LUKA 11

1Ludaalo lundi, Yesu yali abundu wandi niyekongooya, mani niyamala ohwekongooya, mulala hu beeki bae yamuboolera ati, “Omwaami, tweekese ohwekongooya, koti lu Yowaana yekesa abeeki bae.” 2Mani Yesu yababoolera ati, “Nimuba nimwekongooya, muboleenge muti: “Seefwe, eliita lyao likinisibwe. Obwaami bwao bwiiche. 3Tuberese buli ludaalo, eby'ohulya byeefwe bya buli buhya; 4mani otuleheremo ebibi byeefwe, olwohuba efwe beene huleheraangamo oyo yeesi otuholera bubi; mani otatuyira mu huhemebwa.” 5Mani yababoolera ati, “Ni naanu hw'eng'we, oli nende omwiicha, onyala ohuchia yali musiro akati, mani yamuboolera ati, ‘Mwiicha wange, ndeeyoleho emigaati chidatu; 6olwohuba aliwo omwiicha wange owahoola natula hu lukeendo, nae mbulaho esiindu syoosi esyohumukabula’; 7mani nae yakobolamo naali mukati ati, ‘Leha ohunyaasa; olwiiki lumalire ohwikalwao, handi ese nende abaana bange huli mu buliri; Haba sinyala ohusiingira ndahuba esiindu syoosi’? 8Mbaboolera endi, kata nende natahasingiire yamuba esiindu syoosi, olwohuba mwiicha wae, nae hulw'enduyirisi eyo, aba achia ohusiingira amubeerese buli syaba nadaha syoosi. 9Handi mbaboolera endi, Saba, mani sichia ohuhubeereswa; koonya, mani ochia ohunyoola; hong'oonda, mani ochia ohwikulirwao. 10Olwohuba osaba yeesi afuna, handi buli okoonya yeesi anyoola, handi buli ohong'oonda yeesi yahekulirwewo. 11Simwaana muundu siina mweng'we, yi mwaana wae asaba amube eng'eeni, onyala ohumuba endemo musifwo sy'eng'eeni; 12oba namusaba ebuyu, onyala ohumuba engoberanyaanja? 13Nikali mbwe, eng'we abandu babi, mumanyire ohuberesa abana beeng'we ebiindu bilai, nae Seeng'we oli Mukulu siyahahirireho awo ohuberesa Mwooyo Mwolerefu abo ababa nibamusabire!” 14Olwoola, Yesu niyali yerusa omusambwa kwali kutalomaloma; nae omusaambwa okwo nikwali kumalire ohuwaao, omusaacha wali natalomalomaanga yeecha yachaaka ohulomaloma, mani abandu bawuka muno. 15Nae abandu bandi bachaaka ohuboola bati, “Wuno yerusa emisaambwa nende obunyala bwa Bbelisebbuli, omuhongo wemisaambwa”; 16nae abandi, nibeenya ohuhema Yesu, bamusaba ahalolero ohutula Mukulu. 17Nae Yesu, koti luyali namanyire ebibaaso byaabwe, yababoolera ati, “Obwaami bwoosi obwekabulanamo obweene-no-bweene buba bucha ohukwa, handi edaala lyoosi erikabuhanamo likwa bukwa. 18Mani bulaanu Sitaani yesi nikali mbwe yekabuhanie yakabuhanamo omweene-no-mweene, obwaami bwae buba bucha ohuyiindira butye? Olwohuba muli ohuboola muti, njirusa emisambwa nende obunyala bwa Bbelisebbuli. 19Mani nikali mbwe njirusa emisaambwa nende obunyala bwa Bbelisebbuli, nae abana beeng'we baachiirusa nende obunyala bwa nanu? Sakira abeene abo nibo abacha ohubaheengera omusango. 20Nae nindehoonyera omuhono kwa Nasae ohwirusa emisaambwa, mbawo mani Obwaami bwa Nasae bumalire ohuboolaho. 21Nae omusaacha wamaani, oli nende ebilwaaniro bimala, mani yaalinda edooho lyae, ebiindu byae byoosi biba byeliindire bulai; 22nae omuundu wundi omuhiraho amaani, namuseeta mani yamuyingira, amumalaho ebilwaaniro byae biyali niyesikire, akabaniamo abandu bandi ebiindu biyaba amuyayireho. 23Oyo yeesi otaali hu luwaande lwaange, aba ali ohunyiingania, handi oyo otaali ohuhoonya ohubuusa alala, aba ali ohusakuula busa. 24“Omusambwa mubi nikutula mu muundu, kukeenda nikwaambuhana esa enyiingi, nikukoonya abundu w'ohuwuluuhira; nae nikutabukaana obuwuluuhiro bwoosi, kwiicha kweboolera okweene kuti, ‘Njicha ohukaluha mu nyumba yange yindatulamo eyo.’ 25Mani nikukobola, kuyakaana niyeeyerwe handi niyitekeheebwe bulai. 26Mani kucha kwaleeta emisaambwa chaasye chiindi chitaanu-na-chibiri echikuhiraho obubi, mani cheengira chamenya mu nyumba omwo; mani obulamu bw'omusaacha oyo bwiicha bwabiiya muno bwahiraho koti lubwali hale.” 27Yesu niyaboola sino, omuhasi wundi musidiiyiha esyo, yahuumula mani yaboolera Yesu ati, “Yiri nende ehabi, enda yahukiinga, alala nende embeere chiwanuuna!” 28Nae Yesu yaboola ati, “Bali nende ehabi abo bosi abawulira emboosi ya Nasae mani bayiholeraho!” 29Nae ebidiiyiha by'abandu nibyali nibisyemeeda ohwiicha, Yesu yeecha yaboola ati, “Oluse luno, luse luholi lw'ebibi; lukonyeresa ahalolero, nae abulao ahalolero hacha ohubabeereswa ohutusaho ahalolero ha Yona. 30Olwohuba koti lu Yona yeecha yaba ahalolero eyiri abandu bo mu Ninefe, nilwo busa koti lu Mwaana w'Omuundu achia ohuba eyiri oluse luno. 31Omutuki muhasi ohutula Emwaalo we syaalo achia ohusiingira hu ludaalo lwohuheengeraho omusango, yeme nende abandu b'oluse luno mani abahengere omusango ohubahira; olwohuba yatula Emwaalo yi syaalo syaakama, yacha ohuwulira amakesi ka Solomooni, nae bone, ano aliwo esiindu esihirira elalira Solomooni. 32Abasacha ba Ninefe bacha ohusiingira hu ludaalo lw'ohuheengeraho omusango, mani beeme nende abandu b'oluse luno mani babahengere omusango ohubahira; olwohuba, beyolobya nibawulira ohuyaala hwa Yona, nae bone, ano aliwo esiindu sihirira elalira Yona. 33“Abulao omuundu yeesi owaambia etaara, mani yeecha yaalita mu liina, oba yaalifunihaho esimweero, nae alita hu siteeni syalyo, hubula abandu baba nibengira mu nyumba, banyale ohubona obulafu bwalyo. 34Emoni yao niyo etaara ly'omubiri kwao; nae emoni yao eyo niyiri enamu, omubiri kwao kwoosi kuba kwichuule obulafu; nae emoni yao niyitaali enamu, omubiri kwao kwoosi kuba kwichuule esiirima. 35Mani sakira mweliinde, obulafu bubalimo, buteehola esiirima. 36Mani omubiri kwao kwoosi nikuba nikwichuule obulafu, nikutaaliho esituundu siri mu siirima, kwoosi kuba kucha ohuba omulafu, koti etaara lihuhosera nende obulafu bwalyo.” 37Yesu niyali nasilomalomaanga atyo, Omufalisaayo wundi yeecha yaamusaba ache alye nae; mani Yesu yeecha yacha nae, yehala alye. 38Nae Omufalisaayo oyo yesinduha muno ohubona ati Yesu haba siyesaaba mberi hu yeme alye. 39Nae Omwaami yeecha yamuboolera ati, “Bulaanu, eng'we Abafalisaayo mwoosa busa humu Kulu w'esikoombe nende w'olusaani, nae mu myooyo cheeng'we bweene mwechula omuluulu nende ebibaaso bibi. 40Abasiru eng'we! Mukaala muti, owahola humukulu oyo, siniye owahola mukati mwosi? 41Nae muyaanire abaati ebiindu biri mukati w'esikoombe nende w'olusaani, mani abweene awo buli siindu sy'eng'we sichia ohuba esilafu syeene. 42“Nae chibanyoolere eng'we Abafalisaayo! Olwohuba muyaana silala sy'ehumi sy'ebiindu koti ebisaari nende tangawusi, nende ebihwi biwunya esiing'aari, nae mweecha obwadyeeri nende ohudaha Nasae; ebiindu koti bino nibyo bimuba muhola nimutalekeresaho kata silala syosi. 43Chibakaanire eng'we Abafalisaayo! olwohuba mudaha muno obwihalo buhiramo obulayi mu Sinagoogi cheeng'we nende ohuheeswa nende oluyaali lungi mu biito. 44Chibakaanire eng'we! olwohuba muli koti ebiriindwa byakwalaala bitabonehana, mani abandu beecha baabiseenaho babibitaho nibataamanyire.” 45Nae mulala hu beekesa ba malako yeecha yateeba Yesu ati, “Omweekesa, mu nolomaloma otyo, mbawo fwesi oba otunyeka.” 46Nae Yesu yeecha yaboola ati, “Chibakaanire eng'we mwesi abekesa ba malako! olwohuba mudwiha abandu emikuku misito chitekiinga, nae eng'we abeene simunyala kata ohudiira hu mikuku echo n'olwala lw'eng'we lulala. 47Chibakaanire eng'we! olwohuba muloonga ebiriindwa by'abanabbi ba seeng'we babeeta. 48Mbao muli abajulisi, handi mufukiirisania nende ebiindu bi seeng'we abo bahola; olwohuba nibo ababeta, nae eng'we ning'we abaloonga ebiriindwa byaabwe. 49Mani sakira Amakesi ka Nasae kosi kaboola kati, ‘Njia ohubatumira banabbi nende abatume, abandi hw'abo bacha ohwiitwa handi abandi bacha ohusaandisibwa,’ 50hu bulaanu amabaanga k'abanabbi boosi, akediswa ohutulira elalira hu huloongwa hw'esyaalo, kabaanjwe oluse luno, 51ohutulira elalira hu mabaanga ka Abbeli ohwoola hu mabaanga ka Sakariya, oyo owasihira akati-kaati w'alutaari nende esifwo syolerefu muno esy'omunyumba ya Nasae. Eee, mbaboolera endi, amabaanga ako kacha ohubaanjwa oluse luno. 52Chibakaanire eng'we abekesa ba malako! olwohuba mwabukula olufunguyo lw'olwiiki lw'amakesi; nae eng'we beene haba simwengira, handi mwekalira abo boosi abali nibengira.” 53Nae Yesu niyali nasiingira nawawo, abandiiki ba malako nende Abafalisaayo beecha bachaaka ohumwikalirisania muno nende ebiteebo, nibamuhema yemeede ohulomaloma hu biindu biingi, 54awo nibamwelindiriire, nisinyalihana bamudiirire hu siindu syanaboole syoosi.

will be added

X\