EBBARWA YA YAKOBBO EBBARWA YI YAKOBBO YANDIIKA 5

1Mani bulaanu eng'we mutekeerese! Mwelalihirire handi mulire hulw'ebidinyu bicha ohuboolaho! 2Obuyiinda bweeng'we bwamala ohubola handi embuungi chamala ohulya ebyefwaalo byeeng'we. 3Esaabbu y'eng'we alala nende efeesa byamala ohuubba emberebeende, handi emberebeende chino chicha ohuba esyohuboneraho syekesa ebibi byeeng'we; mani chicha ohulya emibiri cheeng'we koti lu muliro kuhola. Mwehung'anisiiryeho obuyiinda mu ndaalo chisembayo chino. 4Mutekeerese, omuheemba kumwahaya ohutunga abahalaabani babahalaabanira mu ndalo cheeng'we, nguno kulira; handi nende ohulira hw'abandu bakesa hwoola mu matwi k'Omwaami w'Obunyala bwoosi. 5Obulamu bweeng'we hu syaalo bwali obwohwehoya nende ohwesangaasa abeene. Muhomeseerwe ohwiitibwa koti eng'ombe chicha ohusiinjibwa. 6Mwaheengera abandu bataaliho esibi emisango mani mwabeeta, kata bahaba nibatabayingania. 7Sakira basyaange, mwesimiirise ohwoola lu Mwaami yahakobolere. Bone koti lu balimi besimiirisa nibaliindirira endaalo chaabwe ohubaamira ebyaamo by'obuhoonyi. Besimiirisa ohwoola lu bahanyoolere efula yitangira nende eyimaliiriha. 8Mwesi mani mwesimiiriseenge. Mube abomiifu olwohuba oludaalo lw'ohukobola hw'Omwaami luli aambi. 9Basyaange, mutekanyiisaanga abaasyeng'we, mani Nasae haba saacha hubaheengera omusango. Omuheengi w'emisaango nguyo ali aambi yetekeehe ohwingira. 10Basyaange yichulise abanabbi balomaloma mu liita ly'Omwaami. Mubabukule ohuba koti esy'ohuboneraho esy'abandu besimiirisa mu biha by'ohusaanda. 11Hubalaanga huti b'ehabi olwohuba besimiirisa. Mwawulira koti lu Yobbu lu yesimiirisa, handi mumanyire esiindu si Mwaami yamubeeresa muhumaliiriha. Olwohuba Omwaami yechula esisa nende ohusaasira. 12Basyaange, esihirira elalira, mutechubaanga nimuhola esisuubise. Mutechubiraanga Ekulu oba esyaalo, oba esiindu siindi syoosi. Boole busa muti “Eee” nimudaha ohufukiirira, oba muti “Bbe” nimudaha ohukaana, hu muhaye ohubaaho omusango mu moni wa Nasae. 13Aliwo omuundu yeesi hweeng'we oli mu sidinyu? Leha yekongooye Nasae. Aliwo owundi hweeng'we oli mu sangaalo? Leha yeembe enyembo chifumia Nasae. 14Aliwo omuundu hw'eng'we olwaala? Ahoyeere ohulaanga abemeresi b'abafukiiriri, bamusabire mani bamubahe amafuta mu liita ly'Omwaami. 15Mani ohwekongooya ohwo ohwichuule efukiirira hucha ohuwonia omulwaae; Omwaami achia ohumukobosera obulamu, handi ebibi byaaba niyahola bicha ohumuleherwamo. 16Sakira, booleenge ebibi byeeng'we eyiri abaasyeeng'we, handi mwekongoyereenge abaasyeeng'we, hu munyale ohuwonisibwa. Ohwekongooya hw'omuundu mulungifu huli nende amaani maangi handi huhola muno. 17Elija yali omuundu koti efwe. Yekongooya niyomiisa ati efula yihaye ohukwa, mani efula yaahaya ohudoonya hu loba ohumala embaka y'emyaaka chidatu nende esituundu. 18Handi yekongooya, mani ekulu lyachuuha efula mani eloba lyaama ebyaamo byaalyo. 19Basyaange, omuundu hweeng'we natula hubwadyeeri, mani omuundu wundi yamukobosa handi, 20mwichulise bino: omuundu yeesi okobosa omuundu mubi ohutula mu ngira chae ehyaamu, achia ohuwonia omwooyo kw'omuundu mubi oyo ohutula mu hufwa mani yaleeta ohuleherwamo ebibi biingi.

will be added

X\