LUKA 1

1Koti lu baandu baangi bamalire ohutekeha bulai mu bwandiike ebiindu bituholehemo, 2handi koti abo abatangira ohweboneraho abeene, handi bahalabanira emboosi eyo batudiisa, 3ese syesi nimalire bulaanu ohwehaliirisa bulai ebiindu bino, sibweene endi silayi ohuhwandiikira ewe ow'oluyaali Tefiro, nitekeehe bilai ebiindu koti byalondehana, 4hu weesi onyale ohumanya obwadyeeri bweene bw'ebiindu bi bahweekesa. 5Mundaalo chi Herode yali naali omutuki wa Buyudaaya, waliwo omulaamisi olaangwa Sakariya, owali ow'oluyia lw'abalaamisi lwa Abbija; handi omuhasi wae olaangwa Elisabeeti, yali ow'oluyia lwa Arooni. 6Mani bombi bali abalungifu mu moni wa Nasae, nibalondakirira amalako koosi nende ebidahibwa by'Omwaami byoosi ataali ohudondobanaho kata. 7Nae sibaliho nende omwaana haba, olwohuba Elisabeeti yali omukuumba, handi bombi bali bahulire mu myaka. 8Olwoola, Sakariya niyali ali ohuhola omulimo kw'obulaamisi mu moni wa Nasae, olwohuba oluyia lwae nilwo olwali olw'ohuhalaabanira Nasae mu biha ebyo, 9ohweema hu ndekeha yaabwe y'obulaamisi, eha yamukwaho ache aniohese obubbaani mu nyumba ya Nasae. 10Nae esidiyiha sy'abandu syoosi syali nisyekongooyera erwaanyi mu biha byohuniohesa obubbaani. 11Mani awo niwo yi malaika w'Omwaami yeecha yaamubonehera niyeemere hu lwaande lw'omuhono muluungi kw'alutaari y'ohunioheseraho obubbaani. 12Nae Sakariya niyamubona, eholo yamubba muno mani obuti bwamudiira. 13Nae malaika yeecha yamuboolera ati, “Sakariya, otatya, olwohuba ohwekongooya hwao huwuliirwe, mani omuhasi wao Elisabeeti, achia ohuhwibulira omwaana musyaani, mani wahamulaange eliita oti Yowaana. 14Mani ochia ohuba nende esangaalo nende omwehoyo, mani abandu bangi bahehoye olw'ohwibulwa hwae; 15olwohuba yahabe omuhunuufu muno mu moni w'Omwaami, mani siyahang'weeho efwiini yoosi kata esy'ohung'wa simeesa syoosi, mani achia ohwichusibwa Mwooyo Mwolerefu, ohutulira busa elalira munda ya ng'ina. 16Achia ohuchuusa abaana ba Yisirayiri bangi abakaluse eyiri Nasae Omwaami waabwe, 17handi achia ohumutaangirira mu mwooyo nende amaani ka Elija, achuuse emyooyo cha basimwaana bandu chikaluhe hu baana baabwe, nende ba nandawulira bakaluhe hu makesi k'abalungifu; achia ohuhola abandu betekehere Omwaami waabwe.” 18Nae Sakariya yaboolera malaika oyo ati, “Sino, ese ndahasimanye endye? Olwohuba bulaanu ese ndi omusaacha mukofu, handi omuhasi wange yesi ahulire mu myaka.” 19Nae malaika yamukobolamo ati, “Niise Gabulieri, oweemere mu moni wa Nasae; mani ndumirwe ohulomaloma yooli, handi ohuhuleetera emboosi ndayi chino. 20Mani bone, ochia ohuwuleera handi bihuhaye ohulomaloma, ohwolera elalira hu ludaalo lu biindu bino byaholerere, olwohuba sofukiriire emboosi change, echicha ohwolerera mu biha byaacho.” 21Nae abandu bali baliindiriire erwaanyi, beecha bawuka olwohuba Sakariya yali ahiindire muno mu nyumba ya Nasae. 22Mani niyatula erwaanyi, haba siyanyala ohulomalomaho nabo, mani bamanya busa bati, yali aboneheerwe mu nyumba ya Nasae; mani yeecha yabaholera busa obulolero, mani omweene yadoong'a natalomaloma. 23Mani ebiha byae eby'ohuhalaabanira Nasae nibyawa, yakobolayo engo. 24Endaalo chino nichawa, omuhasi wae Elisabeeti yeecha yafuna amabaanga, mani olw'embaka ye myoosi chitaanu yekisa abandu, naboola ati, 25“Omwaami mweene niye owumbaasireho yaholera sino mu ndaalo chino, yandusaho esoni mu moni ch'abandu.” 26Mu mwoosi kw'ohusaasaba, Nasae yatuma malaika Gabulieri ohuchia mu siko sye Galilaaya esilaangwa siti Nasareti, 27eyiri omuhaana otaamanyireho eby'abasaacha, owali afukiirisaanie ohudeehisania nende omusaacha olaangwa ati Yosefu, ow'omunyumba ya Daudi. Eliita ly'omuhaana otaamanyireho eby'abasaacha oyo lyali Maria. 28Malaika oyo yeecha yaali mani naboola ati, “Yoga, Ewe owabereswa ehabi, Omwaami ali naawe!” 29Nae enomanoma eyo yamusindusa muno, yachaaka ohubaasa mu mwooyo kwae amahulundu k'eheesa yino. 30Nae malaika yamuboolera ati, “Maria, otatya, olwohuba Nasae ahubeere ehabi. 31Mani bona, ochia ohufuna amabaanga, wiibule omwaana musyaani, mani wahamulaange eliita oti Yesu. 32Achia ohuba omuhunuufu, handi yahalaangwe Omwaana woyo oli Akulu Muno; handi Omwaami Nasae achia ohumubeeresa esisaala sy'obutuki sya Daudi kukaang'ene, 33handi achia ohutuka enyumba ya Yakobbo, emyaaka choosi; mani obutuki bwae sibuchia huwaao.” 34Nae Maria yaboolera malaika ati, “Sino sichia ohunyalihana sitye, olwohuba ese siimanyire eby'abasaacha?” 35Nae malaika yamuboolera ati, “Mwooyo Mwolerefu achia ohuhwiihaho, handi amaani kooyo oli Akulu Muno kacha ohuhubwiiha; mani sakira omwaana ochia ohwibulwa achia ohulaangwa omwolerefu, Omwaana wa Nasae. 36Mani bona, omuhasi woluya lwao Elisabeeti, mu myaka chae chobukofu, yesi yaamalire ohunyoola amabaanga k'omwaana musyaani; mani kuno nikwo omwoosi kwae kw'ohusaasaba naali asito, oyo yibalangaanga omukuumba. 37Olwohuba, sibulao esiindu syoosi esitanyaliha eyiri Nasae.” 38Mani Maria yeecha yaboola ati, “Ese mbano, ndi omuhalaabani w'Omwaami; leha sindeholeheho koti lw'oboola.” Mani malaika yeecha yaamuleha. 39Mu ndaalo echo, Maria yasingira yacha bwaangu mu syaalo sy'engulu, mu siko sya Buyudaaya, 40mani yengira mu nyumba ya Sakariya, yaheesa Elisabeeti. 41Nae Elisabeeti niyawulira busa ati ohuheesa hwa Maria, omwaana yachaaka ohutumakala munda; mani Elisabeeti yamala yechuswa Mwooyo Mwolerefu 42mani yaalomalomera mu kono lyaakulu naboola ati, “Oli nende ehabi mu bahasi boosi, handi esiri munda yao siri nende ehabi! 43Sino sinjolereho sitye, ng'ina Mwaami wange ohwiicha yindi? 44Olwohuba bonaho, ohuheesa hwao nihuungwiire mu matwi busa huti, ni omwaana adumakala munda yange olwesangaalo. 45Handi w'ehabi oyo owafukiirira ati, ebyo ebyamuboolerwa ohutula eyiri Omwaami byaholerere.” 46Nae Maria yaboola ati, “Omwooyo kwaange kufumia muno Omwaami, 47handi omwooyo kwaange kwehoyera mu Nasae Omuwonia wange, 48olwohuba abweene obuloonga bw'omuhalaabani wae. Olwohuba boneho, ohutula buti, enjibulo choosi chicha ohunangaanga ow'ehabi; 49olwohuba oyo ow'Obunyala bwoosi, yaholeere eby'amaani, handi eliita lyae lyolerefu. 50Handi esisa syae siri hu bamutya ohutula hu lwiibulo lulala ohwoola hu lundi. 51Yekeese amaani mu biindu bi mahono kae kahola, asakuulire ebibaaso by'omumyooyo chaabehusa abeene, 52yeesere aasi abahunuufu ohutula hu bisaala byaabwe by'obutuki, handi yaniinia akulu abaloonga; 53yekuuse abalumwa enjala nende ebiindu bilai, nae abanyali abatusireyo bihaya. 54Ahonyere Yisirayiri omuhalaabani wae, niyechuliise esisa syae, 55koti luyaboolera bakuuka yeefwe, Yibbulaimu nende abechulu bae endaalo choosi-choosi.” 56Mani Maria yamenya nende Elisabeeti ohumala aambi w'emyoosi chidatu, mani yamala yaakobola engo wae. 57Bulaanu, ebiha bya Elisabeeti ohwetusaho nibyoola, yebula omwaana musyaani. 58Nae abanaluya bae alala nende abo abasibirana nae nibawulira bati Nasae akwiriire Elisabeeti esisa siingi sityo, beecha basangaalira alala nae. 59Nae oludaalo lwa chitanu-na-chidatu nilwoola, beecha ohuheba omwaana oyo; mani bali badaha ohumukuliha eliita lya simwaana bati Sakariya, 60nae ng'ina yaboola ati, “Haba daawe; achia ohulaangwa Yowaana.” 61Nae bamuboolera bati, “Mu luya lwao, muwumamo omuundu yeesi olaangwa ati, Yowaana.” 62Mani baholera simwaana obulolero nibadaha ohumanya koti luyahamulaangire. 63Nae yabasaba ekina ly'ohwandiikaho, mani yandiika ati, “Eliita lyae nilyo Yowaana.” Mani abandu boosi bawukaho busa. 64Mani abweene awo, ni omunwa kwa Sakariya kwikuha, ni olulimi lwae luboololoha, mani nachaaka ohulomaloma, naakinia Nasae. 65Mani obuti bweecha bwadiira abandu bamenya aambi nae boosi. Mani abandu beecha balomaloma hu biindu bino byoosi mu syaalo sy'engulu sye Buyudaaya syoosi; 66mani abo boosi ababiwulira, babibiiha mu myooyo chaabwe nibaboola bati, “Nae omwaana wuno yahabe siina?” Olwohuba omuhono kwa Nasae kwali nae. 67Mani Sakariya simwaana Yowaana yeecha yechula Mwooyo Mwolerefu, mani yatumbula ebidiira hu mwaana oyo naboola ati, 68“Nasae Omwaami wa Yisirayiri akinisibwe, olwohuba akeniye abandu bae handi yabanunula, 69mani atusingisiire olwiika lw'obuwonia mu nyumba ya Daudi omuhalaabani wae, 70koti lu yalomaloma hale mu minwa cha banabbi bae boolerefu, 71ati, achia ohutuwonia atutuse mu basuku beefwe, handi atutuse mu mahono k'abandu batusyuula boosi; 72atwekese esisa siyalaka ba kuuka yeefwe, handi niyechulisa Embuliirisania yae enjolerefu, 73esichubo siyechuba eyiri Yibbulaimu seefwe, 74ohutubeeresa ati efwe, nihununuulwe ohutula mu mihono chaabasuku beefwe, hunyale ohumuhalaabanira ataali ohutya hwoosi, 75mu bwolerefu nende obuluungifu mu moni wae mu bulamu bwefwe bwoosi. 76Nae ewe, mwaana ewe, ochia ohulaangwa omunabbi w'oyo oli Akulu Muno; olwohuba ochia ohutangiriramo Omwaami, ohumutekehera engira chae, 77ohuberesa abandu bae amakesi k'obuwonia, muhuleherwamo hw'ebibi byaabwe. 78Nae ohubitira mu sisa siingi sya Nasae weefwe, oludaalo nilutwichiire ohutula akulu, 79ohuberesa obulafu abandu abo abehala mu siirima nende mu siiniha sy'ohufwa, ohulungiha amakulu keefwe mu ngira y'emireembe.” 80Mani omwaana yahula, handi yaaba omwomiifu mu mwooyo, mani yamenya mu siparara ohwoola hu ludaalo lu yeyekesera alafu eyiri abandu ba Yisirayiri.

will be added

X\