baliwo boosi bachaaka ohwehoya hu lw'ebiindu by'oluyaali byoosi bi Yesu yali naaholere. 18Mani Yesu yeecha yaboola ati, “Obwaami bwa Nasae bufwaanana nende siina? Handi ndaabukeraanisye hu siina syeene? 19Bufwaanana nende olumwo lw'omutuumba lu muundu wundi yabukula yacha yataaka mu ndalo yae; mani lweechula lwahula, lwehola omusaala muhoongo, mani amayoni kabburuha keecha koombaha ebiswi mu masaga kakwo.” 20Yesu yeecha handi yahuboola ati, “Siina syeene sindaakeraanieho Obwaami bwa Nasae? 21Bufwaanana nende amamera ka omuhasi wundi yabukula mani yaacha yasaasa mu bikero by'obusye bidatu, ohwoola lu bwoosi bweecha bwebbaaha bwafwiimba bulai.” 22Yesu yeecha yakenda naabitira mu biko nende mu ngoongo, niyeekesaanga, handi naali hulukendo naachia e Yerusaalemu. 23Mani omuundu wundi yeecha yamuboolera ati, “Omwaami, abandu bacha ohuwonisibwa bahabe busa abayeranu?” Mani Yesu yeecha yababoolera ati, 24“Muteemeho muno ohwingirira mu mulyaango mudiiyu; olwohuba mbaboolera endi, abandu bangi bacha oteemaho ohwingira nae haba sibachia hunyala. 25Mani omwenengo niyahasiingire, mani yekalawo olwiiki, mucha ohweema erwaanyi muchaake ohuhong'oonda hu lwiiki nimuboola muti, ‘Omwaami, twiikulireo.’ Nae achia ohubakobolamo ati, ‘Ese haba siimanyire yimutula daawe.’ 26Nae mwahachaake ohuboola muti, ‘Efwe hwalichaanga handi hwang'wechaanga mu moni wao, handi weekesaanga mu makira keefwe.’ 27Nae achia ohuboola ati, ‘Mbaboolera endi, ese haba siimanyire yimutula daawe; mumbweere-eyi, eng'we mweesi abaholi be bibi!’ 28Eyo niyo yimucha ohulirira nimweesia ameeno, nimubona Yibbulaimu nende Yisaka nende Yakobbo nende banabbi boosi mu Bwaami bwa Nasae nae eng'we abeene nimusukuunwe erwaanyi. 29Mani bandu bahatule ebukwe nende emumbo, handi nende emu Kulu nende emwaalo, mani beehala hu meesa mu Bwaami bwa Nasae. 30Mani bone, aliwo abandu baheneerehayo bulaanu abacha ohutangiramo, handi aliwo abatangiramo bulaanu, abacha ohuba ohuheneerehayo.” 31Esiha syeene esyo, Abafalisaayo bandi beecha, mani baboolera Yesu bati, “Tula ano oweeo, olwohuba Herode adaha ohuhwiita.” 32Nae Yesu yababoolera ati, “Muchie muboolere ebbwe eryo muti, ‘Bona, ese njirusa emisaambwa handi monia abandu olwaleero nende muchuli, nae oludaalo lw'ohudatu maliiririsa omulimo kwaange. 33Nae kata katyo ndi nende ohuchiiririra nende biindi ohuhola, olwaleero nende muchuli, nende oludaalo luloondaho; olwohuba sisinyalihana ohuba mbwe, omunabbi afwiira erwaanyi w'esiko sye Yerusaalemu.’ 34Eee eng'we abe Yerusaalemu, ohwiitaanga banabbi nende ohuhuyaanga amakina abo ababa nibabatumiirwe! Ndahaake ena ohubuusa alala abana beeng'we koti lu ngoho yibuusanga obumwiinyu bwayo mu mbaya chayo, nae haba simunyaliha daawe! 35Bone, enyumba yeng'we yebwabirwe. Handi mbaboolera endi simuchia ohumbonaho, ohwoola lu mwahaboolere muti, ‘Ali nende ehabi oyo owiicha mu liita ly'Omwaami!’ ”

will be added

X\