EBBARWA YA YAKOBBO EBBARWA YI YAKOBBO YANDIIKA 3

1Basyaange, abaangi mweng'we muteehola ohuba abekesa. Olwohuba mumanyire muti efwe abeekesa bacha ohutuhengera omusango nende obwaalaba ohuhira abandu bandi. 2Efwe fweesi ebiha bihira obuungi hudondobana nihuhola ebibi. Nae omuundu yeesi otadondobana mu nomaloma yae, oyo aba omulungifu elalira, onyala ohufuka obulamu bwae bwoosi. 3Nihuta olusaala lundi mu munwa kw'esuhiri, lukera chatuwulira mani hwanyala ohuchiyira chaacha yihudaha yoosi. 4Oba bonereho hu meeri chosi. Kata chahaba ehoongo chityo, nichiirusibwa nende omuyaka kw'amaani, chifukibwa nende engasi ndiidi, mani chaacha buli abundu woosi yi mufuka yadaha. 5Olulimi lwosi luli lutyo. Kata nende niluli ahatundu hadiidi muno ahomubiri, nae lunyala ohwefumia hulw'ebiindu bikali bilulomaloma. Baaseho koti lu haliro hadiidi hanyala ohusaamba esichaha sihoongo! 6Olulimi lwosi luli koti omuliro. Lweechula ebibi. Olulimi situundu sy'omubiri kweefwe nae lunyaasa omubiri kwoosi. Handi olweene olwo nilwo oluwaambia omuliro hu mubiri kwoosi nilukutusa hu muliro kutaakama. 7Omuundu anyala ohutuka ebiloonge byoosi, - ebisolo biteende nende amayoni, ebisolo byambaaka nende eng'eni mani yaabihola byaloongoyala. 8Nae abulao omuundu yeesi onyala ohutuka olulimi. Olulimi lubi handi silutukiha, handi lweechula obusiba bwiita. 9Hwehoonyera olulimi lweefwe ohufumia Omwaami handi Seefwe, handi hwehoonyera olulimi lweefwe lweene olwo ohuholima omuundu waloongwa mu fwaani ya Nasae. 10Mu munwa mulala omwo nimwo omutula ohufumia Nasae nende ohuholima abandu. Basyaange, sino haba sisihoyera ohuba sityo! 11Mubaasa muti mu sulo ndala, munyala ohutulamo amaachi malai nende amaachi malulu? 12Basyaange, mubaasa muti omutuli kunyala ohwaamaho emisabbiibu, oba omusabbibbu kwaamaho emituli? Kata esulo y'amaachi k'omuunyu haba siyinyala husoohamo amaachi malai. 13Wiina mw'eng'we omukesi handi omanyire ebiindu? Lehe yeekesenge amakesi kae nende ohumanya hwae mu bulamu bwae bulungifu, nende mu biholwa byae biholebwa mu buloonga nende mu makesi. 14Nae mu myooyo cheeng'we nimuba nimwechulamo ehali-hali ebi nende obwimani, mani muleheenge ohweniinia nende ohwebacha nimuyingania obwadyeeri. 15Obukesi buno haba sibufwaanana nende obwo obwiiha ohutula Mukulu daawe, nae bw'esyaalo nibwo, obutaali obunadiini, obw'omusaambwa. 16Olwohuba ali ehali-hali nende obwiimani, awo wosi aliwo ohutabuhana nende ebibi by'engeri choosi. 17Nae amakesi katula Mukulu kataangira ohuba amoolerefu; handi kaleeta emireembe, handi kalimo obuloonga, nende ohudeeba hu bandu bandi; keechulamo esisa mani keebula ebiholwa bilai. Haba sikalimo mwooyo mubi, oba obwebachirisi. 18Handi abo abaleeta emireembe banyoolamo obwadyeeri bwataakwa mu mireembe.

will be added

X\