LUKA 12

1Mu biha byeene ebyo, ebidiyiha by'abandu bangi muno byali bimalire ohwebuusa alala, abandu nibachaakire ohwesenanaho, Yesu yeecha yataangira ohuboolera abeeki bae ati, “Mweliinde amamera k'Abafalisaayo ak'obwebachirisi. 2Abulao esiindu syoosi esyabwihwaho esitacha hubwihulwa, oba esyakiswa esitacha humanyihana. 3Mani sakira esyo syoosi simwalomaloma mu siirima, sichia ohuwuliirihanira mu bulafu, handi esyo syoosi simwemoonyera mu nyumba, sichia ohulangirirwa hu birama by'enyumba. 4“Mbaboolera obwadyeeri eng'we abeecha bange endi, mutatichaanga abo abeeta omubiri, nae nibamala batyo, sibulao esiindu syoosi sibanyala ohuhola. 5Nae njia ohubalabula oyo yimuhoyeera ohutya: muticheenge oyo, omala ohwiita, oli nende obunyala bwohusukuna mu muliro kutasima; eee, mbaboolera endi, mutye oyo! 6Obubbiichu butaanu, haba sibukulwaanga obuhela bubiri bwong'ene? Nae abulao kata hala hw'otwo ahebirirwanga mu moni wa Nasae. 7Lwasiina, kata efwiiri ly'ohumutwe kwao lyoosi, lyamala ohubalwa. Mutatya daawe; eng'we mulimo obuhala obuungi muno ohuhira obubbiichu bungi. 8“Handi mbaboolera endi, buli muundu yeesi owufukiirira mu moni w'abandu, Omwaana w'Omuundu yesi aba achia ohumufukiirira mu moni wa bamalaika ba Nasae; 9nae oyo owundekaana mu moni w'abandu, achia ohwekaanibwa mu moni wa bamalaika ba Nasae. 10Handi muundu yeesi, olomaloma emboosi bubi hu Mwaana w'Omuundu achia ohuleherwamo; nae oyo yeesi ofwoola Mwooyo Mwolerefu, haba saachia huleherwamo daawe. 11Nae nibabaletaanga mu moni wa buli Sinagoogi nende mu nomi w'abeemirisi, kata nende mu moni wa b'obunyala bakabuhaane, mutelalihiriraanga eby'ohukobolamo nende engeri y'ohukobolamo, oba ebyohulomaloma; 12olwohuba Mwooyo Mwolerefu aba achia ohubeekesa esiha syeene esyo eby'ohulomaloma.” 13Olwoola, mulala hu bandu bali musidiiyiha yeecha yaboolera Yesu ati, “Omweekesa, boolera mwaanama akabane naange ebiindu bi hwalaamirwa.” 14Nae Yesu yamuboolera ati, “Wasyaange, wiina owataao ohuba omukayi weng'we oba omukabi w'ebiindu byeeng'we?” 15Mani Yesu yababoolera ati, “Mweliinde, handi mwekae obwekoombi bwoosi; olwohuba obulamu bw'omuundu sibweema hu bungi bw'obuyiinda bwae.” 16Mani Yesu yabakaadira olukaado naboola ati, “Olwoola, endaalo y'omusaacha wundi munyali, yeecha yaama bulai muno; 17mani omusaacha oyo yeecha yabaasa mu mwooyo kwae ati, ‘Ndaahole endye, olwohuba mbula abundu w'ohuteera ebirime byaange?’ 18Mani yaboola ati, ‘Bulaanu sino nisyo siinjia ohuhola: Njia ohukwiisa ebyaaki byaange byoosi, mani male nyombahe ebihoongo bihira hoo; mani omwo nimwo munja ohuteera emere yange alala nende obuyiinda bwaange bwoosi. 19Mani niimala endyo njia ohuboolera omwooyo kwaange endi, Bulamu ewe, mbawo oli nende ebiindu biyera ebihubihiirwe ohumala emyaaka emiingi muno; mani otelalihira, lya, ng'wa, mani osangaale.’ 20Nae Nasae yeecha yamuboolera ati, ‘Omusiru wuno! Esiro syeene sino obulamu bwao, bucha ohuhutusibwaho; mani ebiindu biwabiiha bino byoosi, bicha ohuba ebya wiina?’ 21Mani nilwo lwali oyo yeesi, owebuungira omweene obunyali bwae, nae saali omunyali mu moni wa Nasae.” 22Bulaanu, Yesu yeecha yaboolera abeeki bae ati, “Sakira mbaboolera endi, mutelalihiriraanga eby'obulamu bw'eng'we, bimunaalye, oba ebidiira hu mibiri cheeng'we, nende eby'ohwefwaala. 23Olwohuba obulamu buhira ebyohulya, nae omubiri kwosi kuhira eby'ohwefwaala. 24Mubonereho hu mahoofwa: haba sikawaanya kata sikakesa, sikali nende ewohubiihamo ebiindu, kata ebyaaki, nae bone Nasae akaliisa. Nae obuhala bw'eng'we sibuhira muno amayoni ako! 25Nae wiina hweeng'we hulw'ohwelalihira hwae, onyala ohumeeda hu bulamu bwae bwaaba obuleeyi hooho? 26Nikali mbwe eng'we simunyala ohuhola esiindu sidiidi sityo, lwasiina mwelalihira hulw'ebiindi bidong'ereyo? 27Mubonereho hu bimuli by'omusiino, koti lubihula; haba sibihola mirimo oba engubo ch'ohwefwaala; nae mbahoolera endi, kata Solomooni, mu luyaali lwae lwoosi, haba siyanyala ohwefwaala yetiha ohwaakana nende silala hu bimuli bino. 28Nae nikali mbwe Nasae anyala ohufwaasa busa obunyaasi bwo mu siino obubao olwaleero, nae muchuli busukunwa mu muliro ohusambwa, nae aba yahaake ena ohubafwaasa, Aaa eng'we ab'efukiirira ndiidi! 29Mani sakira mutekonyereseraanga eby'ohulya nende eby'ohung'wa kata ohubechaanga nende ebibaaso byohwelalihira. 30Olwohuba ebyaalo byohusyaalo huno byoosi, bikonyeresa busa ebiindu bino; nae Seeng'we amanyire ati mwesi mubidaha. 31Mani musifwo sy'ebyo, eng'we mukoonyerese Obwaami bwae, mani ebiindu bino byosi biba bicha ohuba ebyeng'we. 32“Mutatya daawe, eng'we baana bange, olwohuba Seeng'we musangaafu ohubabeeresa Obwaami. 33Mukuse obunyali bweeng'we, mukabire abamanani; mwefunire emifuuko chitakofula, nende obunyali buli Mukulu obutanyaasiha, yi mwiibi yeesi atanyala ohwoola, handi bu mbungi chitanyala ohunyaasa. 34Olwohuba yi mwaandu kwao kuba, awo niwo yi mwooyo kwao kwosi kuba. 35“Mwefwaalire elalira, handi mulehe amataara keeng'we nikaaduha, 36mani mube koti abahalaabani beetekefu baliindire omwaami waabwe ohukobola ango natula hu sidyaalo sy'obweeya, banyale ohumwikulirao olwiiki bwaangu niyoola busa ati yahong'oonda. 37Bali nende ehabi abahalaabani abo ba mwaami waabwe yeecha yakaana nibali abetekefu; mbaboolera obwadyeeri endi, aba achia ohweboya bulai, mani ababoole behale hu meesa ohulya, mani omweene yeeche abakabule. 38Nikali mbwe yeecha mu saa y'ohubiri, oba mu y'ohudatu, mani yabakaana nibali batyo, abahalaabani abo baba bali nende ehabi! 39Nae muhoyeere ohumanya sino muti, omweene nyumba aba niyamanya ebiha byeene bi mwiibi yecheramo, aba yahaya ohuleha enyumba yae yahalakwa yengirwamo. 40Mani eng'we mwesi, muhoyeere ohuba abetekefu; olwohuba Omwaana w'omuundu achia ohwiicha mu siha syatabasirisirwamo.” 41Peetero yeecha yaboola ati, “Omwaami, olukaado luno, oli ohulukaadira efwe, kose abandu boosi?” 42Nae Omwaami yaboola ati, “Muliindi siina omwesikwa handi omukesi, yi mwaami wae yahadiisa edaala lyae, nende ohukabulira abandu bamwo omukabo kwaabwe mu biha bihoyeere? 43Ali nende ehabi omuhalaabani oyo, yi mwaami wae yeecha yamwakaana naahola esyo syahoyeere ohuhola. 44Mbaboolera obwadyeeri endi, aba achia ohumudiisa ebiindu byae boosi. 45Nae omuhalaabani oyo niyeecha yeboolera omweene ati, ‘Mbao ngandi omwaami wange achia ohuhiinda ohwiicha,’ mani yachaaka ohuhuya abahalaabani basye basaacha nende abahasi, mani yachaaka ohulya nende ohung'wa mani yaameera, 46omwaami w'omuhalaabani oyo achia ohwiicha hu ludaalo lu muhalaabani oyo atamubasirisiramo handi hu siha syatamanyire, mani aba achia ohumusaandia, mani amale amute alala nende abataali abesikwa. 47Nae omuhalaabani oyo owamanya si mwaami wae adaha, nae yahaya ohwetekeha, kata ohuhola koti lu mwaami wae adaha, achia ohutoochwa muno. 48Nae omuhalaabani oyo owali nataamanyire si mwaami wae adaha, mani yahola esyo esyahakera yahuywa, aba achia ohuhuywa budiidi. Buli muundu yeesi, obereswa ebiindu biingi, achia ohudahibwaho ebiingi; nae oyo yibabihisa ebiindu biingi, bacha ohumubaanja ebiingi. 49“Ese ndeecha ohuwaambya omuliro hu syaalo; handi kuba kwamala ohuwaamba! 50Ndi nende embatiisa yihoyeere ohubatisibwamo; handi sinjuuna muno ohwoola lu syaholereere! 51Mubaasa muti ese ndeecha ohuleeta emireembe hu syaalo? Haba bbe, mbaboolera endi, ndeecha ohuleeta ohukabuhana; 52mani ohutula bulaanu nende ohwemdeeda mu moni, mu nyumba ndala y'abandu bataanu, mucha ohubaamo ohukabuhana, badatu bacha ohukabuha hu babiri, handi babiri bakabuhe hu badatu; 53abandu bacha ohukabuhanamo, simwaana akabuhane nende omusyaani wae, omusyaani akabuhane nende simwaana, ng'ina akabuhane nende omuhaana wae, handi omuhaana akabuhaane nende ng'ina, masaala akabuhaane nende muhomusyani wae, muhomusyani akabuhaane nende masaalang'ene.” 54Yesu handi yeecha yaboolera esidiiyiha sy'abandu esyo ati, “Eng'we nimubona esireesi nisisingiriire emumbo, mubolaanga bwaangu-bwaangu muti, ‘Efula mbawo yicha’; mani nibiba bityo. 55Nae nimubona omuyaka kutulira emwaalo nikuwucha, mubolaanga muti, ‘Omubasu kw'amaani kucha ohufwa’; mani nibiba bityo busa. 56Abebachirisi eng'we! Mumanyire bulai muno ohutotola emboneha y'esyaalo, nende ey'ekulu; nae lwasiina haba simumanyire ohutotola ebiha bya bulaanu bino? 57“Nae lwasiina abeene simunyala ohweheengerao esiba nisihoyera ohuholwa? 58Nooba nooli ohuchia nende ohuyingania eyiri omukayi, teemaho koti lwonyala, owuliirisaanie nae nimusiiri hu ngira, ataali awo, achia ohuhuhwehweesa ahwose eyiri omukayi, mani omukayi oyo amale ahudiise omusirikaari muhoongo, nae omusikaari oyo amale ahusukune mu mboye. 59Mbaboolera endi, haba sochia ohutulamo nosisiiri ohutungira elalira ehela yihenerehayo.”

will be added

X\