LUKA 10

1Oluunyuma lwa bino, Yesu yeecha yadoola abeeki amahumi kataanu-na-kabiri na babiri bandi, mani yabatuma bamutangiriremo ohuchia, babiri-babiri, mu buli siko nende esifwo, yiyali owohucha omweene. 2Mani yababoolera ati, “Ekesa nalyo liingi muno, nae abahalaabani nibo abadiidi; mani mwekongooye Omwaami we kesa atume abahalaabani mu kesa lyae. 3Bulaanu, mani muche; nae bone, mbawo mbatuma, koti abana b'amakoondi mu manani. 4Mutakiinga esawo ch'eseende, kata omufuuko kw'ohusumiramo, kata ebiraato; handi, mutaheesa omuundu yeesi hungira. 5Nabuli nyumba yoosi yimwingiramo, mutaangireenge ohuboola muti, ‘Emireembe kibe hu nyumba yino!’ 6Mani, omuundu yeesi ow'emireembe naaba mu nyumba eyo, emireembe cheeng'we chicha ohumubaaho; nae nibitaali bityo, emireembe kichia ohubakaluhira. 7Mani mudong'enge mu nyumba yene eyo, nimulya haandi nimung'wa buli siindu syoosi sibabakabula, olwohuba buli muhalaabani ahoyera omuheemba kwae; nae mutalukalukanaanga nimutula mu nyumba eyo nimuchia mu yindi. 8Nimwiingiraanga mu siko syoosi, mani baababukaanira, mulicheenge esyo syoosi sibaba babakabule; 9muwonie abalwaye baba nibalimo, mani mubaboolere muti, ‘Obwaami bwa Nasae bwiichire aambi nang'we.’ 10Nae buli lumwingira mu siko syoosi, mani bahaya ohubabukaanira, muchicheenge mu makira kaamwo, mani muboola muti, 11‘Kata olufu lw'esiko syeng'we, olwediirire hu makulu keefwe, huli ohubateng'ulira lubaloonde; nae kata katyo, mumanye sino, muti Obwaami bwa Nasae bwiichire aambi.’ 12Mbaboolera endi, hu ludaalo olwo, Sodomu syahakwiirwe esisa ohuhiraho esiko esyo. 13“Chihwakaanire ewe, Korasiini! chihwakaanire ewe, Bbeetasaida! olwohuba ebyaamayia byaholwa mweng'we biba byaholwa mu Tiro nende Sidoni, abandu bamwo baba beefunaka hale, nibefwaala ebigunia, handi nibehala mu kohe. 14Nae hu ludaalo lwohuheengeraho omusango Tiro nende Sidoni byahakwiirwe esisa, ohuhiraho eng'we. 15Nae ewe Kaperanaumu, odaha ohweniinia ohwoola Mukulu? Mani bacha ohuhwiisa aasi busa ohwoola emakoombe. 16“Oyo obawulira, aba awulire ese, handi oyo obahaya, aba ahayire ese, handi oyo owuhaya aba ahayire oyo owanduma.” 17Amahumi kataanu-na-kabiri nababiri abo bakobola nibasangaalire muno, nibaboola bati, “Omwaami, kata emisambwa chosi chituwulireenge, nihwehoonyera eliita lyao!” 18Nae Yesu yababoolera ati, “Mbweene Sitaani niyaakuha natula Mukulu naakwa aasi koti olumesu. 19Nae bone, mbabeerese obunyala bw'ohuseenakira endemo nende eby'obusiba byoosi, handi nende obunyala bumalawo amaani k'omusuku koosi; mani abulao esiindu sichia ohubawumisa. 20Nae kata katyo, mutasangaala olwohuba emisaambwa chibawulira; nae musangaale olwohuba ameeta keeng'we kandiikwa Mukulu.” 21Mani esiha syeene esyo, Yesu yeecha yehoyera mu Mwooyo Mwolerefu mani yaboola ati, “Hwebasa muno Bbaabba, Omwaami w'Ekulu nende esyaalo, olwohuba wakisa ebiindu bino abakesi nende abasoma muno, nae wabibwihulira abana badoto; Eee, Bbaabba, olwohuba huno hwali ohudaha wao hw'esisa. 22Bbaabba yamala ohumberesa ebiindu byoosi; mani abulao omuundu yeesi omanyire Omwaana ohutusaho Simwaana, handi omanyire Simwaana, ohutusaho Omwaana nende oyo yeesi yi Mwaana ahengawo ohubwihulira.” 23Nae Yesu yakaluhanira abeeki bae nibali bong'ene mani yababoolera ati, “Chiri nende ehabi emoni chaabo echibona bimuli ohubona! 24Olwohuba mbaboolera endi, banabbi bangi nende abatuki bangi bekoomba ohubona simubona, nae bahaya ohusibona, handi nende ohuwulira simuwulira, nae bahaya ohusiwulira.” 25Nae bone, omweekesa wa malako wundi, yaasingira yeema nadaha ohuhema Yesu naboola ati, “Omweekesa, siina syeene siimba hole, hu nyale ohunyoola obulamu butaakama?” 26Nae Yesu yamuboolera ati, “Ni siina syeene esyandiikwa mu malako? Okasoma otye?” 27Nae yakobolamo ati, “Dahaanga Nasae Omwaami wao nende omwooyo kwao kwoosi, nende obulamu bwao bwoosi, nende amaani kao koosi, nende amakesi kao koosi; handi dahaanga owaasyo, koti lu wedaha omweene.” 28Nae Yesu yamuboolera ati, “Okoboolemo bulai; mani hola otyo, mani ochia ohubaao omulamu.” 29Nae omweekesa wa malako oyo, koti luyali akiiya ohweekesa ati mulai, yeecha yaboolera Yesu ati, “Nae owasyaange niye naanu?” 30Yesu yakobolamo ati, “Olwoola, omusaacha wundi yali nakeenda niyehirira ohutula Yerusaalemu, naachia Yeriko, mani yaakwa mu banyaka, bamumalaho engubo, mani bamuhuya bubi muno, mani bawaao, bamuleha nadong'isye ahateetera hong'ene. 31Nae bulaanu olw'ehabi, waliwo omulaamisi wundi yali nabitira hu ngira yene eyo; nae niyamubona, yahededya yabitira endulo yeweerawo. 32Handi nasilala, Omuleefi wundi yesi niyeecha yoola mu sifwo esyo yamubona, mani yahededya yabitira endulo. 33Nae Omusamaria wundi, niyali naali hu lukeendo, yeecha yoola musifwo si musaacha oyo yalimo; nae niyamubona, yamukwiira esisa, 34mani yacha yali, yamuboya ebinyubu, yabichuhaho, amafuta nende efiini; mani yaamubukula yamuta hu esuhiri yae yene, mani yaamuyira mu nyumba y'abakeni, yamala yaamulinda bulai bweene. 35Handi nibwahya muchuli, yeecha yabukula edinaari chibiri mani yachibeeresa omuliindi w'enyumba y'abakeni eyo, naboola ati, ‘Liinda omuundu wuno bulai; handi nisibaao esiindu syoosi syomeedaho ohumuhoonya, ningaluha njia ohuhutuunga.’ 36Naanu mweene hu bandu badatu bano, y'obaasa oti, yekesa eyiri omusaacha wakwa mu banyaka ati niye owaasye?” 37Nae yaboola ati, “Oyo owamukwiira esisa.” Mani Yesu yamuboolera ati, “Cha mani wesi ohole otyo.” 38Nae Yesu nende abeeki bae, nibali bachiririra nende olukeendo lwaabwe olwo, Yesu yoola mu lukoongo lundi; mani omuhasi wundi olaangwa Marita yeecha yamwakaanira, yengira mu nyumba yae. 39Nae yali nende mwaanang'ina olaangwa Maria, oweecha yehala mu makulu k'Omwaami, mani yaatekeeresa enjekesa yae. 40Nae Marita owali asidoyeerwe muno nende emirimo ch'ohukabula; yeecha yacha eyiri Yesu mani yaboola ati, “Omwaami, sodeebaho oti, mwaanaama yandehere ohukabula syeng'ene? Mani muboolere yeeche yahoonyeho.” 41Nae Omwaami yamukobolamo ati, “Marita, ewe Marita, welalihira handi wachuunirwa ebiindu biingi muno; 42nae esiindu silala syong'ene nisyo esihoyerwa. Maria adoolere omukabo mulai, okutacha ohumutusibwaho.”

will be added

X\