EBBARWA YA YUDA 1

1Ese Yuda, omuhalaabani wa Yesu Kristo handi mwaanang'ina Yakobbo, nyandiika ebbarwa yino ohuchiira abandu ba Nasae yalaanga abali mu hudaha hwa Nasae Seefwe, nende mu huliindwa hwa Yesu Kristo. 2Lehe esisa, emireembe, nende ohudaha bibe ebyeeng'we mu bungi. 3Basyaange baheerwa, mbeere teemaho koti lu nyala ohubaandiikira ebidiira hu huwonisibwa hu efwe nende eng'we huli nahwo. Ndabona endi, sihoyerwa ohubaandiikira bulaanu, ohubagumia mu hulwaanirira efukiirira yi Nasae yamala ohubeeresa abandu bae ehabi lala lyong'ene. 4Olwohuba abandu bandi batatya Nasae bamala ohutwingiramo mu bweekisi nihutaamanyire; abandu bataamanyire Nasae handi bahyamia enjekesa yidiira hu sisa sya Nasae hu babwiihe hu bibi byaabwe, handi bahaya Yesu Kristo, ow'Oluyaali luhiramo handi Omwaami weefwe. 5Kata mwahaba nimumanyire sino, siidaha busa ohubeechulisa koti lu Mwaami yawonia abandu Bayisirayiri mu syaalo sye Misiri, nae luunyuma yaasihirisa abo abahaya ohufukiirira. 6Yichulise bamalaika abaduuma enjaho ch'obunyala bwaabwe, mani baaleha obwiihalo bwaabwe, koti lu Nasae yabeekalira mu syaalo sy'esiirima mani yaababoya nende eminyororo endaalo choosi nibaliindire oludaalo luhoongo lucha ohwiicha lu baheengeraho emisango. 7Mu ngeri nasilala eyo, yichulise Sodomu nende Gomora, alala nende ebiko bibyebodohaanie, koti lu hale lu bahola koti lu bamalaika abo bahola, mani baahola obucheke mu ngeri ndondobanu, abo nibo abohuboneraho. Basaandisibwa endaalo choosi hu banyale ohuba esyohuboneraho eyiri abandu boosi. 8Mu ngeri nasilala eyo, handi bano ebilooto byaabwe bibabachirisa mani byaakera baahola ebibi hu mibiri chaabwe cheene; balekeeresa amaani ka Nasae, handi balekeeresa bamalaika abali nende obunyala Mukulu. 9Handi kata nende Mikaayiri malaika muhuluundu siyateemaho ohunyeka Sitaani niyehoonyera emboosi mbi. Nasoolana nende Sitaani, nibayingana hu bidiira hu wiina mweene onaayire omubiri kwa Musa, yaboola ati, “Omwaami mweene ahwolobye!” 10Nae bano banyeka kata nende esiindu sibataamanyire amahulundu kaasyo. Handi ebiindu bibamanyire busa mu bibaaso byaabwe, koti ebisolo bibula ebibaaso, nibyo ebiindu ebicha ohubasihirisa. 11Endaalo chibakaanire! Olwohuba baloonda engira yi Kaini yaloondaho hale. Hulw'obwekoombi bw'eseende, beyingisa mu njekesa ndondobanu koti lu Bbalamu hale yahola. Bacha ohusihiriswa hulw'amayiingi koti lu Koora hale yahola. 12Bali koti eehwe limaliya ebidyaalo byeeng'we. Befwaaho abeene mu hulya nende mu hung'wa abula esoni. Nibo abaayi badeeba hu nda chaabwe chong'ene. Bali koti amaleesi kacha nende omuyaka mani kaahaya ohuleeta efula. Bali koti emisaala chitaamaho ebyaamo kata mu ndaalo ch'etoocho, emisaala chiyibwa nende emisi chaacho mani chafwiira elalira. 13Bali koti efwiinda njalaba echo hu nyaanja, mani ebiholwa byaabwe by'esoni bitumbuha akulu koti efiro. Bali koti ening'ining'i chikendaana, chi Nasae yamala ohutekehera obwiihalo bwo musiirima endaalo choosi. 14Enoka, omwichuhulu wa Adamu wa tiiri mu luse lwo hutaanu-na-habiri, yabalomalomaho naboola ati, “Bone, Omwaami yeecha nende abandu bae boolerefu elifu nende elifu, 15ohuheengera abandu boosi omusango, nende ohweekesa ababi boosi batatya Nasae ebiholwa byaabwe bibi, eby'ohuhaya ohutya Nasae nende emboosi mbi chitatya Nasae chibalomaloma hu Nasae.” 16Abandu bano buli siha bekanyiisa handi boolobya abasyaabwe; bahola nende obwekoombi bwaabwe bubi; abeene bewulira handi balekeeresa abasyaabwe hu banyale ohuhola bi badaha abeene. 17Nae eng'we basyaange baheerwa, mwichulise bi batume b'Omwaami weefwe Yesu Kristo bababoolera endaalo chabita bati bicha ohuholehana. 18Bababoolera bati, “Mu ndaalo chimaliirihayo, abandu bacha ohwiicha abacheha abafukiiriri, handi abalondakana nende obwekoombi bwaabwe bubi nibatata mu Nasae oluyaali.” 19Abandu bano nibo abaleeta engabuhanamo ba bibaaso byaabwe bituka, handi abataali nende Mwooyo Mwolerefu. 20Nae eng'we, basyaange baheerwa, mwemeede ohuhula mu fukiirira yeeng'we yihiramo obwolerefu. Handi mwekongooye mu maani ka Mwooyo Mwolerefu, 21mudoong'e mu hudaha hwa Nasae nimuliindirira esisa sy'Omwaami weefwe Yesu Kristo, ochia ohubaleetera obulamu butaakama. 22Mukwiire esisa abo abasikanaa-kana. 23Muwonie abandi nimubahweesa ohutula mu muliro. Mukwiire abandi bosi esisa nimweriindire nende obuti, handi muhoyeere ohuhaya kata engubo chaabwe, engubo chi bwekoombi bwaabwe bubi bwagubya. 24Oluyaali lube eyiri oyo onyala ohubaliinda mwaahaya ohukwa, handi onyala ohuboosa nende esangaalo mu moni wae w'Oluyaali nimutaaliho esibi. 25Oyo niye Nasae mulala yeeng'ene, otuwonia naabitira mu Yesu Kristo Omwaami weefwe, abe nende oluyaali, obuhuluundu, obutuki nende obunyala ohutula hale-na-handi, bulaanu nende endaalo choosi, mu Yesu Kristo. Amiina.

will be added

X\