EBBARWA YA YAKOBBO EBBARWA YI YAKOBBO YANDIIKA 4

1Siina syeene esiletaanga ohulwaana nende obusoolo mw'eng'we? Ebiindu bino haba sibitula mu hwekoomba bweeng'we hubi ohubalwaaniramo? 2Mudaha ebiindu nae haba simubinyoola. Sakira muchaaka ohwiitana; handi mwekoomba ebiindu bimutanyala hunyoola. Sakira musoolana handi mwalwaana. Simunyoola ebiindu bimudaha olwohuba haba simwekongooya Nasae ohubibabeeresa. 3Handi nimwekongooya haba simunyoola, olwohuba muli nende ebichiiririrwa bibi. Mwekongooya ohunyoola ebiindu bimwehoonyera ohwesangaasa abeene busa. 4Eng'we abatesikiha! Mukoterwe muti, nimuwaamba esyaalo obwiicha muba abasuku ba Nasae? Omuundu odaha ohuwaamba esyaalo obwiicha, oyo aaba adaha ohuba omusuku wa Nasae. 5Oba mubaasa muti ebyandiiko byolerefu bibulamo amahulundu kaboola kati, “Omwooyo kwa Nasae ku yatutaamo kwechulamo ehiinda?” 6Nae esisa si Nasae atwekesa, sihiramo amaani. Koti lu byandiiko byolerefu biboola, “Nasae ayingania abesuunga, nae abaloonga abakwiira esisa.” 7Mani mube abawulisi eyiri Nasae. Lwaanie Sitaani mani achia ohubatulaho niyeruha embiro. 8Sude aambi nende Nasae, mani yesi achia ohusuda aambi nang'we. Eng'we abaholi b'ebibi, mwesaabe amahono keeng'we. Nae eng'we abakanaakana, mulabye emyooyo cheeng'we! 9Mweyendeherere nende esibeera mani mulire; Ohucheha hweeng'we hwehole ohulira, handi esangaalo ly'eng'we lyehole ohwewunamira! 10Mube abaloonga mu moni wa Nasae, mani achia ohubaniinia akulu. 11Basyaange, mutalomalomaanga bubi hu basyeeng'we. Oyo yeesi olomaloma bubi hu waasye, oba oheengera owaasye omusango, aaba alomaloome bubi hu Malako ka Musa, handi aaba alekeresa Amalako. Nae nolekeresa Amalako, awo sooba oli omuundu owulira Amalako, nae oba oli omuundu olekeresa Amalako busa. 12Olwohuba omuundu wataao Amalako niye omuheengi w'emisaango ali mulala yeng'ene. Oyo niye onyala ohuwonia oba yaasihirisa. Nae bulaanu ewe niiwe naanu oheengera owaasyo omusango? 13Nae bulaanu tekeerese eng'we ababoola muti, “Olwaleero oba muchuli hucha ohuchia mu siko nabulebe, mani humaleyo omwaaka mulala nihuchurusa hunyoole amagoba”. 14Mukoterwe koti lu bulamu bweeng'we bunaabe muchuli! Muli koti enang'oong'we eliboneha ohumala esiha sidiidi, nilikotao. Nae simumanyireho ebidiira hu muchuli. 15Mwahaboolere muti, “Omwaami naakanya, hucha ohuba abalamu, mani huhole sino oba sira.” 16Nae bulaanu eng'we mweniinia handi mwefumia busa. Ohwefumia hwengeri eyo, hubi nihwo. 17Sakira omuundu yeesi omanyire esiindu silayi syahooyerwe ohuhola, mani yaahaya ohusihola, aaba aholere esibi.

will be added

X\